2008年12月24日星期三

12-24(wed)《東亞華星演唱會》

其實呢篇應該十日前寫…但因為之前掛住講偽才子同玉女單新聞, 再加埋又好多o野做, 所以拖o左十日都未講…但呢個演唱會絕對不能不講, 因為實在太精彩!

講緊o既係東亞搞o個個華星“餘葉”演唱會…嘩, 需知道我o地呢個年代成長o既朋友, 全部都係聽華星d歌大, 所以真係回憶返晒埋o黎! 好感動…好耐無聽一個演唱會聽到想喊…某d位, 當聽到d歌o既前奏, 真係差d想喊出o黎…因為o個d歌全部都係陪伴我o地成長, 係快樂童年o既一部份!

八/九十年代…係樂壇百花齊放o既年代, o個時雖然寶麗金係最強o既唱片公司, 華納都唔弱, 但我最鍾意o既都係華星…唔知點解我細個鍾意過o既歌手, 大部份都係華星人, 可能因為華星捧新人的確有一手, 而我又比較鍾意支持新人…到佢o地多人支持o既時候, 我又覺得佢o地已經無咁需要我支持喇…同埋到d人紅o左, 又通常會選擇離開華星, 所以華星來來去去, 都只係一個新人搖籃, 大歌星佢永遠只係得梅姐一個 (哥哥好似後來都離開埋…不過佢最紅o個期應該都係華星o卦?! 請指正, 因為當時年紀比較小, 都唔係記得好清楚)…


其實當知道有呢個演唱會, 已經十分期待, 因為華星真係盡是童年回憶! 果然不出我所料, 真係好好好好好好睇…雖然個場地真係二百個唔得, 以後我一定唔會再去, 除非個演唱會真係十分十分好睇, 因為真係太唔就腳, 仲要走o既時候全部人塞晒o係度疏散唔到, 最終搭完機鐵出去地鐵居然無接駁o既班次, 要我點幾鐘o係中環搵車走…真係安排得無可再差囉! 博覽館都係適合搞番博覽, 唔好用o黎搞演唱會喇…紅館…你可唔可以快d開番呀?

雖然個場地真係令我好激氣, 但係齋係評論個演唱會本身, 就真係100分…100分裡面, 當然有99分都係情意結o既分啦…從來一個演唱會好唔好睇, 都係在乎主觀o既心情多於客觀o既事實…當你o既童年回憶返埋o黎, 又真係幾多錢都買唔到! 當你見番你童年o既偶像聚首一堂, 仲要唱番好多你一聽個前奏已經可以隻字不漏咁唱番晒成首出o黎o既歌…又點會唔感動呢? 唯一不滿係有太多唔係華星o既新一輩歌手, 仲要唱番自己依家打o既歌…完全唔係o個回事, 但我都明白東亞個老細係想藉今次呢個“華星”演唱去帶起d“東亞”人…所以都可以接受…尤其念在佢幫我o地呢代o既朋友回憶返埋o黎!

壓縮o個四個華星人sammi/安仔/千fa/hocc, 全部都係我o係唔同階段鍾意過o既華星歌手…難得可以各散東西之後又再見番佢o地聚首一堂…好感動! 當然, 如果可以有埋梁炳同eason等會更好…不過世事又豈能盡如人意呀?

近年楊千嬅人氣跌o左好多, 作為佢o既前fans, 我都戥佢慘…但平心而論, 佢今次表現真係唔差, 唱功唔係話太好, 但真係進步番d, 同埋個look都好似好番d…仲有, 其實佢講o野一向都ok funny…希望佢有機會再起番少少啦!



