5-5(fri) 火舞黃沙, 戲吞天下
尋晚去蘭桂飲o野, 居然同時間見到soler同埋王賢誌 (不過佢o地唔係一齊)…可能因為係假期前夕, 又係五一黃金週…成個蘭桂都勁多人, 仲要勁多自遊人!
soler就無咩特別, 差d唔認得佢o地添, 因為外國人o係我心目中個個都係差唔多樣! 王賢誌就有d驚喜喎…我個人認為佢比上鏡靚仔! 十年前佢初出道時個樣真係唔太得…唔知係後來睇睇o下順眼o左呀, 定係佢真係整過呢? 好似好樣o左好多! 仲有, 佢真人真係幾瘦o下! 哈哈…依家o係電視又成日見到佢, o係街又見到佢…可能佢係出o黎宣傳“火舞黃沙”…咁又係, 佢好少可做戲, 係應該落力宣傳o下!
套“火舞”都有睇過一集…不過有d悶, 可能因為我不嬲都唔多buy呢d heavy大製作, 仲要係民初/古裝劇, 大家都記得我連最經典o既“金枝慾孽”都無睇…所以雖然今次有邵美琪, 但都係not my cup of tea! 我最欣賞o既反而係佢句宣傳口號囉…“火舞黃沙, 戲吞天下!”…好型囉!
我都係buy“女人唔易做”多d (陳慧琳小姐o係訪問中話好鍾意睇tvb近期o既“女人當自強”…佢實在太得意喇)! 大家玩心理戰, 你最好o既朋友分分鐘就係出賣你o個個, 邊個係好人邊個係衰人, 唔會咁易睇得到! 不過d角色開始變得太克人憎囉…連高ling都居然會出賣hilda姐…你真係估佢唔到! 仲要羅慧娟個角色真係好煩…原來佢先最奸! 佢依家做戲真係有d怪, d表情又有d怪…可能失聰真係對佢有d影響, d戲好似做得比以前差o左好多!
不過鄧萃雯就真係做得好好, 每個表情動作都好真, 個角色亦都真係好o岩佢! 呢個好恨生仔但又對男人失去信心, 最後借種失敗但意外懷孕o既高齡產婦角色…真係為佢度身訂造! 佢d戲真係好到…無得講! 其實問心o個句, 佢keep得比邵美琪仲好…以前都唔覺得佢特別靚, 但睇番佢d舊相, 其實佢又確係幾靚o既!
仲有謝天華都做得幾好, 個賤man角色真係幾賤…又係應該可以上到位! 咁當然, 我仍然係最欣賞林峰!
襯假期, upload左一批舊日記, 同埋幾篇去年10月話post好耐, 但一路都未打及從未公開o既“2005我本善良+日落巴黎之旅”遊記@ 芒姐再現之…“舊日的足跡+英倫遊記”.
另外, 有個“寫作疑問”…唔知有無朋友有睇過tvb八十年代初o既“流氓皇帝”? 我上網又唔多搵到資料, 對此劇印象又頗模糊 (多年前重播係有larp過o既, 但你問我套劇講咩, 我又真係唔知!)…淨係記得“百花笑…春光展…”!
posted by 芒姐 at 12:21 上午
6 Comments:
"流氓皇帝"係一套當年幾特別既劇﹐我仲幾得套劇係K-100既宣傳係講秋官總共有10個唔同身份﹔故事沿用"大時代小人物"既鋪排﹐由小人物"朱錦春"(秋官個角色)身上﹐敘述中國由民初到抗日戰爭既歷史。朱一家本身係類似貧農既物體﹐因為錯+姻緣際會+相貌相似﹐結果由一個普通人﹐幾經轉折﹐變成軍閥﹐更被日本人帶去滿州做左傀儡皇帝(個日本軍閥個角色我記得係老戲骨光毅叔做既)﹔傀儡皇帝個角色造型仲好似溥儀添﹔套戲既另外一條主線係佢同李思琪既感情﹐兩個人永遠好事多磨﹐最後要去到80年代﹐兩個人七老八十先至係香港重遇返﹐一個係麻姐﹐一個係乞兒﹐果一刻都幾感人。不過成部戲大部份時間都充滿笑料(80年代笑料﹐而家未必識笑)﹐我唔記得邊個編劇﹐呢個人應該幾ambitious﹐當年既電視劇﹐好少有編劇夠膽用咁鬆既手法﹐去講一個咁沉重既故事。
細節既野我真係唔記得喇﹐當年我都仲係小學生一件﹐當笑片咁睇(有d場面真係幾好笑﹐例如角色名啦﹐秋官既"朱錦春"未夠爆﹐秦煌既"朱祥芬"先算得上爛gag﹔晨早流流水井有鮑翅食﹐秋官唔慣食魚生﹐又俾架仔逼佢食﹐帶住墨超既佢食到眼癱癱等等﹐當時覺得好好笑)﹔希望呢d點滴可以幫到你啦。
G Armani,
真係多謝你提供o既資料...當然可以幫到我一大忙啦...因為我本來真係唔多知道套戲講咩! 之前睇到有人話係用溥儀同九龍皇帝曾生o既故事做藍本, 已經覺得好天馬行空...點知睇完你講, 原來更天馬行空都有! 好似幾有趣咁!
http://www.hkartist.net/_disc-dramma/00000024.htm
戲劇結構似呢個喎~
你講得無錯呀，失聰對羅慧娟真係有影響架，我睇過佢一個訪問，大至係話因為佢聽唔到自己講野，所以唔知講野時個咀型岩唔岩，所以會變成有ｄ怪。
其實我覺得高 ling 出賣 Hilda 果段係個編劇有問題之嘛，講到 hilda 咁懂商場遊戲，奸既人會出賣你蠢既人都會架，蠢人出賣你比奸人出賣你仲大鑊呀，因為奸人知底線蠢人唔知丫嘛！所以戲裡唔應該分好人同壞人，而係分聰明人及蠢人，果一集真係睇到我媽媽聲呀，如果 hilda 真係醒得咁關交，應該一早睇得出高 ling 果種純得如白紙既小女人先係最危險啦，佢地既演技雖好，但係劇情真係差到無譜。
不過我同你一樣，都係有睇女人無睇火舞。
雲,
同埋我覺得高ling無理由個三九唔識七o既羅慧娟講兩講就去出賣佢個好姐妹, 都算喇, 你出賣o左人又心虛自爆, 實在好得意!
仲有, 上個禮拜d劇情有d位去得太快...尤其高ling同小齊結婚o個part同埋hilda姐兩集就生完仔!
m@linxism,
又係有d似, 咁你有無睇過"流氓皇帝"呀? 我記得我o地小學年代好似有重播過!
今日睇"演鬥廳"播o左少少75年o既"小婦人"片段, 好似幾好睇咁, 可惜我唔覺有重播過呢套劇!
發佈留言
<< Home