2009年5月15日星期五

5-15(fri) 好多謝安琪吶喊演唱會2009

尋晚去o左睇謝安琪演唱會…你估我唔到呢?!

一向對謝安琪印象其實一般啦, 無論係歌藝定形象又或者係成個package…但無可否認佢係幾識講o野, 算係娛圈中比較有智慧o個批…姑勿論你buy唔buy佢講o既內容! 同埋佢呢期真係紅, 食住個勢開個唱都無可厚非o既…即係好似上年o既軒仔咁, 如果佢上年唔食住“酷愛”個勢開, 到今年都唔慌有得開!

至於我點解會去睇, 都係因為有朋友想睇搵我陪o個隻啦, 咁睇演唱會一向都係我酷愛o既活動o黎o既…睇o下都無壞! 尤其我成日都講, 每個歌星o既第一次個唱, 通常都係佢最好睇o既演唱會 (除o左幾年前去睇關心妍悶到我想 [界刂][椅] o個個演唱會之外…)!

不過謝安琪d歌我又真係識唔夠五首…囍帖街, 祝英台, 鍾無艷, 愁人節, 姿色份子 (“囍帖街”雖然係最大hit o個隻, 但其實我最buy係“鍾無艷”, 因為“囍”已經播到爛o左!)…仲可以數多幾隻o既, 但你叫我唱番出o黎我又未必識…同埋其實佢除o左大路o個幾隻囍/祝/鍾之外, 其他比較 “另類”o個d歌都有d相似…對我o黎講好難分得清!

基於以上毫無expectation o既心態之下, 出o黎o既結果居然係比我expectation好少少…至少佢今次唱live係我睇佢咁多次live performance以來最好及最穩定的一次, 因為之前佢每次唱live o既表現都好飄忽, 時好時壞…尤其佢o岩o岩生完之後真係唔知係咪“洩o左道氣”, 唱得勁嚇人, 成為翻版盧巧音 (即係標榜係“實力派”但歌藝十分“偶像派”o個隻)! 所以今次的表現值得一讚…佢好明顯有練歌!

同埋, 佢今次演唱會個谷胸look真係幾得…佢首"姿色份子"擺明係唱俾自己聽 (如果你有留意歌詞的話)! 不過呢個社會係咁o架啦, 先敬羅衣後敬人…我以前“細個”都會覺得呢個諗法好膚淺…但原來我當年有呢個諗法先係最膚淺…人o地唔識你, 第一個感覺一定係憑你o既外表去睇先, 所以你打扮靚d著得光鮮d, 只係尊重自己同尊重別人的表現…當然, 如果你一開口係零內涵o既話, 咁亦都係會換o黎一句“唔該晒”o既!

嗱! 坦白講, 佢o個套粉紅色“谷胸”裝真係著得佢好fit o下, 同之前完全判若兩人…我上個月o係mandarin見過佢真人, 真係幾瘦…各位女士真係要以佢為目標, 原來“反轉豬腩”真係可以係“公主”…連我作為一個女子, 都忍唔住喪"目及"得好開心…不停諗點解可以變成咁? 真係唔好以為女人唔會"目及"女人! 我要以佢為目標…wahahahahaha!

仲有, 原來佢老細 (亦係佢好多歌o既作曲/作詞人) 周博賢, 原來又係律師o黎…仲話之前一邊做律師一邊做音樂人, 後來仲做埋全職音樂人添! 我發覺真係好多律師都好唔鍾意自己個yim悶行業, 個個都會搵o下其他副業做 (如搵到的話啦o下) :p

btw, 前兩日又o係中環見到廖碧兒, 已經係唔知第三定第四次撞到佢…但今次見到佢同之幾次感覺差好遠…忽然間老o左好多殘o左好多...上幾次真係好驚為天人o架, 真人靚+fit過上鏡好多…但今次…! 反而之後見到老佢一round o既翁嘉穗…原來真人真係幾ok, keep得幾好喎!

撞見廖碧兒2007
撞見廖碧兒2005

寫完呢篇之後, 發覺今日呢篇應該俾個總結佢, 就係…女人真係唔易做, 女人唔補亦都好易老! 嘩哈哈哈哈~~~!

12 Comments:

Anonymous christy said...

