7-21(sat) 2007年度香港小姐

無聲無息之下, 又選完一屆港姐…真係搞到咁無人睇/無人重視/佳麗質素創新低o既地步, 下年會唔會cut左呢個節目o架?!

點解d佳麗真係可以咁醜樣? 細個時睇港姐都唔係咁o既…我諗依家靚女真係唔會想選港姐拋頭露面, 因為要入行或者出名都有好多方法, 以前香港d靚女無咩選擇, 唯有參選港姐…依家如果你身邊有朋友話想選港姐, 我估會俾人笑多過欣賞佢囉!

張嘉兒得冠軍就真係爆大冷…佢係幾大方得體, 但個樣真係唔太得, 普通過普通, 完全無冠軍相…到後期我都係估佢應該拿亞軍, 因為三甲之中總有一個係呢種大方型但就樣麻麻o個隻…佢同王君馨調轉冠亞軍名銜就ｏ岩喇! 報紙話張嘉兒係“圓面黃宇詩” …真係好鬼貼切…一路睇都覺得佢好似一個人, 但係又o翕唔出! 我覺得王君馨似98年o個個亞姐樓茜妮 (佢當時選完又俾人話佢係大陸版韓君婷)! 季軍“大口陳慧珊”周美欣都可以接受o既, 某d角度都ok, 但大部份時間都有d怪, 個口太大…同埋年紀太細, 明知一定唔會拿冠軍! 三個都係鬼聲鬼氣…證明依家要獲選港姐, 都係要去外國住番三五七年好d…!

大熱門“少女版黎姿”何傲兒大熱倒灶…其實係非常foreseeable o既…年年都總有一兩個大熱連五大 (or even十大)都入唔到…大眾認為靚, 評判又可能認為cheap呢! 其實佢除o左一開始被捧到上天之後, 一輪負面新聞, 再加埋個image都麻麻, 身材其差, 應大得細, 應細又得大…如果係大晒或細晒都叫合比例d呀…唔知點解佢唔執o下先去選港姐? 仲要忽然間連塊面都包晒, 好似水腫咁…跌晒watt! 所以話, 唔係最佳狀態真係唔好立亂去選美, 本來著衫遮遮掩掩都無人睇到, 覺得佢好靚女…一走去選美要著三點式, 咩缺點都俾人睇晒啦!

同埋佢對答都好唔得, 仲話理想係做個成功律師…哎! (btw, 一開場班佳麗o既什麼“志願”真係好唔該晒…年年都係講埋d幾無聊又假到爆o既o野…又悶又無娛樂性, cut左呢part吧啦!) 何傲兒成個感覺/風範…都真係幾無大將之風, 可能年紀太細, 其實佢應該過多兩三年先o黎參選啦!

原來, 美貌同智慧或身材…真係好少會並重o架!



至於舊年o個三位得獎佳麗…都又真係好唔得! 係謎女郎呂慧儀好樣少少, 周家蔚勁唔靚, 陳茵媺就成個感覺, i.e. 無論個樣定身材定都好假, 仲有佢d廣東話真係無比奇怪…就算係其他o係外國返o黎o既佳麗都無咁怪o既!

成個節目又勁悶…嘩! 連講環保都可以成為問答環節…真係緣來自有機喇! d佳麗已經咁o既質素, 仲要整ｄ咁悶環節…都唔知想點?! d咁既環節都諗得出, 真係只可以送番佢o地呢排o既力推節目俾佢o地…最緊要進步! 港姐除o左佳麗質素外, 節目內容本身都真係最緊要進步囉!

仲有o個個什麼“空中行catwalk”環節, 係就係幾有新意…但就十分九唔搭八, 唔知想點, 亦唔知有咩意思…更加唔覺得有美感, 同“勁歌”一樣, 似馬戲團多d!

今年港姐司儀終於唔係amigo喇…不過就係另一個tvb呢期力捧o既主持森美, 港姐佢又有份, 一叮佢又有份, 勁歌佢又有份…又係咩都有佢份! 無綫永遠都係呢期捧開邊個, 就咩都俾晒佢做, o黎一個over exposure! 不過點都好過貽興王o既, 起碼森美口才同急才都ok, 佢今次做港姐司儀都不過不失!

至於今年o既表演環節都算係最慳水慳力o既一屆…幾乎係表演o左都無人知, 以為係其中一個短環節…居然係志偉+阿叻+近十年十位港姐出o黎行o下講兩句就算…平時隔幾年都會有呢d環節o架啦! 仲要係近十年咁近, 都可以每屆都搵唔到一個, 要05年出晒三個先籌夠10個…好唔掂囉! 阿狐妮個樣真係好殘, 哎…緋聞真係害死佢!

oh…都係睇番以前d香港小姐吧啦…


2006香港小姐


2005港姐謝師宴


2004香港小姐


2003給香港小姐


1994年度香港小姐選舉


1993年香港小姐


1991香港小姐選舉