5-4(thurs) 霑前顧後流行樂
上個禮拜日睇o左一個唔錯o既節目, 係tvb播o既港台特備節目“霑前顧後流行樂”, 以黃霑o既博士論文去講番香港樂壇三十年來o既轉變…呢個係我一向好鍾意o既topic…所以大學年代都特登每個禮拜走去上王志淙o既“香港流行文化”課程…佢d資料幾豐富, 又講得幾好, 仲要堂堂都有嘉賓…有一個禮拜佢仲請o左霑叔o黎講, 同埋派o左一份霑叔寫關於流行樂壇o既文章…好精彩囉! 今次呢個節目又搵王志淙o黎做主持, 我覺得最適合不過! 仲有霑叔個女黃宇詩做旁白, 又係搵得好!
我講過我好鍾意睇呢d documentary形式o既節目, 仲要係分析樂壇多年來o既變化…更加o岩我口味! 而由霑叔呢位經歷樂壇三十多年興衰o既老行尊去評論, 亦係最有資格! 仲要訪問埋何韻詩呢位現今樂壇小天后+80年代瘋狂小歌迷 (大家都知佢對偶像梅姐有幾咁狂熱), 由佢現身說法, 亦係不作他人選!
Oh, 仲有播番好多舊片段, 港台確係最resourceful! 睇到80年代最興旺o既樂壇, 到90年代開始出現翻版, 依家就網上下載…以前d歌手閒閒地都賣到三, 四白金 (50000張為一白金), 知道松松姐姐91年出o個隻“月兒彎彎照九州”銷量係幾多嗎? 係六白金! 依家? 賣到六萬張應該開番個千萬記招去大肆慶祝啦!
忽然想post一段片, 係1990年港台搞o既“香港心連心凝聚每分光音樂會”(類似啦…2003年sars後個感謝大會都好似用番呢個名!)…主題係叫大家唔好移民留番o係香港! last一part所有星聚埋一齊合唱呢隻點題歌曲“凝聚每分光”! 每次聽到呢隻歌都好感動…仲有另一隻80年代中期有隻“地球大合唱”又係集合眾星…好多人, 好眾志成城, 好我愛香港o個隻…我最鍾意! 所以近年o既“同步過冬”都一度係我o既favorite…雖然程度上差好遠! 每次聽到呢首歌都會有一陣感動, 諗番起踏入九十年代o個一期!
其實呢隻歌o係“凝聚每分光vs選民是你”o個篇日記已經談論過…大家想搵番歌詞可以睇番呢頁
呢隻歌得梅艷芳/葉蒨文/林子祥/許冠傑/徐小鳳/羅文有份合唱…雖然o個時學友, 劉華, 憶蓮都有出席呢個show, 但仲未夠班去唱…不過之後o個年, 樂壇已經青黃不接到連relatively新o既劉華都可以成為最受歡迎男歌手!
呢個show仲見到梅姐帶埋一班徒弟 - 草蜢, 許志安同譚耀文出o黎表演! 亦都larp到仲係dancer o既陳小春同埋謝天華…佢o地o個期真係好紅喎, 咩show都見到佢o地…仲記得“忘情森巴舞@91忘我大匯演”嗎?! Oh仲有我最喜愛o既鄧靄琳姐姐做司儀呢…好耐無見過喇! 佢真係有大將之風過淑梅姐好多!
hoho, 原來依家深夜“無間音樂”有個新環節叫“點藏點樂點唱榜”…有得投票聽番d舊歌 (雖然大部份都不太舊)…不過有d都幾吸引呀…我最鍾意聽舊歌o架嘛! 以前“翡翠音樂幹線”都係每星期有一晚係齋播舊歌, 所以我先可以錄番咁多舊歌mv…依家終於有番呢個“舊歌之夜”lu…逢禮拜二呀! Yeah!
點藏點樂點唱榜
呢排睇d音樂節目, 見到Shine出番o黎, 仲有首新歌叫“鼎鼎大名”, 真係久違了! 原來佢o地不經不覺已經出o左道四年, 但點解呢兩年消失o左? 其實佢o地開頭開得好好…橫掃晒所有新人獎, 同埋d歌真係做得幾好 (唱就仲有好大o既進步空間喇!)…好有gimmick, 亦幾好聽! 點會無啦啦唔見o左咁耐? 依家見番佢o地, 好似大個o左好多咁!
posted by 芒姐 at 11:10 上午
7 Comments:
芒姐, 我睇o左"四大天王"喇! 嘩! 真係好好笑、好好睇喎! 我覺得學跳舞同stylist o個兩parts最好笑(尤其聽到個stylist叫吳彥祖做dan dan, 叫尹子維做維維), 陳子聰真係幾抵死, even尹子維都比想像中搞笑。我終於都睇到andrew個無辜樣同埋話要五個fans o個一幕, 好高興!
gooloo,
係呢?! 都話正o架啦...stylist o個part雖然好假+誇...但真係笑爆咀!
shire呢兩年去左台灣呀~
我都有睇"霑前顧後流行樂"呀, 好好睇呀! 兩年前霑叔唔o係度無耐, 就收到HKU Alumni Affairs Office o個個"Dedicated to Dr James Wong" o既email, 立即o係網上睇o左佢份thesis o既extract, 當時已經覺得佢寫/分析得好好, 而家睇埋"霑前顧後流行樂"之後更加覺得精彩, 不過得兩集好似太少, 如果可以做多幾集, 內容可以再詳細d 就更加好!
你知唔知邊度可以搵番霑叔寫關於流行樂壇o個篇文章(王志淙o係"香港流行文化"課程派o個一份)? 我好想睇o下!
我又係好鍾意睇d 有豐富史料或者充滿集體回憶o既documentaries, 我以前好鍾意睇"香港倒後鏡"同"香港傳奇", 分析樂壇、娛樂圈o既就更加係我杯茶(所以我都有睇"四大天王"), 舊年港台有個外判製作o既節目"百年夢工場", 我直情集集都追(其實我唔算係一個film fanatic, 細個時最吸引我o既係歌星/音樂節目, 不過隨住香港樂壇o既衰落, 我無可奈何地將d 精神轉移到電影方面)!
lilith,
我都好似聽過佢o地去台灣, 但通常都香港歌手都係撈唔掂先會被"放逐"去台灣(e.g.當年的何嘉莉/鄭嘉穎)...我就係唔明點解佢o地好地地無啦啦會dup得咁勁呢?
sandy,
oh, 原來個節目有兩集?! 咁我miss左第一集...實在太可憐喇!
係啦, 最鍾意睇港台製作o既呢d documentary形式o既節目...尤其關於我最喜愛o既樂壇/電視圈回顧! even係香港歷史回顧我都好鍾意睇, 好似當年一系列o既"集體回憶六/七/八十年代", 我都集集追!
"香港倒後鏡"係幾好睇...呢排深夜除o左播"爆笑急轉彎", 都成日有播呢個節目! 我覺得當年個新人顧樂儀其實真係做得幾好...可惜佢做o左無耐就走o左去嫁有錢佬!
霑叔寫關於流行樂壇o個篇文章...我真係唔知邊度有, 因為我連文章名稱都唔記得!
哈哈, 霑叔過身後hku send o黎o個d文章/link, 我都有即刻睇晒呀! 真係寫得好同埋分析得好到肉!
你去港台個網頁load返之前有集《萬王之王》訪問shire。梁奕倫主持o既~~好似話佢地唔係唔掂先過台灣o架~~~
發佈留言
<< Home