5-28(wed) 火蝴蝶

話說上個禮拜經歷下午發冷 (終於大熱天時o係office搵o左件樽領衫出o黎著), 跟住一放工即刻走返屋企6點幾開始瞓覺, 瞓到凌晨開始肚餓, 5點幾肚空空到有d想嘔, 唯有起身諗住食個蘋果, 點知自己白痴仔, 發晒曉仲飲暖水 (因為平時一向習慣飲暖水)…點知唔飲由自可, 一飲漂晒汗, 一滴一滴係咁漂, 仲要焗到有d透唔到氣…即刻去開大個窗再坐o係疏化休息o下…咁當然會開個電視睇o下做緊咩…點知睇到一套叫“如夢令”o既單元劇…一睇個戲名同埋開頭已經幾吸引我, 因為應該又係o個d前世今生劇, 仲要係八十年代出品o既一集過單元式, 我最鍾意睇呢d o架嘛…主角有張兆輝同江欣燕…講張兆輝今生係作曲人, 跟住忽然作到首樂曲好似曾相識, 跟住又發夢呀, 又撞車呀, 又o係街見番江欣燕呀…跟住當然係講番前世往事, 然後今世相認…你o翕都o翕得出o既老套橋段…但就係呢d先好睇!

跟住呢期居然意想不到地有睇o左d亞視套“火蝴蝶”…本來真係一d興趣都無, 但佢又係醒, 又用番最終於用o個招即晚放o係深夜重播…總會唔覺意睇o左d, 跟住又睇埋落去 (雖然我知道我應該早d瞓)…嘩! 套戲又係娘到要一邊睇要一邊鬧…跟住一邊鬧咪又係一邊睇囉…哈哈! 好typical的電視迷!

雖然佢話係用小甜甜同王德輝個故事做藍本, 但又唔覺得十分似…幾房人咁更加似何生一家, 跟住女主角復仇應該係海潮d friend啦! 不過搵李彩華做女主角又真係無咩說服力…第一佢無咩主角格, 第二佢太細個 (好似得24歲), 雖然個樣幾老, 但係都係唔夠說服力…同埋佢近年個 “瘦面”樣太似周汶錡…簡真係兩姊妹! 反而佢初出道未經修葺有d baby fat塊面包包地個樣最靚…同郭可盈的情況一樣! 郭可盈又係車匙年代最靚, 依家個樣…哎! o個日o係街又再次 (注意係又再次) 見到當年“刑偵2”做配角 o既凌祖絲…反而仲靚過佢好多囉! 同埋前個禮拜睇tvb賑災show, 唔知點解覺得yumiko依家個樣同郭可盈好似…真係好似, 倒模一樣!

講番隻“火蝴蝶”… 首主題曲好八十年代, 甚至係七十年代電視劇主題曲o既style…仲要擺o係同“變色龍”差唔多時段, 兩首歌o既style有d似, 咁當然係“變色龍”好聽好多啦…o個日亞視個籌款show仲要幾個演員一齊唱呢首主題曲但係改晒歌詞, 可惜隻歌根本就無人識…你仲要改歌詞, 更加無人知你唱咩!


(“火蝴蝶”主題曲)

成套戲我反而最鍾意睇董敏莉…上次“補習天后”已經讚過佢! 其實我幾鍾意睇佢, 幾清純幾可愛, d戲都唔錯, 好過佢唱歌好多…可惜咬字唔清晰, 呢樣要改善o下! 佢o係套劇做阿rain個妹, 雖然個樣係細過老積阿rain好多, 但係原來佢1980年出世, 都大阿rain幾年…咁真係keep得好過阿rain好多囉! 但係戲裡面佢個男伴阿梁俊一…真係唔知想點? d戲都唔算太太太差, 但係脂粉味可唔可以唔好太重…d女主角都man過佢!

“火蝴蝶”…

《火蝴蝶》（英文：Flaming Butterfly），是由香港亞洲電視製作的2008年重頭電視劇，為亞洲電視首部以高清拍攝的電視劇，由當今的亞視當家花旦李彩華和亞視當家小生唐文龍主演。本劇共40集(改為1小時30分鐘後共33集)，於2008年4月21日起逢星期一至五晚上9:00-10:00播出，2008年5月19日起延長至晚上9:00-10:30播出，是繼總有艷陽天後，第二套Drama90系列劇集。本劇集的男女主角，被指影射王德輝及龔如心夫婦。