2006年5月17日星期三

5-17(wed) 真係女人唔易做+女兒紅

“女人唔易做”o個個一連兩個鐘大結局再加個特輯…仲要拍兩個版本o既結局 (但係兩個結局其實無咩分別…第二個結局再比較說教d, 臨尾好娘咁講句:“其實女人都唔難做呀!”…真係好娘! 咁我寧願第一個結局喇!)…實在係拖得太長, 有咁長得咁長…有d悶囉!

唯一好睇之處係搵dodo姐做主持訪問幾個主角…上次“娛樂直播”訪問鄧萃雯, vinci話覺得佢個感覺好似do姐…雯女話係呀, 佢一入行拍“開心女鬼”, do姐已經做佢家姐, 劇裡面仲要模仿佢添…廿年後再睇佢兩位娛圈女強人o既典範拼埋一齊, 個style真係幾似…兩個都好掂! 都係o個句: 搞到人好想睇番“開心女鬼”! 同埋, 我睇好鄧萃雯拿今年“最佳女主角”獎!

真係唔明點解無線d戲永遠都咁“虎頭蛇尾”?! 上次“天幕下的戀人”係咁, 今次呢套又係咁…兩套都開得幾好, 頭十集好吸引…但一到尾段就亂咁o黎…真係令人失望, 亦都辜負o左我力追o左佢o地咁耐! (so what?! 聽聞結局o個晚最高收視41點…哈哈哈! 無論後期點爛, 大家一開始追開又點會唔睇呀…包括我本人!)

最大敗筆係太刻意去講“女人”呢樣o野…我知, 呢個係全劇主題, 但係有d over左! 好刻意去講女人要靠自己, 離婚都可以活得更好…係…係事實, 但太刻意去突出呢一part…有時顯得過份突兀! 仲有徐子珊扮溫柔o個一part…我打o左十個冷震…好核突!

更難頂crystal問小齊點解唔鍾意佢但都同佢拍拖…佢居然話因為crystal仲硬頸過佢, 講佢都唔會聽, 就同佢拍一次拖去證明俾佢睇佢o地係唔work o既…oh, 咩劇情o黎o架?! 咁都寫得出? 仲要佢特登做衰人等全世界都鬧佢憎佢…用意係感受o下高ling俾人揭發佢無bb時o既冷嘲熱諷o個種難受喎…有d咁o既劇情, 就真係實在太令人難受喇!

仲要完o左之後再整個“真係女人唔易做”討論環節o係度discuss埋d無聊o野…最尾再tag去下個月上o個套“男人之苦”…真係一個好核突的tag! 5月母親節就整套“女人唔易做”, 6月父親節就上套“男人之苦”…原來係一個package…不過套“男人”好似差好遠! 仲要有已經不大buy o既吳唱k, 同埋上年我話睇好佢但不停俾人笑到面黃o既toby梁靖琪 (但近半年已唔多buy佢)…好唔吸引囉!



tvb上年有隻“男人魅”, 今年就整隻“女兒紅”…呢排睇電視已經開始宣傳, 但係一睇排場, 同上年真係差好遠! 得千fa一個lead住兩塊cookies (stephy+kary), 再加幾個無線花旦 (都只係得佘佘一個可以叫一線, 胡杏兒同廖碧兒都係新?花旦…仲要搭多兩個可以叫新人o既鍾嘉欣同埋楊秀惠…再加一個都唔知點classify佢o既陳敏之 [我覺得話佢係三線都有d俾多o左佢…同埋佢d懶音真係令人好難受…難怪鄧萃雯都要點名批評佢!]…cast真係同上年“男人魅”差好遠遠遠遠遠…!

舊年“男人魅” o既大牌歌星都有克勤同eason, 仲有過氣o既伊面…而藝員方面, 林峰+吳唱k+鄭嘉穎都叫做當紅呀, 再加個林保怡, 林文龍…oh, 仲有差d唔記得o左o既陳豪…仲有九唔搭八o既鄧健泓…男女cast無得比啊! 點解今年會搞成咁?!

同埋我真係唔係好明點解d人會話廖碧兒唱得好?! 雖然我幾buy佢都係咁話…佢係進步o左, 但點能夠話佢唱得好聽呢?! 我覺得成隻碟唯一吸引相信係千fa隻“女人唔易做”插曲 有過去的女人”…因為配埋套劇真係好o岩feel!

仲有, 點解阿一級豬楊思琦小姐明明唱o左隻騎呢 “馬戲團”歌o架嘛, 點解呢隻 “金牌女兒紅”碟會無佢份?! 雖則我唔喜歡佢…但我都覺得好奇怪囉! 反而連楊秀惠都有而佢就無!



Btw, 上個禮拜o係pp見到“飯tastic巴巴閉”個細孖衛詩…前額真係好似脫髮脫得好嚴重喎…作為一個藝人, 尤其係女藝人…都幾大鑊!

不過講開又講, 我覺得佢o地唱片公司將呢對twins分開兩年o黎捧係好聰明o既策略, 等大家接受o左個家姐可以順手接受埋個妹…反正佢兩個都一樣樣 (我暫時都分唔清佢o地邊個打邊個…即係如果兩個並排我可以分到, 因為通常都會特登有唔同髮型唔同形象…但係如果是但一個走出o黎接受訪問, 我真係分唔出! 尋晚“無間音樂”訪問衛詩, 我初頭都以為係衛蘭…把聲同語氣都一樣)! 最正係可以幫唱片公司連續兩年larp晒d新人獎嘛…反正你buy左個家姐, 斷估唔會太憎個樣同埋把聲都一樣o既妹o卦?!

