2-12(sun) 騰訊微博黃偉文作品展 Concert YY + 陳潔儀 x 趙增熹傾城音樂會
呢幾日最hit o既話題…當然係, wyman o既YY show!!!
成個show都好震撼, 粒粒巨星, 每首歌都勾起好多回憶...難怪微博同fb都俾呢個show洗版...唯一遺撼係我睇o個晚無彭bell囉!!! 其實我最主要係為睇佢而買飛o架嘛…原來唔係晚晚有…失望咗!
雖然我從來唔係彭bell fan屎, 但十九幾年無見過…又的確好想回味吓佢o既歌聲! 即係咁…我細個係鍾意同期o既sammi的, 仲覺得彭bell個樣真心唔靚 (就算我依家睇番”愛過痛過亦願等”年代o既佢…依然咁覺得! 同埋心諗林海峰真係咩taste, 點會話一開始就𥄫中佢? Sorry…坦白說這真的是我當年的想法!)...但佢今次一出真係殺晒, 好elegant好有女人味...同林憶蓮個case一樣, 過咗四十歲反而仲索過以前... 原來人生經歷同心境真係會令女人變靚d, 成熟高貴的氣質唔係一般廿零的𡃁妹可以媲美!
你睇呢段片…氣質與歌聲也很超脫…女神一樣! 各位女士真係唔應該驚老, 反而應該look forward to囉…
(彭羚 - 小玩意@騰訊微博黃偉文作品展 Concert YY 2012.02.09)
另一位wyman作品展唔可以無咗佢o既…當然係佢o既第一代最佳拍檔李蕙敏啦!!!
畢竟阿y最初為人熟悉o既代表作, 就係amanda o個兩首"怨婦歌"…”你沒有好結果”同”活得比你好”! 仲有佢哋一齊合作主持o既電台節目“娛樂性騷擾”同埋當年同城城+彭羚一齊做o既商台廣播劇"戀愛1/2"(btw, o個期d廣播劇真係hit到呢…尤其係第一套“初戀無限次”…o個時雖然第二朝要返學, 但晚晚1點幾都要追埋先!), 都係好經典! 但amanda今次出返o黎…no offence, 佢個造型加埋把聲真係令人真心驚! 好似話佢之前做過手術…但把聲搞成咁…真係比當年的"怨婦"更"怨婦”....超灰!
(李蕙敏 - (你沒有)好結果 + 活得比你好@騰訊微博黃偉文作品展 Concert YY)
見到佢咁, 真係好慘! 佢同彭bell兩個都係久別重現眼前…但反差實在太大! 佢又係咁多年都咁黑仔o個批...紅少少又唔知點解忽然dup晒! 仲有佢o個隻成隻sharp醒黃的”一次又一次”大碟, o係hmv長期賣5蚊的大碟, 真係慘到呢...
oh...呢兩晚居然有shine添! 佢哋首"燕尾蝶"當年又係like爆...次次唱k都要唱…真心好聽! 其實呢兩個o靚仔唱歌唔差o架喎…解散咗好可惜!
Wyman呢個show真係真心掂! 每一首歌都勾起好多回憶…十分那些年! 仲要d嘉賓多到呢, 一個o係個台降落, 另一個立即升起…仲要除咗d鐵腳晚晚都有驚喜…呢d真係最醒的marketing策略, 大家就係為估+搏當晚有咩嘉賓…睇完一場又一場…仲要口碑載道, 就更加買完一場又一場! 正如我個friend所講, 以後唱k, 除咗可以歌手選曲, 應該加埋以作曲/填詞人選曲呢個function囉!
