1-3(tues) 郭富城舞臨盛宴世界巡迴演唱會2011 + "那些年, 我們一起吃的男孩"…
其實聖誕期間已經去咗睇城城演唱會, 但一直未有時間寫…加上“天與地”的震撼, 大家都唔得閒講其他嘢住喇!
舞台皇者的確係舞台皇者...舞台表現無人能及! 同埋睇得出佢真係好賣力...幾廿歲人仲彈來彈去...但如果佢可以講少幾句佢o個d招牌式死唔斷氣的自戀說話會更佳...:p
城城基本上都已經唱晒所有經典快歌咁滯, 除咗“雨中感歎號”等幾隻! 但係經典慢歌就真係大部份都無唱…尤其我最喜歡的最舊幾首“到底有誰能夠告訴我”同埋“我是不是該安靜的走開”…同埋佢d新慢歌真係唔多掂! 不過整體o黎講, 都真係一個高質素o既演唱會o黎o既!
個台…的確係型…無得頂!
舞台表演…的確係無人能及阿王!!!
繼續延續“天與地”的震撼…就係睇完呢幕第28集”年少無知”作詞一幕…更加鍾意咗呢首歌! 好感動啊! 不過呢, 陳豪o係度唸詩咁o翕d歌詞時…令我諗起“洛神”o既曹丕囉…hoho!
其實大結局除咗rock fest之外, 鼓佬最終為咗救小”家明”而犧牲性命, 仲有最尾的呢段”平行時空”亦真係令人好感動 (亦令人諗起另一套神劇“我和殭屍有個約會”的結局)…睇到個心係咁la住la住…人生之中, 有幾多個選擇係令你後悔? 如果, 當初你無作呢個選擇…今日, 又會係點呢? 如果…可以返轉頭...如果, 一朝醒番一切都係幻覺…如果, 命運能選擇你話幾好! 可惜…呢個世界係無如果………..
我依家由第一集開始重睇番呢套“神劇”…睇咗幾日已經睇到第17集…比平時慢好多, 因為無得飛o黎睇不特止, 仲成日要rewind番慢慢咀嚼每一句對白…真係好有意思! 每一part都好inspiring…好值得咀嚼! 因為一個決定, 改變咗你一生…有人內疚一世, 有人逃避, 有人進一步作惡去cover up之前所作o既惡…真係好警世!
其實, 每個人一生中都可能食過一個甚至多於一個”家明”…令到日後o既生命完全改變晒! 因為一個決定而改變咗生命…所以, 呢套劇其實會令人好有共鳴…只係大家想唔想去面對, 想唔想去反思咁解啫!
Btw, 我想話鄭子誠做o既何sir幾搞笑…同埋阿yan呢個角色真係幾慘! 仲有, 金燕鈴做得好抵死! 仲有仲有, 套劇d時空交錯真係做得好好, 可以接得咁好真係好犀利…好有heart…令到要帶出的意思更加出! 仲有仲有仲有, 用beyond的歌貫串, 更加係錦上添花!
Wahaha…”那些年, 我們一起吃的男孩”…內地網友真係創意無限! 講真, 你愈禁佢咪愈想睇! 仲要已經睇到大半喇喎…點禁呀?
仲有…依家我“gur”親扒都諗起家明…點搞? Hoho!
同埋, 我好想問…點解黄貫中同黄德斌會係30多年老友?
“黄德斌原來有份扯線搵Paul唱主題及演出成年版家明，可惜《天》劇最尾一幕拍攝時，阿Paul檔期未能配合阿佘檔期，TVB最終因為要遷就阿佘而放棄阿Paul。黄德斌亦感可惜：「不過個期就唔到真係冇辦法。」”
嘩…如果阿paul真係可以演出成年版家明…咁又真係perfect喎! (仲有, 其實周國賢都同家明好似樣…搵佢做成年版都ok! 不過佢兩個現實中好似差唔多年紀!)
呢幅相令我諗起”淘氣雙子星”囉…hoho…
同埋, 我唔知道佢哋原來叫sober band…幾時改o架?
posted by 芒姐 at 11:58 下午
14 Comments:
芒姐你"重睇"的意思係之前已經睇過晒咁多集"天與地", 依家再睇多一次, 定係之前冇睇開, 見人人都話好睇, 加上MyTV又有得睇番晒成套, 所以先由頭睇起?
因為我好想知有幾多人係第七集(This city is dying...)之前已經有睇, 又有幾多人係因為網友激讚, 大家口耳相傳之下先半途開始睇, 又有幾多人係只係睇咗大結局而感動先上MyTV睇.
點解黄貫中同黄德斌會係30多年老友?德斌細佬係幫beyond做地下音樂會既時候整頭髮既,所以一早識左
而家都好想重睇天與地,不過一輪假期後未有時間做呢樣野,反而又回復食住飯睇(其實係聽)師奶劇...
經過呢次天與地之後,真係覺得而家好多戲都係廣播劇一樣,聽已經得,唔洗睇,唔洗諗,會將內心諗乜都講埋你聽...
同埋做乜郭羨妮,胡杏兒,黃智雯佢地會做哂師奶架,好似做老左10年啦,不過暫時反而係最新最嫩既黃智雯做得幾好,冇包袱,今年飛躍希望比到佢
為要重溫"天與地"，我選擇放棄果兩套新劇！
我都覺得黃智雯做師奶做得唔錯，有別以往既演繹。佢有做功課，學足師奶講嘢既口吻同埋嘴臉。
我覺得黃智雯係近兩三年新紮女演員中最有潛質既,形象健康,做不同類型既角色都得,拎唔到女飛躍(俾左唔多識做戲同埋講對白都怪怪地既馬賽拎左)都戥佢唔抵呀。
淘氣雙子星...哈哈...星宇同宙仔嘛
溫哥華匿名人
繼天與地結局出現fb洗版後,今晚勁歌總選後都係,"出現一首拉低歷年金曲金水準的歌","少有地有歌手第一次攞神檯獎而冇驚喜,只是呆","英皇分獎禮",等等comment不絕,只能無言...
tvb仲有幾多個年度大show keep得到(稍)高水平?
保良,東華,港姐,台慶,總選等等水準都似乎低處未算低,越來越縮皮,今年連一年一度聽到利孝和夫人公佈結果都冇埋,係咪時代變了?
re點解會由頭睇...正如我上一個entry所講, 之前係睇咗頭幾集, 跟住之後o個d就得閒larp吓一集咁, 但我一向會錄晒所有劇集, 所以到第廿幾集時就決定要認真地由第一集睇番咀嚼番!
我不看mytv的...我好麻煩, 整係鍾意o係tv screen度睇劇集! hoho!
係呀...一向好buy黃智雯! 馬賽真係練好d咬字先啦!
yeah...查星宇同查星宙同學!
鍾意追晒"天與地"喇...真係一套極有深度的劇...仲要每次睇都有唔同感覺!
哎...tbb又再次玩林峰! 真係每年都要玩佢一鑊!
咪係...利夫人去咗邊? 我等緊佢宣怖金中金o架嘛!
匿名：
我係TBB播到第五集後，聽到口碑好好，就即刻上MY TV追返頭五集，然後由第六集正式跟住電視進度睇。而我好朋友就應該係由第一集開始追(其他朋友就直頭無睇過), 另有一名親戚係大結局後聽到全民激讚，話想上My TV由頭追返...
我都覺得黃智雯做得好好，不嬲都好BUY佢, 佢失落女飛躍時，我都好失望。希望佢下年有獎啦~
雪人
發佈留言
<< Home