至於最吸動o既一part, 我真係估唔到, 居然係許志安唱medley…連我自己都估唔到…因為你問我有無好鍾意過安仔, 又好似真係無…但當年係因為鍾意sammi, 所以一個package咁鍾意埋安仔…同埋佢o係華星年代d歌…真係超級超級超級超級超級好聽! 今次佢一開口唱佢d經典歌曲… “心血”呀, “男人最痛”呀, “喜歡妳是妳”呀, “戀愛片段”呀, “向全世界說愛你”呀, “唯獨你是不可取替”呀等等等等…真係每一首都一響起前奏就識跟住唱…有某d位仲聽到想喊添, 可能真係因為中學年代 (即係聽歌聽得最多o既年代) 聽佢d歌係聽得最多…當年會考同a-level都係靠狂煲佢d碟o黎隌伴我度過漫長的考試歲月…佢o個隻抱住隻貓o既“男人最痛”cd, 同埋有一隻係白底再加藍+黃色o既“驚喜交集17首”…全部都o係o個期煲都爛晒! 真係由頭背到尾, 由尾背到頭都得…咁無可否認, 安仔唱歌又真係超好聽…可惜佢又真係攞完 “最受歡迎男歌手”衰足七年…哎…時也命也…

o係呢個演唱會再次見番佢同sammi同台演出…都係十分十分回憶返埋o黎…可惜佢o地無合唱最經典o既“其實你心裡有沒有我”… sammi係我第一個偶像, 每次聽番佢d歌, 都諗番起小學至初中年代…跟住千嬅亦令我諗起高中至大學年代…真係忍唔住要講多次, 華星年代o既楊千嬅, 無論d歌定image都做得好好…華星做新星, 的確有一手! 仲有後大學年代o既hocc…都係好得!



睇番我自己o既collection, 我以前買o既唱片真係幾乎全部都係華星出品, 華星最全盛時期正值我o地青少年買唱片最多o既年代…Sammi, 千嬅, 安仔, 梁炳, eason每人我都至少有幾隻, 仲有d雜錦碟…相入面好多隻cd我都有…私日記, 雨後陽光, 快樂迷宮, 男人最痛, 我的快樂時代etc…以前真係連d碟名都記得, 依家呢, 連d歌名都未必記得晒囉!

仲有, 全體歌星一齊合唱華星校歌“火熱動感lalala”…又係無得頂…可惜無唱埋愛情傻戀 La La La”… “火熱動感”好似係第一首MARLBORO RED HOT HITS廣告歌…的確又係經典…就算係d動作, 相信個個朋友都會記得, 與及曾經跟住做攞….



oh, 最尾東亞群星合唱華星另一首經典歌曲”浪淘沙”…又係睇得人好感動…



原裝版本...”經典重溫 : 羅文 華星新秀 浪濤沙 MV 1986”

16 Comments:

Blogger Travel said...

芒姐:

睇返「火熱動感la la la」既mv, 發現華星都幾大細超ga! 點解咁講? 雖然話呢首歌係四個人合唱, 每人都有一段仔獨唱, 但係mv 鏡頭尾段都唔係好平均咁影四個歌星, 當時我諗最紅係城城啦, 最尾既合唱部份, 多數都係城城既大頭同埋影佢跳舞, 都有d Sammy 既, 但安仔同梁炳就無乜個人鏡頭畫面, 好似做左佈景版咁, 呢個世界, 原來真係有高低 :<

11:58 上午  
Anonymous 匿名 said...

哥哥82年簽華星, 84年先算開始紅, 87年簽新藝寶, 封咪之年仍屬新藝寶旗下; 復出之後簽滾石, 2-3年後簽環球, 但環球只負責發行, 製作全由哥哥開設的apex music負責, 離開之年仍屬環球旗下。

至於哥哥最紅之年是否華星年代, 呢點就真係見仁見智, 因為每個人對"紅"的定義都唔同, 80年代不喜歡leslie的人, 很多都由滾石年代先從新認識並欣賞佢; 而對由華星年代開始鍾意哥哥的人來講, 最有感情的可能永遠都係"monica"、"不羈的風"、"stand up"、"當年情"果幾隻碟, 但令佢地不停replay又replay的, 卻可能係"當愛已成往事"、"紅"、"怪你過份美麗"、"眉來眼去"、"侯斯頓之戀"、"夢到內河"等等比較後期的歌, 所以, 都係留番俾大家自己評估啦!

我好喜歡梅姐早期的歌, 真係百聽不厭的!

2:17 下午  
Anonymous 匿名 said...

