10-6(tues) 有營煮婦
呢幾日終於有少少時間追番前幾個禮拜o既劇集…睇睇o下其實套"有營煮婦"又ok好睇喎…初時覺得佢唔知走咩路線, “真情”式溫情佢又唔算太係, 搞笑又唔太係…仲要做三十集喎…心諗tvb都好兵行險著! 點知原來呢d劇係要慢慢浸, 無無聊聊輕輕鬆鬆又幾好笑o下…d笑料唔覺意滲出o黎…唔怪得知可以出三十集…果然有d o野! 反而幾kum睇…有少少“甜孫爺爺”o個隻feel…!
king sir o個個咩五常法: “常組織、常整頓、常清潔、常規範、常自律”, 又綁住晒d杯杯碟碟驚佢o地走位…同埋描寫king sir退休生活都好寫實, 偶有笑位會令人發出會心微笑, 仲有後來個老婆愈o黎愈紅, 有少少女尊男卑的心理關口都描寫得幾好!
跟住喬寶寶o個part又幾好笑…幫張櫈改名做eugene…仲有以為洪天明係基o個幾part都ok…即係全部都係o個d無無聊聊o既笑位, 但有時d笑料又唔需要太刻意, 係無無聊聊先好笑嘛! 不過上個禮拜上晒娛樂版o既法拉除淨個bra o個段, 又的確係同劇情格格不入, 好明顯夾硬加落去搞gimmick…佢就算以為洪天明係基, 都無必要o係佢面前換衫同小解?! 不過唔係咁, 又邊有人會留意呢套戲呀?! 只係估唔到呢連d合家歡戲都會忽然有呢d咁九唔搭八的場面…又係殺人一個措手不及o既! 依然套套劇都有呢條橋…"有營煮婦"有法拉除衫…連“畢打自己人”都有“o靚模”賣肉…真係齋睇電視都“目不暇給”囉!
仲有麥包同伍詠薇o個段都ok…不過叫何綺雲做佢家姐又真係牽強o左少少! 我尋日睇到第十四集, 講麥包去試音響, 居然係播緊“la tour eiffel~la tour eiffel~待我隱藏傷感~”…已經笑o左啦, 跟住伍詠薇走間舖為引麥包注意, 再即場跟住音樂哼番兩句“la tour eiffel~la tour eiffel~”…雖然好無聊…但又係忍唔住笑o左! 原來d最無聊o既笑位先係最好笑!
(伍詠薇 - 失落於巴黎鐵塔下…la tour eiffel~la tour eiffel~)
呢期真係“我們的伍詠薇”囉…亞視星期六日深夜重播“再造繁榮”! 上個禮拜再睇多兩集, 真係幾好睇…點解當年我會miss o左o架?! 再睇番wiki, 原來係1991年7月首播…我估應該係9點幾檔…當時tvb應該做緊“蜀山奇俠之仙侶奇緣”…可能我睇o左呢套所以無睇到“再造繁榮”o卦?! 真係唔知…不過90/91/92年o個期其實亞視真係幾多好戲上囉!
至於我一向好buy o既“畢打自己人”, 呢期都漸入佳景…雖然社長同老總戀情“明朗化”之後反而無咁好睇…反而之前估估o下同埋有d曖昧o個時最正! 不過我剛剛睇番有個少女 (即係話同港男羅天宇o既激嘴牀照曝光o個個四葉女coffee) 扮"o靚模"aima o個集…又係笑死我! 因為我無expect佢咁好笑…我一路敷mask一路睇, 點知敷敷o下忍唔住笑o左出o黎...跟住塊mask甩o左~
o個個少女都做得幾好...好入型入格, 我估佢唔到! 尤其佢叫社長做"昇昇"同埋用d白痴聲問老總: "你點解會知道答案o架...你聽過o架?!"...好無聊…真係好“港女”…但做得好好, 我要俾個叻佢!
之後o個集好似仲見到有修哥添…係咪同君麗姐姐重組“青青河邊草”經典組合呢? 我未睇…不過我都期待睇o下!
posted by 芒姐 at 11:24 下午
10 Comments:
以我所知，法拉不嬲喺師奶界嘅形象極差。唔係話佢姣，就係話佢似二奶，不顧一切向上扒。
我以為家好月圓做啞女，然後呢齣做男人婆，應該可以正式入屋啦卦。點知突然整單咁野。
我阿媽好似對佢有啲改觀（睇緊家好月圓），但係如果佢有一日見到Fala除衫又去小便嘅話。。。哎！
芒組,
RE: 上次我個留言.唔係呀.你睇埋第一頁FANS探班記,呀唱K呢個新朋友個樣好似林峰呀!
http://tieba.baidu.com/f?z=648513614&ct=335544320&lm=0&sc=0&rn=30&tn=baiduPostBrowser&word=%CE%E2%D7%BF%F4%CB&pn=30
溫哥華匿名人
Yeah!!! 我都係畢打嘅fans!!!!! 我集集都有追XD
hi~ 你好呀~ 法拉除3露bra呢度真係令好多人打個突,跟住呢排講佢發現洪唔係基,就嬲人地,我覺得呢個故事橋段好痴線! 不過我就好鐘意睇麥包個家姐,幾有趣! 另,我自己覺得畢劇越黎越唔唔得,尤其是前幾日話老總鐘意睇一個blog,點知個blog原來係社長,呢d橋,真係用到爛!!!我幾唔鐘意睇佢地呢pair.
可能我呢排屋企冇電腦用,所以迫住要對住電視機,所以特別挑剔啦~ 我好少同你持相反意見 :bbb
Mark,
法拉舊年做完"家好"之後形象係好番d o既...不過佢始終都係做風情萬種的角色最入型入格囉我覺得! 但我又唔覺得今次除衫露bra會對佢形象有咩影響...只係覺得好無謂同埋好唔配合劇情o者!
溫哥華匿名人,
啊! 原來係話似林峰...咁都有少少似o既...
匿名,
係呀! "畢打"呢幾集愈o黎愈好睇呀! 社長同老總...even君麗姐姐同修哥都好好笑...可惜佢o地已經走o左喇!
moon,
哈哈哈...無所謂o架...相反意見無壞呀, 最緊要有自己主見唔好人云亦云就無問題啦!
不過老總無啦啦搵到社長個blog又係牽強, 同埋之前話老總寫個馬戲團故仔blog又係好無啦啦咁...哈哈, 但佢o地段感情就發展得ok o既!
最近無睇畢打 不過睇到收視
畢打一升升3點有27點真係幾surprise
d 收視愈黎愈好咁
不過《有營主婦》真係幾好睇
無想像中咁悶 特別伍姑娘條線
笑到死左
佢仲有套《美麗高解像》我都想睇
匿名,
伍姑娘條線真係得, 好笑得o黎其實幾寫實...
法拉同天明o個條其實都ok o既...不過唔算太出囉!
發佈留言
<< Home