7-8(wed) 勁金歌曲

話說上個星期五好"神推鬼ngun"咁去睇o左阿sa同903 dj細蘇有份演出 (其實係客串先o岩) o既舞台劇"勁金歌曲"…出奇的好睇囉!!! 可能因為我係毫無expectation, 所以真係有意外驚喜, 比我想像中好睇好多好多好多好多好多…尤其係適合我呢d"我是八十年代"的朋友…所以芒姐真係要勁勁勁歌推介呀!

首先要多謝幫我攞飛的朋友…除o左套劇本身出奇的好睇之外, 居然撞到容祖兒, 王祖藍, 阿嬌, 蔡一智等人坐埋同一行隔幾個位...正! 真令人驚~喜! 有機會近距離"觀星"…王祖藍我都ok buy o架喎! 雖然你如果要我揀一個去影合照…我會揀…阿嬌囉! 至於點解…自己諗啦!

不過我當然無去搵佢o地影合照或者攞簽名啦…因為大家一向都知道, 芒姐唔係呢個style...現實生活中的我, 是超內斂的…嘩哈哈! 同埋我成日都覺得, d公眾人物o係私人時間應該俾番d "privacy"佢o地...將心比己, 我都唔想行行o下街俾人騷擾啦…雖然, o黎呢d show又唔算得晒係“私人時間”o既…佢都預o左會有fans埋身…但…你當我“怕羞”啦o下!

英皇一家親o黎睇舞台劇…點解無林峯o既? Wahahaha! 不過即使見到林峰, 我諗我都未必會主動走過去搵佢簽名/合照, 因為我真係唔係呢個style…記憶中唯一一次搵“明星”簽名, 係o係跑馬地大碗粥見到朝偉 (基本上跑馬地係日日都有機會撞到明星o架啦~)…而基本上我亦係一貫地絕對唔會去排隊攞簽名…但幾個同學仔起哄一齊去, 咁又拖埋我去, 就係咁簽o左梁影帝個名o係我當年張student id card度 (?!)…而唯一一次同“明星”影相, 就係同當時仲未聲淚俱下地話自己“真係好鍾意唱歌”o既古巨基合照…因為佢o黎學校做talent quest…o個年我o地負責搞, 又順勢學人影o下合照囉! 而當時唱緊“第二最愛”年代的古怪基, 其實我是十分buy的!



好, 講o左太多題外話, 講番個舞台劇先…可能真係o係無expectation之下, 所以咁驚喜 (我知我好out, 人o地已經做到3rd run, 我先留意到有套咁o既劇…不過佢宣傳真係唔多夠, 好似仲少過“喝彩”, 所以我幫佢o係呢度宣o下啦!)…話說上星期四睇報紙見到訪問阿sa, 話佢會做一個舞台劇, 問佢會唔會請鄭中基去睇, 但佢話佢已經無晒飛, 跟住又見個報導話個舞台劇裡面會講o下廚房宣言, 又有好多八十年代歌曲, 咁就忽然抽起條筋想去睇...但當然d飛已經晨早賣晒啦, 尤其係阿sa有份演出o個幾場 (今個禮拜阿sa個角色會換成kary)...點知夜晚就有朋友話有飛問我有無興趣睇...仲要係我正想去睇的星期五晚o個場...所以我覺得簡直係"神蹟"囉!

好彩"神推鬼ngun"下個天安排o左我去睇呢個show...否則就錯過o左咁精彩的節目! 我覺得簡直係我近年睇過最正o既舞台劇, 可能因為開正我o個瓣, 又係懷八十年代的舊, 仲要首首歌我都識晒, 好有共鳴, 個故事雖然係自家創作 (as opposed to用大家耳熟能詳的哥哥+danny+鍾保羅的故事為藍本的"喝彩")...個人認為比起我去睇o左三次o既"喝彩"更精彩...咁就當然好過上次又係打正“懷華星的舊”o個套搵笨"我們的華星年代"多多聲啦!

有關呢個舞台劇o既資料…大家可以睇呢個 “trinity blog”…

正如我第一次去睇完“喝彩”之後寫道: “其實去睇之前都無懷有任何期望…可能就係因為無期望, 反而讓人有驚喜! 至於一開始點解會去睇, 相信大家都會估到…因為我確係八十年代的fan屎, 雖然我生於一個錯誤年代!”

今次亦都係一樣…眾所周知我最喜愛八十年代, 雖然我生遲o左幾年, 但好彩都食到個水尾…可以光榮地告訴一眾“小朋友”, 我都算成長於八十年代!