11 Comments:

Blogger Automne said...

其實兩個結局尾都有“其實女人都唔難做呀!”呢句...
只不過一個係鄧萃雯講一個係吳美珩講渣....

6:36 下午  
Anonymous 鄧塔 said...

唉唉~~我都覺得最尾0個part太刻意啦,講句咩其實做女人都唔係好難?~~~實在係一大敗筆~~
哈哈,其實徐子珊都算慘架啦,結婚0個幕連個樣都無得見下,其實她選港姐時我都真係幾buy佢,都望佢win,唔知點解而家搞成咁~不過,even佢咁,我都buy佢多過阿思琦姐~~
唉,雖然呢個咩飛短留長父子兵有鄭嘉穎,但女主角方面就真係有點兒那個啦,陳敏之係除?楊思琦外另一個我點都唔buy的代表作,搞到我零意慾想睇~~
芒姐有無睇過《野豬大改造》啊,真係唔錯架,而家亞視逄星期六八點半播,得閒可以睇下啊~~~

6:39 下午  
Blogger 芒姐 said...

鄧塔,
無睇過《野豬大改造》呀...係咩o黎o架?! 韓劇? 卡通片?!

"飛短留長"睇o左幾集都ok o既...不過d女角真係...sorry晒! 陳敏之真係懶音王表表者, 同埋佢個款做極都無女主角feel! 仲有, 好懷念"天涯歌女"年代o既松松姐姐...好fresh, 演技亦很自然...依家就...

徐子珊選港姐時真係掂o架, 個樣ok, 對答ok, 又跳得舞, 又幾有大將之風...我真係唔知佢整咩跌watt跌得咁勁?! 簡直係譚小環第二!

12:34 上午  
Blogger 芒姐 said...

automne,

咪就係太刻意去sell"女人其實都唔難做"囉..我覺得太刻意喇...你話係咪?!

12:35 上午  
Anonymous 小茵 said...

我近排冇乜留意d新聞,想問下點解好似咁多人都唔係幾鍾意吳唱k既??

1:55 上午  
Blogger 芒姐 said...

其實我都無咩研究過點解佢忽然咁不受歡迎...如果有人知可以話過我o地知!

我個人認為可能因為佢忽然間起得太快, 初期d人都比佢o地"美貌"吸引, 但逐漸發覺佢都頗"流", 唱歌唔得, 跳舞唔得(以dancer出身的standard), 做戲做來做去都係幾個表情, 除o左d魯莽青年就無咩可以勝任...所以"物極必反", 一下子捧得佢太高反而害o左佢! 以上純屬個人見解!

2:00 上午  
Anonymous 鄧塔 said...

《野豬大改造》係一套日劇來架,主演:龜梨和也、山下智久、堀北真希~~故事中的主角桐谷修二(龜梨和也 飾)處事圓滑、善於與人相處,同班同學草野彰(山下智久 飾)則有錢又吊兒郎當,他們看到轉校生小谷信子(堀北真希 飾)被欺負,決定聯手把陰沈的信子改造成受同學歡迎的人…

我覺得係一套幾有意思的日劇(聽聞都?0左唔少獎),總有一d令人深思的地方,追開就有欲罷不能的感覺,哈哈~值得一睇架~~

12:22 下午  
Anonymous 小茵 said...

我突然諗起之前睇返無線重播果套…唔記得乜名,林保怡同郭可盈主演果套呢?好似做警寫的,首主題曲仲係林保怡自己唱既。 吳唱k都係裡面做過一幕咖哩啡架?? 得一兩句對白果d,係完完全全地唔起眼果種。

冇咩,都係突然諗起,呵呵。

8:08 下午  
Anonymous tfil said...

吳唱k有時講野都幾冇品, 好似佢拍[學警]有場戲同楊怡kiss, 就話楊怡個嘴有毛; 被人影到同居就話個女仔係佢工人; 有次上[東張西望]又話拍kiss戲會等登食魷魚絲整臭個口先咀d女藝員, 仲話toby"把口又唔係香!"...其實佢唔使食魷魚絲把口都已經夠臭啦!

小茵,你講既係[男人心一字馬]?

8:30 下午  
Blogger 芒姐 said...

林保怡同郭可盈o個套應該係"智勇新警界", 我都有見到唱k做茄喱啡, 仲有"烈火雄心2"都有, 佢做歐錦棠d唔知師弟定徒弟, 都有兩句對白...但不出兩年佢就已經o係"衝上雲霄"做主角!

當初"智勇新警界"時, 佢個最佳拍檔楊怡都叫做女主角呀, 佢算係咩o者...起得快就巴巴閉閉咁! 不過話分兩頭, 我相信佢o個d"楊怡個咀有條毛"同埋"toby口都唔係香"都係講笑o者...但作為一個男士, 講呢d o野應該小心d!

12:42 上午  
Blogger 芒姐 said...

鄧塔,

好啦, 如果我下次記得就睇下你推介呢套日劇啦!

12:44 上午  

發佈留言

<< Home