6-7(thurs) 講不出聲

原來卡拉ok已經有得唱“講不出聲…講不出聲…”喇…我要快d去先得…仲要唱埋“心領”!

同埋原來都真係好多人同我一樣咁欣賞林峰…除o左演技, 仲有佢o既歌藝, 同埋舞技添…真係唱+跳得好過好多歌星!

同大家分享一段陳年片段, o岩o岩o係youtube搵番…“2002兒歌金曲頒獎典禮”- 方力申+鄧健泓+林峰+李彩華合唱“快將暑假拍下來”…o個次係我第一次聽林峰唱live…當時真係覺得幾impressed, 因為真係唱得好過晒其餘三個歌星好多 (雖然o個三位又真係實力一般o既…)…同埋o個時覺得呢隻兒歌都幾好聽, o係英國o個時仲成日聽添!

o個期應該係ｏ岩ｏ岩播緊 “再生緣” , 睇緊呢套劇已經好欣賞做皇甫少華o既林峰, 雖然o係套劇都有聽到佢唱插曲, 但係呢次係第一次聽到佢唱live, 令我更加對佢刮目相看…當然, 到04年睇到佢同 “奧運六星”跳舞, 就更加欣賞佢…真係樣樣掂喎, 跳得好過自稱dancer出身的吳唱k好多添!

睇佢o係兒歌金曲個造型, 應該係拍緊“流金歲月”…明明係丁善行個頭o黎o既! 佢仲要同佢o個個“緋聞”女友李彩華同台添…不過o個時佢o地都應該已經分o左手喇! 嘩! 阿rain妹妹以前真係好樣好多…依家成個樣變晒, 好似個wax咁 (sorry, 真係唔識打, 有無人可以話我聽點打?), 以前有d肉反而靚好多!



呢幾日睇報紙講hocc o係blog寫有人抄歌引起罵戰, 真係有無搞錯? 呢個咩世界o黎o架? 依家d人真係鍾意亂咁鬧人, 亂咁恐嚇! 唔係因為我一向欣賞hocc, 而係人o地發表o下自己言論, 又唔係有咩侮辱性, 仲要唔係對記者講, 只係o係自己個blog度抒發o者, 唔係咁都唔得呀? 可能因為佢係artist所以言行都會敏感d, 但佢又無指名道姓, 學大契話齋, 又何須對號入座呢?! 就算佢真係話, 都係抄歌o個個有問題o者, 又唔係唱o個個…何況雷生抄歌已經係舊聞, 十年前我仲係中學生o既時候都已經有o架啦, 人人都知, 無咩特別…歌迷又真係無需要咁激動呀! 你自己唔認同唔接受就算喇, 走去人o地個blog踩場, 仲要恐嚇, 呢d行為真係好唔要得, 我覺得直頭可以稱為無品! 唔係人o地唔認同你偶像, 佢做咩都會變成錯o架嘛…大個o架喇, 成熟d啦! 呢d行為, 只會令普羅大眾對於佢o既偶像o既印象減分, 因為fans o既質素正正反影到個偶像本身o既質素o架嘛! 全件事其實最無辜係古巨基, 同埋佢其他正常o既fans, 就係俾一小撮自以為係愛護偶像, 維護偶像o既搞事fans, 影響晒成team人o既形象…今次真係愛你變成害你喇 (就好似華仔個發癲粉絲楊小姐咁)! 有感而發…有得罪請見諒!

仲有, 睇到黎姿細佬單車禍, 真係好驚喎…點解咁勁o既車禍, 兩個司機反而可以完全無受傷…條安全帶真係咁犀利?! 以後坐車都一定要戴安全帶, 同埋唔好為o左貪平五個人坐一架的士…諗起都危險呀…oh! 佢咁後生又咁有為, 真係太慘喇!

上個星期睇"娛樂直播", 原來係王賢誌o既last day…之前睇報紙講佢阿爺分家產o個時, 都已經有講過話佢今年約滿無線後唔會再做, 話意興爛跚, 因為做o左十幾年都做唔到港姐司儀, 反而無線就係咁捧個崔建邦…令佢好唔gur, 決定退出娛樂圈!

其實睇o左佢咁多年, 反而覺得有d可惜, 有d唔捨得佢! 其實佢呢幾年真係做得幾好…初時見到佢咁o既樣, 真係唔適合做呢行, 但呢幾年又好似好樣o左, 定係睇慣o左呢? 其實我覺得十年前o既佢係應該退出, 但到o左依家做o左咁多年, 又有o左d知名度, 反而應該做埋落去, 或者有得做呢?

咁以後"娛樂直播"又係靠vinci最“憎”o個個“崔尚宮”撐住喇…佢口才唔係唔好, 擦鞋仲一流添…但未免係過份暴光, 咩節目都有佢, 睇到悶囉! 仲有o個一jar2005年港姐葉翠翠, 陸詩韻, 袁彌明, 麥雅緻o個d…都算好彩, 一選完港姐就咁o岩開呢個節目, 可以做主持做足兩年, 同埋見佢o地呢兩年o黎真係進步o左好多o既! 反而06年港姐就無咩o野做 (呀…有o既, 落選o個個徐淑敏有得做“正字”, 季軍呂慧儀仲勁…嘩! 謎女郎! 更勁o既係兩個都有得拍阿“才子”貽興王嘛!)…!