(Shine 燕尾蝶@騰訊微博黃偉文作品展 Concert YY 2012.02.11)
正當全城被wyman洗版, 其實另一邊廂嘅陳潔儀x趙增熹個傾城concert亦好精彩! 阿kit真係靚聲后囉…論聲可能比彭bell更完美! 不過聲勢就當然係y嗰邊勁啲(同埋會展個場真係麻麻…當然就便利過博覽館少許o既)! 兩個show都好得呀! 呢個禮拜真係演唱會週…場場都咁精彩!
posted by 芒姐 at 11:48 下午
19 Comments:
我睇11號那場係shine打頭陣，無咗彭bell(我記得當年有雜誌話林海峰特登搵彭bell做廣播劇借故親近佢的說)，有吳浩康，周國賢、twins(不過係世紀廁所位)，加埋hocc、fiona成堆好似00後review咁，登時想起以前走堂去唱k的日子…真係那些年到不能…
李蕙敏個look真係好恐怖﹐加埋把聲... 我諗起白雪公主裡面個巫婆... 彭羚就真係正過以前~
Re: 彭bell vs 李蕙敏 + 女人愈老愈吸引
即係咁, 彭bell泊左個好碼頭, 衣食無憂, 生埋女之後生活又有規律, 梗係冇乜點老啦; 李蕙敏就咁多年都浮浮沉沉, 分分鐘係搵朝唔得晚, 娛樂圈生活又晨昏顛倒, 梗係急速衰老啦!
我諗「女人愈老愈吸引」呢個講法必須建基於「養尊處優」呢個條件, 至少，日日捱騾仔的我, 應該冇可能會愈老愈吸引喇, 哈哈!
Amanda係黑仔,特別係有比較時.可能佢個STYLE真係冇觀眾緣,所以唱歌事業到樽頸又冇其他工作合適.於是原地轉食個幾隻HIT歌老本十幾年.本來今次呢種咁有NOISE嘅懷舊SHOW係捲土重來好機會.可惜.
戀愛1/2都有Wyman你記唔記得? 同埋3年後係出過續集戀愛後1/2,不過完全冇PART 1咁正.冇咗郭靜差好遠! 芒姐考你,記唔記得晒D角色名? 幾年前TVB居然抄去"家好月圓".我個年紀小的表妹唔信我話TVB連對白都照抄.於是我預期之中的一段播出時,我可以快過個演員讀出句對白.Amazing.
溫哥華匿名人
阿哲, 阿雪....
好低b, 我當年竟然唔知丟o左, 定賣o左套小說, 係我人生中做過最低 b 的事
BTW, 我覺得後戀愛1/2好騎呢地加左林海峰個角色入去, 可能因為覺得男女主角應該一齊, 其他所有人都好煩. 我記得我最後冇心機聽落去.
WYMAN開show前,見有人係度踩話連詞人都可以開到演唱會,點知一開show,FB被洗版,全是彭羚開金口,然後個個就話後悔冇買飛睇,CASS套衫真係好靚,我細個時都喜歡聽佢D歌,況且細個時我又冇咁睇樣貌喎,但我就本身好憎林海峰,今次佢咁大feedback,應該多左人憎林海峰收埋彭羚,kaka~
我平時唔睇演唱會的,是見傅珮嘉在微博講WYMAN開show加場,即刻約左同樣喜歡MAGGIE的朋友買飛睇,才是我第1次真正睇演唱會,因為見到佢有齊我想聽的KELLY,CANDY,ELLA,點知我睇11日晚那場,朋友討厭的JOEY出左7首,都算你,知你每晚都有,但犯眾憎的TWINS竟然有5首,仲要講野!!激到有人大聲說侮辱說話,完場也聽到有人鬧,朋友那晚一看完已說想回水,跟朋友說起又說我那場該是最弱那場,家陣好後悔,好在唔係睇$4XX位,唉...
這樣的演唱會,每晚嘉賓不同,看足咁多場都抵,夠驚喜,我驚喜開場有shine (但見到你睇12日晚佢地唱兩首!!)好靚聲,吳浩康和話自己是第一次在紅館唱的周國賢,即刻全場掌聲,encore部分有蘇永康唱"那誰",即刻想起陸永首"雕那誰"(你聽左未?超正!),陳奕迅竟然唱stephy首"不要離我太遠",唱"超人的主題曲",仲要唱埋話是小克的改歌詞版,正 (該晚小克的微博給很多人@他,因為我是其他一個,然後立即澄清了不是他作 - http://weibo.com/1730042223/y56CWBPi1 ) 可惜我去了那場是驚嚇law...