咁你睇完之後有冇對謝安琪加返D分?:P
聽講佢演唱會有講自己以前做過教師(我睇八卦雜誌講咋),係咪真架?真係唔知原來佢有做過老師呢... 雖然佢個人俾我既感覺都幾有老師feel.. 即係好有原則,是非黑白分得好清咁。咁kay真人靚唔靚架?

哎呀,點解呀:( 我覺得bernice好靚:) 有次響d商場function度見到佢,靚呀不過就冇驚為天人既感覺。不過硬係形住做娛圈尤其係拍戲即係無記果堆都好快殘同老... 因為實在係捱得太辛苦喇...

9:29 下午  
Anonymous 匿名 said...

我都睇咗...
d歌藝唔錯不過成個show都幾悶下lor

8:15 上午  
Blogger mandy said...

係喎,唔記得你話過會去睇添。
我尋晚睇左尾場,現場真係俾我預期唱得好,但總覺得佢講得太多道理,仲多過「道理王」EASON。
佢既歌,我都唔係十分熟,但應該好過你少少既,:P。
最驚喜係有羅太汪阿姐做嘉賓,仲要係唱熱咖啡,初初都唔知係佢添,勁。

8:24 下午  
Blogger 芒姐 said...

mandy,

Oh, 你就好啦, 有羅太...應該精彩好多...我o個場得波兒...齋張太都ok悶...哈哈!

10:43 上午  
Blogger 芒姐 said...

匿名,

完全認同...歌藝比平時好好多, 但個show整體係悶...我都打o左好多個呵欠, 我見其他人都係...不過因為我完全無expectation, 所以ok!

10:44 上午  
Blogger 芒姐 said...

christy,

歌藝方面加o左少少, 樣貌都加o左, 但其實係化妝技巧好o左好多, 同埋或者好似大部份報導所講啦o下...但身材係加o左好多, 完全都之前唔同晒, 唔知佢發生過咩事? 但整體感覺依舊...佢係好聰明, 但有d o野我唔太欣賞...

咁又係, 俾著我唔瞓三日三夜, 都會殘o左三年啦...bernice o個企o係都爹利街 (煤氣燈街), 仲要係lunch time人來人往, 但佢好似同個女士"爭拗"緊定唔知點, 總之黑口黑面, 唔太得囉...所以大家記緊要笑多d先會靚d!

10:44 上午  
Anonymous 匿名 said...

芒姐,

知你一向buy林峯
咁你有冇睇"峯從那裡來"個特輯呀?
http://mytv.tvb.com/entertainment/raymondlamspecial/25562/25565

最好笑係"marco"叫佢以後唔好再著短褲...似乎好多人對佢呢排o既打扮都好有意見..haha

C.

1:20 上午  
Blogger 芒姐 said...

C.,

哈哈...我有睇呀! 個特輯名本身都已經好好笑...太八十年代feel...唔知邊個改!

我o個日睇到marco講呢個point都笑o左出o黎...佢都講出我心聲...短褲或者三/四個骨褲真係少著為妙!

12:06 下午  
Blogger Unknown said...

聽講Kay廿六歲仲讀緊HKU,搞咩野?不過而家咩野都返晒來啦.
唔明翁嘉穗點會嫁海馬哥,佢老兄五十都應該有,而且有錢又後生過佢,港姐No.1要識應該大把啦.

3:51 上午  
Anonymous 匿名 said...

芒姐,
可唔可以開個topic講"峯從那裡來"呀?我諗到d野想同你地share吓

溫哥華匿名人

9:21 上午  
Blogger 芒姐 said...

溫哥華匿名人,

好, 你叫到開一個俾你...

11:09 上午  
Blogger 芒姐 said...

Clement,

係囉...其實謝安琪o係讀大學之前o個幾年去o左邊呢...但如果用佢本來報o既年齡, 咁就fit晒o既...

哈哈...咁又唔係咁講, 大把有錢佬, 但未必個個想娶港姐, "玩o下"又係另一回事, 同埋即使港姐冠軍, 都有大把靚過翁小姐...佢選到當年我真係覺得十分麻麻, 係過o左咁多年佢到o左呢個年紀佢都keep到好似以前咁 (甚至好過以前), 先加o左分咋!

11:12 上午  

發佈留言

<< Home