雖然無大我幾年o既哥哥姐姐咁“親身經歷”到呢個香港樂壇/影壇/視壇最光輝的年代, 但好彩我由細到大都係同大我4-8年的表哥表姐玩, 正當大家仲玩緊公仔o既時候, 我記得84年我已經同我d表哥表姐坐晒o係電視機前面睇港姐, 並好認真地o係紙上逐個逐個評分, 雖然我其實唔係好知點評…同埋點去分邊個係美貌與智慧並重…身材更加唔洗講啦…哈哈! (咁當然, 與此同時我都有一邊玩公仔o既~)

又正當我d同學仔仲睇緊卡通片, 我已經跟我d表哥表姐一齊坐定定睇總選…所以當我d同學仔要到“四大天王”年代先留意樂壇…其實o係校長同哥哥o係樂壇爭鬥o既年代…我已經係擔凳仔霸頭位睇總選! 仲記得芒姐第一首識唱晒成首o既歌係“愛在深秋”嗎? 因為佢正正係當年o既金曲金獎…我真係有睇o架~~~

因此我o既心境/思想/經歷一向都係比同年紀o既小朋友大一截…亦都一向同大我5年以上o既朋友最o岩傾…所以我成日俾人話係一個“少年早熟”o既小朋友! 雖然我個樣比同年紀o既人細一截, 但我心境其實又比佢o地老一截…真係十分矛盾o既一件事!



Anyway, 我想講o既係, 雖然呢個舞台劇應該係大我五年倒o既朋友會最有共鳴…因為八十年代正是他們的黃金年代…但因為我o既“少年早熟”, 所以我都好有共鳴囉…同埋佢o係裡面唱過o既歌, 首首對我o黎講都係耳熟能詳…又係“回憶返埋o黎”之舉!!!

o係網上見到一個song list…你睇d歌真係好得…揀得好好! 但唔知係咪真係齊o既呢? 好似少o左好多歌咁o既…同埋無o左好最鍾意o個首林~志~美~“感情的段落”…一響起個前奏已經覺得好正! 仲有 “這是愛“, “忍著淚說Good-Bye“, “也許當時年紀小“, “放縱“ (呢首好耐無聽過喇…最記得呢句…“我空虛 我寂寞 我凍”~~~), “一對寂寞的心“…首首都好好聽! Oh, 當然仲有“心中的歌”…呢首唔洗講, 之前講開草蜢, 大家都知我最鍾意呢首慢歌…佢居然揀o左呢首o黎唱…正!

如果你同我一樣, 都係八/九十年代勁聽歌, 咁就真係會回憶返埋o黎, 聽到想喊囉…因為…those were the days…我們都是這樣長大的!

我個人鍾意上半場多d, 原因同“喝彩”一樣, 個劇情開心d呀…其實兩套劇內容有d相同, 又係三個好朋友由讀書, 到出o黎社會做o野, 各奔前程, 經歷人生起起跌跌…當然, 呢套就無“喝彩”個結局咁慘o既! 同埋成個劇本寫得出奇地好, 好流暢, 仲可以加入好多八/九十年代曾經發生o係你同我身邊o既事情, 好多個位真係會發出會心微笑! 同埋我真係估唔到個劇會做咁耐, 從來無試過八點開場的舞台劇可以睇到十一點三…真係超抵睇, 仲長過演唱會…雖然坐得太耐老人家會腰骨痛! 不過真係笑位連場…掂!

成長於八十年代的人…係伴住收音機成長的一群 (雖然我唔算太係…我係電視粉絲多d…但我身邊真係有好多呢d朋友)…所以佢講o個d每日準時捕o係收音機旁邊聽節目, 打去點唱, 跟住收音機播o既歌抄歌詞, 又或者跟住唱, 錄歌落cassette帶…有邊個未做過?!

最抵死係個主角講番話諗住錄歌去燒o野食時播, 當side A轉去side B時本來想錄一首歌, 但呢首會令side A剩番15秒, 咁樣轉去side B時會剩番好多時間, 令個flow唔夠流暢, 要錄過第二首剩少d時間o既…真係好中point囉! 我當年都成日會為呢d事而“煩惱”…當然, 呢d o係剪接錄影帶時發生多d…但當你成功剪接o左一餅帶係輯錄晒全部你想睇o既o野而一秒都無o徙時, o個種滿足感係非筆墨所能形容 (新一代是不會明白的…嘩哈哈!)…我承認我係好無聊o架! 哈!



仲有“auto reverse”呢個function…亦都係久遺了啊! 仲有參加新秀, 去海濤恤髮 (?!), 張國榮同譚詠麟歌迷的惡鬥…全部都係80年代的icon囉! 再到90年代o既家駒之死, 翻版cd o既出現, 香港樂壇光輝年代o既“沒落”, 商台o既 “無人駕駛”時段, even廚房宣言都有…好頂癮! 但其實我以為佢會講個男主角最後真係攞到最受歡迎男歌星獎, o係台上講番廚房宣言多謝阿sa添…做戲做全套呀嘛…反正又fit in個劇情o既!

嘩…成套劇真係睇到人好有共鳴好感動, 仲有好多笑位添…芒姐強烈推介成長於八十年代o既朋友去睇一個囉! 因為, 呢d就係你同我o既集體回憶憶憶憶憶~~~!

(少少題外話…原來細蘇唱歌真係幾好聽喎! 等我仲見佢成日同森美唱埋d咩“四仔”等歌曲, 以為佢唔唱得o既添!)