5-27(sun) 我的兒時回憶-1991年sammi@週點

既然前一篇講開sammi久休復出o既演唱會, 都係時候講o下我呢位“兒時偶像”…呢篇日記其實係上年比較有空閒時重溫d珍藏錄影帶時寫落o既, 寫到一半又停o左, 都應該完成埋佢…



話說91年睇完“浪族闊少爺”好鍾意sammi同克勤, 呢套戲真係幾得囉…o個時接住“今生無悔” 上, 雖然係輕鬆小品暑期青春劇, 收視都唔差過“今生無悔” 好多, 閒閒地都有成40點 (雖然o個時o既計算收視方法可能同依家有d差別)…o個個年代克勤簡直係青春劇o既御用男主角, 88年o既“不再少年時”算係男配角, 之後o個年o既“淘氣雙子星”已經擔正喇, 90年暑期青春劇“戀愛快拍”就好似無佢份, 反而有另一個 “芹”黃凱芹, 但佢都有套“同居三人組”…到91年o既“浪族闊少爺”就直係為佢度身訂造, 連個片名都擺明係sell佢啦! 仲搵佢帶新人添…我記得開拍之前睇報紙, 話監製潘嘉德開呢套由克勤擔正o既青春劇, 仲搵緊女新人拍克勤…終於係搵o左鄭秀文…雖然o係呢套戲之前, 我都唔係好知鄭秀文係邊個, 係到之後先諗番, 原來年頭o既時候新人巡禮, 我有個表姐推介過佢隻改篇自陳淑樺“夢醒時份”o既“思念”俾我聽, 話好好聽喎! 係後來睇完“浪族闊少爺”, 先醒番起有件咁o既事!



其實當時sammi第一套戲就有得擔正做女主角, 仲有得夥拍當時得令o既克勤, 都咪話唔勁! 但係佢又真係做得幾好, 一d都唔似新人, 仲好自然添! 播緊呢套戲時佢已經開始上位, 又有得主持 “週點”, 又有得做“新秀”司儀, 隻“不來的季節”仲上o左叱吒第一位添呀好似…幾鬼勁呀!後來仲有得同四大天王之一o既學友拍“飛虎精英之人間有情”… 歌影視瓣瓣都大獲好評, 當時以新人o黎講都真係幾超水準! 華星捧新人, 其實又真係有一手…全部o係華星餚過一輪o既, 之後都會大紅…好似安仔, eason, 千嬅, hocc咁…不過可能要浸耐d囉!



o個期sammi身邊未出現 (或者未浮面啦) 安仔, 反而佢同克勤就不停以“情侶檔”姿態出席好多節目…連港台算o個個咩“九十年代最佳青春偶像配搭”佢o地都有份…另外四pair分別係黎明+周慧敏, 劉華+梅姐, 學友+憶蓮, 同埋葉蒨文+杜德偉! 觀眾真係好受落佢o地呢pair…亦都好受落sammi同盧苑茵做兩母女…因為真係幾似, 連佢o地自己都話似!


(九十年代最佳青春偶像配搭)

之後有一日克勤上祥仔同sammi主持o既“週末任你點”做嘉賓 (其實舅父波做主持真係唔錯, 佢帶住新人sammi亦都帶得幾好), 仲大談拍“浪族闊少爺”o既o野…o個日仲咁o岩有劉華一齊做嘉賓…你知佢o地幾個都幾好笑o下, 亦咁o岩我o個日學校有o’camp, 所以錄起o左呢個節目…終於就成為o左我唯一一集keep起o左o既“週點”, 亦成為現今芒姐重點珍藏的一部份!

克勤當時好hit o既一隻歌“護花使者”…當然, 更hit o既係佢o個set手指指o既動作…勝在夠簡單又加點騎呢, 大人細路仔都識做!


(sammi@週點1之克勤“護花使者”+ 克勤華仔訪問…當時sammi同克勤拍完"浪族闊少爺", 所以已經相當相熟; 但係面對已經係最受歡迎男歌手o既劉華, 當年仲係新人o既sammi, 好明顯有d戰戰競競…佢又點會估到, 十幾年後佢會同劉華變成電影裡的最佳拍檔…仲會成為佢演唱會尾場的嘉賓…嘻嘻!)

跟住另一位嘉賓係當時由亞視過檔無線無耐o既“未來偶像”甄楚倩…其實我一向都好怕佢, 超造作, 又懶靚咁…當然, 近年o係報紙見到o既佢真係嚇死你! 佢o個期個勢都幾好, 紅過當時o既sammi添…估唔到佢後來會dup成咁! 但佢呢個節目叫自己做“甄淑女”…真係好嚇人, 好貫徹佢個造作作風! 不過佢d歌其實ok好聽o既,“一冷一熱”,“深夜港灣”同埋呢隻“醉了”…唔知大家有無聽過?!


(sammi@週點2之甄楚倩“醉了”)

另一part o既嘉賓就係新人鄭梓浩同劉彩玉…前o個排提及過o既“紅太陽”劉彩玉姐姐 同鄭梓浩哥哥合唱o既“一對妒忌的心”…唔知大家又有無聽過呢? 其實我覺得呢隻歌幾好聽, 唔知點解一d都無hit過? 可能因為佢兩個都唔紅o卦? 仲有另一隻又係幾好聽+我個人認為又係蒼海遺珠o既合唱歌“現代愛情啟示錄”…又係鄭梓浩唱o既, 不過今次係同彭家麗! 可惜又係無咩人聽過, 去k都無人識陪我唱…實在太可惜喇!


(sammi@週點3之鄭梓浩+劉彩玉“一對妒忌的心”)

晝面質素頗差, 如果想聽晒全首歌, 請到:


(一對妒忌的心mv)

最後, 就當然係全民大合唱啦…hohoho! o個個年代所有人會唱, 甚至係呢個年代人人都識唱o既歌“朋友”…咩function都唱, 連生日都唱! 不過呢首歌又真係超經典, 一開始“繁星流動…”就自自然然人人都識唱埋落去…

(sammi@週點4之全人類合唱“朋友”)

“晒冷”完畢…再次重申, 千萬唔好問我借d珍藏o黎睇, 呢度亦無點播服務…任何朋友都無情講…請原諒我有自己的堅持!


延伸閱讀…鄭秀文的故事:
http://hejnom.blogspot.com/2006_05_08_archive.html