身邊朋友都說想睇陳潔儀,但我又係唔鍾意佢,個樣太串,又唱得唔好聽,所以上次冇睇趙增熹,今次有他都唔去看了.
笑哈哈
我都睇左兩場! HOHO 第一同三場(買果陣係尾場)點知今晚尾場有楊千嬅!! 同姑ENCORE給我愛過的男孩們!! 我好想聽!
同埋我記得當年蘭茜夫人廣播劇係2300播喎, 無0100咁夜~~~
蘭茜夫人劇場... 我當年就係聽完"向愛情出發"而成為咗sammi粉絲~
Domotoiceko,
我都睇過報導話林海峰當年見到彭bell後一見鍾情...我當時心裡只有4個字: 匪夷所思! 後來我明白...各花入各眼, 感情呢樣嘢, 從來都係好主觀o既!
我d friend仲抵死, 話李蕙敏成個package令人諗起搞住一鍋熱湯, 有d煙升上來的巫婆...驚驚!
Re: 彭bell vs 李蕙敏 + 女人愈老愈吸引
agree...所以都好講一個人的心境! 好多事都在乎主觀的心情多於客觀的事實...當然, 心境呢樣嘢最難控制, 我都學習緊!
溫哥華匿名人,
咁我相信amanda除咗黑仔之外, 有d嘢亦係性格造成, 當然, 佢o既性格可能因為佢o既童年遭遇...哎...!
"戀愛1/2"當然記得有Wyman啦...係佢同amanda"訂情"之作! 不過其實呢個劇我無咩點聽, 因為當時超頂唔順阿王同彭bell的超級chok聲! 反而之前o個套"初戀無限次"就勁like!
笑哈哈,
哈哈...我初時話去睇我d朋友都笑我...點知最後佢哋呻笨!
個show最掂係場場唔同嘉賓, 你估佢唔到, 有驚喜! 睇幾場都唔會悶! 但twins就!
尾場除咗有彭bell再現, 仲有丁太...同埋吳君如添...佢哋唱番"初一十五"...haha!
吳浩康的"洗剪吹"我鍾意! 可惜佢唔自愛!
陳潔儀我又唔覺得佢串, 不過坦白講有d位係悶, 雖然佢真係唱得好好!
m@linxism,
我真係幾得我係聽到1點(at least)再踩埋落"翡翠音樂幹線"先瞓! 係咪11至1呀?
吳浩康我好鍾意佢第一首『先入為主』,wyman介紹他時說有個歌手(or朋友,i forgot)常去探監,說聽到現在監獄的人是唱『是我做錯,是我做錯,是我做錯』,但他當晚唱『洗剪吹』
joey唱歌ok,講野都覺得佢有努力過,改善左,但twins唱歌唔得,講野更加唔得,仲要個名臭晒嘛...
笑哈哈
"先入為主"又係得!
彭bell泊個好碼頭？唔否認，林海峰應該係好老公。但係，彭羚根本唔駛老公養。大佬，80至90年代，最賺錢係唱歌出碟，最紅的歌星係有錢過最紅的影星好多倍架。
彭羚唔係最紅，但佢碟係異常咁賣得，因為唱得～
我係「彭羚」原教旨主義者！
我兒童時唱歌的係羅文、張德蘭，小學畢業時係阿倫同張國榮。但我從不迷戀佢地。因為我中學年代就係學友，仲有彭羚。
但今日係咩歌手？
有個得20的後生女竟然話好開心聽到彭羚。佢話佢兒童年代就係聽彭羚、周慧敏、王菲，那亦是她聽最多廣東歌的年代，所以她只喜歡這些歌手。之後的已經無法吸引佢。
哈哈, 依家嫁到個老公唔去滾唔駛你憂柴憂米可能已經算偷笑O架啦!
發佈留言
<< Home