火熱動感la la la...我仲記得個slogan!火係一團火由台灣(回)到香港aaron,熱係青春baby fat待燃燒sammi,動係動力年青edmond,感係感性+性感安仔
MARLBORO RED HOT HITS...成為咗當年一個潮流!93年頭就到Leon"我愛ichiban"!個cd cover係紅色leon指住雷電!仲有同款巾禮物袋送!
好晞虛...當年樂壇風光其實係因為有好多好多人買碟,咁d唱片公司先有錢而繼續出d正嘢,有正嘢又會更多人買.係一個良性cycle.唉...今時今日的人唔買碟仲要熱鬧d歌/歌手唔掂.咪就係因為佢地根本冇出錢支持過d歌手同唱片公司!唔知點解而家d人冇晒concept係買嘢要俾錢嘅!仲要話果d仲堅持買正版嘅人係傻仔.芒組,我而家仲係買正版cd,租dvd劇集嫁.不過我唔話俾人聽.真奇怪,今時今日做正確嘅嘢驚俾人話,明明係錯(download)反而變咗常理!

聖誕發憦騷溫哥華匿名人

3:54 下午  
Anonymous Trudy said...

"今時今日的人唔買碟仲要熱鬧d歌/歌手唔掂.咪就係因為佢地根本冇出錢支持過d歌手同唱片公司!"

呢個似乎仍然係「有雞先定有蛋先」的問題。

不過恕在下不能認同呢個論點, 依家d歌/歌手唔掂係事實一, 依家少左人買碟亦係事實二, 但你如何證明事實一係由事實二所引致? 唔通明明覺得d歌唔好聽/d人唱得好難聽都要出錢支持過d歌手同唱片公司呀? 佢地賺到錢係唔分俾你的。我反而真心覺得係因為d歌/歌手唔掂, 所以先無人願意花錢買。不過當然, 我本人都反對非法download呢d侵權行為。我都唔興非法download的, 我而家都仲係買正版cd/vcd/dvd, 不過值得我出錢買的, 已經唔多, 而對於我認為不合standard的, 我根本唔會bother download來聽/睇。

雖然大家睇法不同, 不過都祝閣下同芒姐聖誕快樂!

4:32 下午  
Anonymous 匿名 said...

trudy: 我同意"有雞先定有蛋先"的問題
不過好多新人初出道唔掂,就算當今天王天后當年都唔係perfect.好似sammi當年抖氣聲大到嚇人又肥.但就係有傻fans買碟,唱片公司就死谷力谷,又出錢佢百變,咁sammi自己又努力又跳舞又瘦晒,先有今日呢個天后

溫哥華匿名人

5:08 下午  
Anonymous christy said...

芒姐!!!(十分興奮) 我都有去睇呀! 你睇左邊場? 我睇左尾場呀。

果晚真係勁開心hyper,不過真係唔夠喉呀。
雖然我都明白東亞點都要俾d位而家既東亞人唱下自己d歌hardsell下.. 但自私地還是好想再有多d華星人唱華星歌。
所以我都好想有埋梁柄同eason呀!真係好想睇返華星三寶再聚首一堂 :)

嘩,我同你一樣呢。本人除左慣性見到千嬅sammi就好開心狂嗌之外,果晚之後我先知最最最開心係見到許志安同埋聽到佢個medley! 真係好好聽好懷念! 成個medley d歌都link得好好(冇得罪之意:個人認為hocc那個medley麻麻)果晚後我一度懷疑自己其實係咪安仔fans呢? 唔通真係一個package咁喜歡sammi就自然喜歡埋安仔但自己唔知... -_- anyway, 真係好想安仔事業再上高峰!

最尾見住安仔sammi千嬅hocc合唱其實真係幾感動,好似大家都為住母校為住同一件事一齊出力咁,好難得。

但,個場真係唔得,太遠喇好唔方便,自果晚後更希望紅館快d開返。

p.s.1: 「愛情傻戀 La La La」 好好聽!!!!! 但奇怪呢身邊唔係太多人識呢首歌亦唔見d歌手好喜歡唱返呢首歌...點解呢...

p.s.2: thanks溫哥華匿名人! 火熱動感la la la年代我重係小學生,完全唔記得有呢個slogan,今日知道返真係好開心呢:) 個slogan好正哈哈!

