7-17(tues) “歲月是怎樣煉成的”
嘩, 呢幾日真係好好好好好好熱呀! 熱到不能再熱…以前都未試過熱得咁辛苦o既…即使只係出一出去, 成身都可以濕晒, 仲要焗到抖唔到氣, 好癲呀! 細個時就算唔開冷氣都ok o架喎, 依家唔好話唔開冷氣, 只係走出冷氣半步, 就可以熱到出晒汗…真係好誇張…點搞好呀?!
o個套“強劍”睇o左個幾禮拜…真係唔係好知佢想點?! 唔知係咪想學“蓋世豪俠”? 走古裝搞笑片路線, 但又唔係真係好好笑…本來我都以為會幾好睇, 點知又真係吸引唔到我…廖碧兒, 鄭嘉穎, 黃宗澤個個個樣都好時裝…時裝人拍古裝劇…有d怪咁!
禮拜一o個個“歲月是怎樣煉成的”製作特輯, 都幾係悶…睇完都唔覺得有吸引o左我去睇套劇, 仲要無停過o係度播“三套車”, d人講來講去都係o個d o野…好煩!
“歲月風雲”本來大家好期待, 但係內地播o左兩個禮拜口碑又好似唔係太好, 始終香港人睇內地同內地人睇內地o既觀點同角度係兩回事…可能會兩頭唔到岸, 兩邊都唔討好…佢仲要一開始就話兩兄弟因為爭落香港而反目, 成為之後唔o岩o既導火線…呢種“大香港”心態內地人一定唔會接受, 好難會o係內地受歡迎…但係香港人睇呢種戲又會覺得好老套…真係兩頭唔到岸喇今次! 即管睇多幾集睇o下佢有無好轉啦…!
上個禮拜去o左睇“harry potter 5”…我從來都唔係哈仔fans, 個故事都唔係好知道, 一本書都無睇過…只係因為當初o係英國跟o左d同學仔去睇第二集, 咁睇開就集集都走去睇o下…但係永遠都唔多記得上一集講過d咩…! 不過作為一套電影, 今次呢集真係比上幾集悶好多…其實係佢o地幾個仲係小朋友o既年代比較好睇d, 畢竟小朋友玩魔法總比大人玩魔法好睇, 依家佢o地變到牛高馬大, 真係幾怪…仲有個張秋點解o係戲裡面咁醜樣? 我見佢做宣傳時個樣都好似靚d!
我以為淨係我呢d“非fans”覺得悶, 不過散場後聽到好多fans都話覺得呢集好悶…我直頭臨尾頂唔順瞓著o左…可能因為返o左成日工o既關係! o係戲院呢d燈光咁昏暗又咁舒服o既地方…又真係萬試萬靈, 次次都會瞓著!
Oh, 套“同事三分親”d演員傳咁多緋聞套劇都係無咩起色, 黃家嵐整直o左把頭髮好鬼怪, 都係之前個鬈髮好d! 仲要同做埋佢老公身份o既蔡淇俊談情, 真係勁肉酸! 其實我覺得套劇某d集數都幾好睇…上個禮拜“嬋嬸”o個集都幾好, 仲有樓華個樣真係一見到就想笑…!
禮拜三又重播“妙手仁心”…好似重播o左好多次喇…唔係一連播五輯呀嘛? (應該係三輯...多謝讀者"rtv2atv"提醒!)
仲有, 原來“還看今朝”, even係o岩o岩播完o既 “拾年”都就快出dvd…依家d dvd真係出得快!
posted by 芒姐 at 6:11 下午
11 Comments:
相對小說中的張秋, 梁佩詩小姐真的可說是奇醜無比, 真不明白外國人的審美觀念。
"歲月風雲"嘛, 真的不敢寄予厚望, 坦白說, 對於中共統一中國之後的一段歷史, 我從來不感興趣, 甚至有點害怕, 所以也不太欣賞電影"霸王別姖", 至於電視劇, 但凡有大陸場景的, 都不能吸引我, 例如"燃燒歲月"、"情陷特區"、"龍的天空"、"生死訟"等等, 正是"睇見劇名都怕怕"。
芒姐,
強劍應該係蓋世豪俠式吧... 你試下預左佢係浮浮誇誇睇就會好o的架啦~~ 相比起一成不變既武俠劇,無線有突破始終係好事黎既..
我一直都好buy同事三分親架!!真係唔明點解個收視咁平庸...好似o岩o岩尋晚o個集,講裘俊同diana,半個鐘故事拍到似短篇愛倩小說咁,真係幾正~!
re: 強劍
陳敏之個樣其實真係唔可以話靚, 加上佢d可怕懶音("生活"可以講左做"身活", 佢都可算話係懶音界中o既佼佼者)同矯揉造作o既表情/眼神, 真係睇得人好難受!
匿名,
哈哈...敏之姐一向都係懶音界o既代表人物!
Tommy,
um...可惜強劍同蓋世豪俠o既好笑程度又差好遠! 不過我今日終於發現佢有一吸引之處...就係佢首泰文版主題曲, 笑爆嘴! 如果佢每日擺o係片頭播一次, 應該會吸引好多...
同事三分親...我都真係幾鍾意睇o架...唔知點解收視會跌得咁多呢?
渝,
我諗外個人同中國人的審美眼光...真係好唔同!
呢種太有國內/地區色彩的劇集, 往往都太heavy, 又太多訊息想傳遞...其實我都麻麻!
歲月風雲我會睇。暫時睇o左三集，都幾好。林峰飾演o既華振邦好可愛！又係同溏心一樣，純粹為睇佢。
下? 華振邦好輕佻喎, 又懶, 又冇建樹, 咁都可愛?
華振邦唔係輕佻，佢係高傲自負。暫時冇建樹係正常，因爲要突顯佢前期好逸惡勞，中意玩唔中意做野，所以佢都直認自己懶。
我話佢可愛，係話佢這個時期仲係似一個細路，比爸爸兇完會喱在媽媽後面，又會同孻叔孻嬸撒嬌，份人貪玩，胸無城府。好中意睇佢地一家四口一齊d戲。
睇完今晚果集之後覺得華振邦非常之咁乞人憎! 完成係不負責任、不事生產、不知所謂嘅少爺仔!!
ps. 請問林峰是否磨了腮骨?
re華振邦:
初段o既華振邦真係唔多討好, 典型二世祖...同埋佢o個把曲髮, 尤其係"汁""音"...好肉酸!
腮骨唔知...個鼻似有整過! 但我覺得其實佢未整仲好睇好多...其實以前已經好好啦, 點解要整?
發佈留言
<< Home