11-28(mon) 陳浩民+馬德鐘+陳嘉桓之"餓狼傳說"~~~

嘩! 呢期忙到連台慶我到今日都未睇番…睇完先一次過講!

"法證先鋒III"…我睇到第十幾集…追得好辛苦! 仲未睇到黎耀祥同張可頤一齊…但黎耀祥同胡定欣+張可頤同陳展鵬呢兩對外型真係超唔襯…成件事係咪為咗造就兩個主角o係埋一齊?! 要胡定欣做個十歲女媽咪…完全無說服力! 不過d個案反而幾好睇…"天眼少女"啦, 周志文周志康o個幾單都ok有趣…但係周氏兄弟真係要練好d廣東話…鄉音太勁, 有時唔望住個電視, 真係聽唔清楚佢哋講咩!

"結．分@謊情式"larp過幾集...但暫時真係一d興趣都提唔起!

"萬凰之王"進入尾聲…呢套我都想睇吓…但追唔切! 點解套套劇都有胡定欣? 但佢又真係上極都上唔到一線喎!

至於"天與地"…拍咗兩年終於上喇…其實點解要擺咁耐先播? 連有份拍o既大閂生陳鴻烈都唔o係度咗兩年喇! 不過成個setting同個班底都勁"珠光寶氣"…演員陣容係無咗黎姿同蔡少芬又多咗佘佘囉! 不過內容可能有d唔同o既!

"劇集開播前已在網上掀起討論，有網民指劇情有影射香港殿堂級搖滾樂隊Beyond之嫌。林保怡、陳豪及黃德斌的角色同為樂隊成員，三人聯同一名好友於18年前（劇中年份為1992年）到中國新疆省天山旅遊，最後只得三人回港，這設定與樂隊 Beyond 於1993年（即此劇播出的18年前）的遭遇十分相似。而角色方面，陳豪的角色有一個親密女伴，又愛打泰拳，像黃貫中一樣；林保怡與陳芷菁像黃家強與日籍妻子；黃德斌的角色則像葉世榮，同樣喜愛玩搖滾音樂。劇中演員陳豪被問及映射一事，他稱自己不知道黃貫中喜歡打泰拳，指劇集本在2010年播出，並強調劇集探討的是人性。

劇集播出3集，觀眾反應呈現兩極。有觀眾指劇集敢於創新，大膽以「人吃人」作題材。不少網友表示稱道《天與地》清新自然、唯美動人，年輕演員氣質吸引，時空交錯的拍攝方法，加上優美的配樂，文藝片式的推進，具有非一般TVB師奶劇所有的感覺，口碑載道。而年輕網民更盛讚此片是突破師奶橋段的上盛之作，内裏通過長鏡頭、唯美配樂所塑造的戲劇氛圍，十分清新，飽受好評。

不過部份觀眾看不懂劇情想表達甚麼，認為劇集節奏過慢。不少網友感到畫面意識令人嘔心及反胃，部分則說鏡頭未如預期中驚嚇。廣管局接到8宗投訴，指內容意識不良，教壞青少年，不應在黃金時段播放。不滿故事講述人食人事件，劇情恐怖，太多血腥場面，令人不安。"

係咪影射beyond我就唔知, 但背景的確有d似! 不過呢期未免太多呢d人食人故事…前幾日去law soc活動同d年青人探討法律/道德/倫理…又係有個食人故事…d青年人仲同我講話先前先唔知o係邊度睇過另一個食人o既故事…呢期未必太多食人橋段...撞晒!

"超級巨聲3"終於終極決戰埋…我完全唔知係o個一日! 個勢好似比起巨聲1,2差好遠! 不過個賽果幾合理…廖sir係唱得最好, 但要走紅我諗都係阿jay同譚嘉儀機會大d! 仲有坤哥真係幾cute…我撐佢! 同埋佢唔戴眼鏡其實幾靚仔! 雖然戴眼鏡傻傻地又可愛d…難怪咁多女fans buy佢!



陳浩民+馬德鐘+陳嘉桓o個單"餓狼傳說鬧劇"真係愈搞愈鬧…o個兩位男士當然就唔係好人o黎o架喇…前科一大堆唔駛講! 至於o個位成日口口聲聲話自己"小妹妹"的19歲"小妹妹"阿rose (sorry, 我想話呢個名好70年代…好難想像一個90後會叫rose…:p), 從d相睇…你話佢係完全唔願意…我又真係唔係好信! 娛樂圈可能呢d真係好平常…同埋佢同馬德鐘o個時個樣好似幾冧! 查實呢…如果唔係show晒d相出o黎, 我相信佢未必會走呢個咁"受害者"路線...不過都無所謂啦…一場鬧劇! 俾多d茶餘飯後的話題大家!

但係最大問題係…馬德鐘的推卸責任同埋陳浩民的浮誇演技! 除咗照稿讀之外, 演技亦過份生硬, 仲要勁over…係咪拍太多大陸劇需要呢種演技? 嘩, 難受到呢! 之後仲要懶係喊到抽搐企唔穩…要個大肚老婆扶番佢轉頭! 無論你係真喊定假喊, 根本就唔應該喊…錯晒! 博不到同情不特止, 仲乞人憎咗! 好可怕…佘詩曼&葉璇甩咗佢…真係執番身彩! 江山易改…品性…是不會移的!



weekend去咗九展睇丁太楊千嬅的"Minor Classics Live"…雖然個場我好唔buy, 亦雖然佢今次主力係唱d冷門歌, 但居然好睇過佢啲大路演唱會喎…我雖然十九幾年前曾經係好忠實的粉絲, 但都唔忠咗好多年, 所以好多佢d side tracks都唔識…但即使d唔識o既歌…都真係幾好聽喎! 所以之前d人成日話, 點解楊千嬅又唔算好靚, 唱功又麻麻, 但都可以咁紅…其實最大原因係佢遇到一jar好歌, 仲要d詞填得好到肉, 同埋華星成個packaging做得好好…佢初出道o個幾隻碟, 隻隻都有主題有話題, 靚到你唔買都唔得…成件事配合得好好! 所以令佢可以平實地彈出(?!)…:p

同埋佢d唱功真係進步番好多! 真係好神奇…佢做咗丁太之後, 真係樣樣都順番晒…正如佢之前訪問話, 一個女人有愛情滋潤, 真係咩都無咩所謂, 反而樣樣都好順利! 佢有一期真係跌咗落谷底, 歌又唔得, 唱功又唔得 (係…不嬲係唔算好, 但o個期係差), 樣又唔得, 仲要成個人腫晒…好灰! 但依家無論身型樣貌都good fit番, 連唱功都可以好埋…成件事好神奇…好過去祈福轉運!



仲有…有日路經呢度, 覺得好似曾相識…原來係當年"我本善良"的拍攝現場…伊明屋企樓下…hoho! 廿一年了…又keep得幾好喎!