5:18 下午  
Anonymous Trudy said...

咁你認為當今歌手又有冇真心付出過求進步呢? 我認為好多都冇。

根本樂壇萎縮牽涉好多問題, 包括語言同市場限制, 呢d已經有好多人講過分析過, 將問題歸咎於市民唔支持, 似乎有點倒果為因。

不過我好欣賞你對當今歌手的不離不棄, 希望汝等的支持, 真的可促成他日天王天后的誕生。

我無意掀罵戰的, 純粹討論, 如有冒犯, 尚祈見諒, 就此別過。

7:20 下午  
Anonymous 匿名 said...

撞鬼! 點解林楚麒同戴蘊慧咁似樣? 兩個塊面都包成咁!

12:13 上午  
Anonymous tfil said...

我都睇左, 真係好集體回憶,諗番起好多uni year1個個禮拜唱k的片段...果陣女的唱親都係千fa,男的唱親都係安仔...surprisingly我的感動位都係安仔果part, 雖然佢依家的確有點面目可憎, 但原來佢當年的歌我又真係全部識哂喎...爭左梁炳, 如果唔係就perfect...另外都好欣賞佢地pay tribute to哥哥/梅姐, it's like a 延續 to their spirits. 個人認為"唯獨你是不可取替"唔合唱是應該的,要分左手的男女再唱當年他們的主題曲, 太sad了...

11:19 下午  
Blogger 芒姐 said...

tfil,

"唯獨"可以唔會, 但"其實你心裡有沒有我"本身都係一手經典合唱歌, 仲係華星年代其中一首好成功o既歌, 在公在私唱o下俾大家聽都好呀!

3:06 下午  
Blogger 芒姐 said...

匿名,

但林楚麒同戴蘊慧o個時塊面包包o地反而幾可愛喎, 好過依家d女星個個好似營養不良, 有d就mj翻版咁...

3:08 下午  
Blogger 芒姐 said...

Trudy,

我就覺得都有o既, 不過比以前少, 因為好多都係求其做做o下model或拍拍o下戲又俾人捧去唱o下歌...不過我近年都真係無咩衝動去買碟喇...

3:10 下午  
Blogger 芒姐 said...

christy,

我都係睇尾場, 仲要係星期一晚第二日要返工, 搞到咁夜仲要超唔就腳, 仲要安排得差無可差, 出到去連尾班地鐵都無埋...我都係自o個晚之後好想紅館快d開番!

我同意hocc那個medley真係麻麻...同埋畢竟佢o係華星真係得幾隻hit歌...安仔o個part medley真係好得...好少可可以聽到想喊...雖然我對佢本人的印象已經......但佢d舊歌真係殺晒...

咁"愛情傻戀"相比起"火熱動感"的氣勢同埋hit o既程度又真係差好遠...難怪無咩人識...從來"續集"都係唔夠"原裝"hit o架啦...

3:15 下午  
Blogger 芒姐 said...

溫哥華匿名人,

嘩, 你唔講我又真係唔知"火~熱~動~感~"原來有咁o既含意喎...勁!

個人認為之後寶記o既"MARLBORO RED HOT HITS"同華星呢個第一炮真係無得比囉...

3:17 下午  
Blogger 芒姐 said...

匿名,

聽你咁講完, 我個人會認為哥哥最紅的年代係華星喇...因為我都係聽"monica"、"不羈的風"、"stand up"、"當年情"等大...同埋依家數番哥哥最經典的歌, 都會係呢幾首行先...

3:18 下午  
Blogger 芒姐 said...

Travel,

oh, 呢個世界又點會無大細超呢...咁事實上當年阿王又真係好紅o既, 相信四個裡面, 我當年會更喜歡另外三位...但安仔當時好似仲未唱"喜歡妳是妳" (應該係92年尾...我有無記錯?), 所以仲係未紅, edmond更加係新仔一名 (我淨係記得佢當時首"夏季不不不")...至於sammi, 算係比較有知名度o既新人, 因為拍過o下電視劇...所以華星咁o既安排, 又唔算唔合理...

3:22 下午  

發佈留言

Links to this post:

建立連結

<< Home