4-25(wed) 麗的50周年演唱會

上星期六去o左睇亞視個麗的50周年演唱會…買飛o個時諗住會好正, 有好多經典電視金曲聽, 又可以見番好多久違了o既歌星…點知…! 其實到佢後期宣傳o既時候, 已經知道好夢成空, 見到d演出者名單已經知道一定會悶爆! 點知…turn out真係悶爆!

首先, 佢堆參演歌星大半都唔多經典, 可能因為唔夠人, 連o岩o岩過檔無耐o既劉凱威都有份! 佢係唱得唔差o既, 不過真係9唔搭8 o左d囉! 佢除o左唱佢隻“大城小故事”主題曲同埋 “義無反顧”插曲 (真係睇唔到有幾經典?!) 之外, 仲唱o左呢期因為重播而再次熱爆全城 (好明顯加o左私人感情分而誇張百倍)+我最喜愛的麗的劇集“I.Q.成熟時”主題曲! oh…佢唔係唱得唔好, 但係我真係好希望可以聽到瘋華26年後再唱呢隻歌, 同埋可以再次witness“楓華再現”!

講開劉凱威, 真係唔知點解佢依家搞成咁…半紅不黑到呢…! 以前“新五虎”年代, 我曾經好buy佢…o係五個之中, 我亦都係最buy佢…當時雙古 (天樂+巨基) 已經紅o左, 大家都唔同level但又要夾硬湊成五虎…而o係另外三個中 (仲有吳家樂同埋何遠恒), 其實係劉凱威最有potential…佢一出道執到支好籌做“真情”o既安仔, 形象討好又夠入屋…可惜一做就由新人做足五年, 到 “真情”煞科時, 感覺仲係一個新人, 但係已經敖o左五年!

佢初出道時覺得佢幾靚仔, 幾有時代感, 又好似叫做讀過o下書, 唱歌又好聽 (記得有個節目佢扮張學友唱歌, 初時真係以為係學友自己唱o架, 呃到o下人!)…不過到後來見到佢同鄺文珣單o野搞成咁, 分手又搞到肉肉酸酸…男人之家要有d風度嘛…就算係個女人唔o岩你都唔好咁多o野講啦, 仲要係藝人喎…好核突!

哎…講番個演唱會先…無o左蔡楓華, 又無o左唱最多麗的電視劇經典金曲o既關正傑…真係好失色, 一d都唔經典, 仲有好多好歌都無唱到添!

亞視幾度台柱陳秀雯都係做番戲好d, 佢唱歌真係麻麻, 好雞仔聲! 葉振棠同袁麗嫦都唱得差o左好多, 以前睇佢o地唱唔係咁! 尤其葉振棠, 近幾年唔知佢係咪真係體弱多病得滯, 唱歌跌晒watt!

最攞擔係最尾o個part搵o左前亞視台柱, 現職有線高層o既徐小明出o黎唱o左差唔多半個鐘, 仲要打埋功夫! 雖則佢係有線高層, 但都唔洗俾咁大part佢唱呀?! 又唔係唱得好! 仲要唔知係咪佢太耐無唱歌, 把聲好唔入咪, 時大時細, 好鬼怪…佢仲要claim自已曾經係唱家班…真係嚇死人! 最驚恐係佢居然有成十幾紥花收…係咪真係有咁多人鍾意佢, 仲要鍾意到送花俾佢呀? 定係全部都係有線員工o黎o架?!

余安安出番o黎唱歌反而有d驚喜, 因為好耐無聽過佢唱歌…原來佢係“人在旅途灑淚時”o既原唱者! 佢後尾仲獨唱楓華隻“青春三重奏”…佢揀呢隻歌都幾搞笑…“火中抽出鐵棒…我知道燒傷了一對手…”…哈哈哈…! 仲有劉雅麗揀o個隻“風箏”都好好聽…我係有一次睇朝早六點幾亞視重播o個d舊劇, 見到葉玉卿等扮學生, 仲唱o左呢隻歌俾老師聽我先第一次聽到呢隻歌…我諗呢隻歌八十年代都hit過o下o卦?!

仲有, 連唱“情陷夜中環”o既陳鳳都有份唱呢個演唱會, 咁點解唔搵埋亞視近八年來o既台柱陳啟泰呀? 點可以無o左佢o架?

成個演唱會最好睇係d歌手一邊唱, 一邊播番d經典電視劇片段…但又唔係全部歌都播片喎…真係好失策, 明知呢part係最慳水慳力, 又可以喚起集體回憶你都唔做…亞視真係…哎!



oh…真係好勁! o係youtube居然連劉彩玉姐姐o既經典歌“紅太陽”mtv都有…勁! 成日都想搵番呢首佢最經典o既歌曲, 終於搵到喇! “紅太陽你怎麼欠熱能...”…九十年代初o既歌真係令人充滿回憶! 唔知有無人聽過佢同鄭梓浩o個首“一對妒忌的心”呢? 我個人認為又係幾好聽, 不過呢首就無“紅太陽”咁hit! 依家d人只會知道劉彩玉係做婦女節目o既主持…已經無人記得佢曾經係同sammi差唔多o個期出道o既歌星lu!


(我愛１Ｃ班 [我愛ICHIBAN])

仲一口氣見到幾個九十年代的舊節目…我又真係未睇過喎…有d似“暑假玩到盡”o個隻, 究竟係咩節目o黎o架?! 點解我完全無印象o既呢? 嘩! 又見到初出道o既鄭嘉穎, 仲有鄭梓浩, 劉彩玉, 同埋唐韋琪姐姐…佢真係好似王菀之!

仲有呢隻“我來自街機”都幾搞笑…



知道有好多朋友因為 “iq成熟時”o既 discussion forum而入o左o黎…就o係呢套劇隆重重播完畢之時, 送大家一份禮物…哈哈…幾年前o係 “iq成熟時”學校舊址又一村學校影o既相…裝修完變晒樣囉! (特別鳴謝金美姐姐當年帶我去到此一遊)



oh…原來今日係秘書節, 差d miss左, 好彩最後有人提醒我! 各位秘書小姐/先生…秘書節快樂啊!