4-10(sat) 志明與春嬌~~~

“n 55!w !”~~~哈哈哈哈!!! 有睇“志明與春嬌”o既朋友就會明白我講咩…呢個真係好得!

我終於睇o左"志明與春嬌"喇...fb好多朋友都話好睇...果然名不虛傳! 好多個位都會令人發出會心微笑...好地道, 好有香港獨有文化…係近年少有o既正片…抵佢場場爆! 我仲要連第一行都照睇 (可惜唔係演唱會)...未免太落力! 真係為佢獻出o左o係戲院坐第一行o既第一次囉~:p

本來上兩個禮拜已經想睇o架喇…點知佢居然無咩戲院上正場, 可能因為佢無啦啦被列為3級片 (好似話因為有大量粗口同埋主題講食煙~~?!?!?!)又要係復活節檔期, d戲院驚少o左一半觀眾o卦?! 不過其實呢個世界一向都係你愈“禁”就愈要睇o架啦…物極必反嘛! 你咁樣唔俾d十八歲以下青少年睇, 佢唔識買碟/上網睇咩?! 同埋佢o地食煙講粗口可能仲勁過你同我啦…真係無鬼聊!



佢唔同話“72家租客”o個隻賀歲片爛gag引o下你笑o個種, 而係真係會令你會心微笑o個隻…係有d計! 難怪有n個朋友o係fb都話堅好睇…相信佢呢隻style係我o地呢個年齡層的人係好buy o既…勁多人加入o左呢個“志明與春嬌 LOVE IN A PUFF”group…好少見d朋友會咁一致地鍾意同一樣o野! 可能真係因為劇情好寫實, 好有共鳴…好似睇緊身邊o既你同我咁! 有邊個會無send過o個d咁o既sms呀?! 雖然內容可能無聊, 但總之就好係你同我~~~

哈哈哈...搞到我係咁send"n 55!w !"俾d睇o左呢套戲o既朋友...感覺自己好“潮”~~~wahaha...好無聊! o個d港式英語sms…咩“感動ing”…真係好地道…係香港人先會明! 查實佢個“n 55!w !” sms係咪興o左好耐?! 係我"背"定係真係呢期o既潮o野o黎呢...?!

d對白都ok啜核…咩“去街口交台費~~~”, "DA ME SMOKE", 仲有"4個6~~~"o個part都好好笑...同埋點解有shine o既徐天佑客串呢?! 仲有原來做“公公”o個位係著名舞台劇編劇+導演司徒慧焯…幾年前atv重播“藍月亮”時, 有朋友話過我聽原來佢係飾演男主角羅頌華損友三人組其中一個四眼同學o個位…真係唔講唔知!

今次千嬅同余文樂都做得好好…連d配角阿方皓文, 陸詩韻, even久違了o既繆菲臨都好ok喎…掂!

有好多朋友問我志明同春嬌& frds去唱k唱o個隻歌叫咩名...好熟好熟…唱得出但o翕唔出…返到屋企我終於搵到喇...係呢首"最後的玫瑰"...1986年電影《玫瑰的故事》主題曲, 主唱：甄妮, 作曲：林敏怡, 填詞：鄭國江…



最頂癮係有個秘書妹妹話佢睇o個陣一聽到呢首歌第一時間諗起我~~~點解會諗起我?! 唔通因為個感覺好八十年代~~~?! 咁又係好係我o既…真係“我是八十年代”喇! hohoho!

但其實劇情講佢o地o個jar人都係30出頭…應該大部份人都唔識呢首歌o架?! 我呢d係真實年齡同活o係o既年代唔相付o既人先會識o架咋嘛! 可能係彭導自己o既情意結! 聽番呢首歌又真係幾好聽…下次去唱k都要唱一個…:p

“志明與春嬌”真係近年最得o既戲…連我呢d好少鍾意睇戲o既人都覺得好得…寫得好到位…搞到我都想睇番彭浩翔之前d戲! 好少戲可以o係上o左咁耐之後仲o係友儕間不停熱烈咁討論緊...真係有d料到! 好融入生活...真正拍俾香港人睇o既小品...呢d先係"港產片" !!!


("志明與春嬌"trailer...btw, 千fa o係呢套戲靚番好多呀...:))