4-14(wed) 搜下留情 + 《Yes!!》一千期

呢期幾線劇最好睇依然係“女王辦公室”…得o個80集, 不經不覺已經做o左三十幾集…做到6月就無得睇lu! 呢套真係得, 每個角色都好立體, 仲要d劇情都幾抵死幾到肉又幾生活化…同埋d對白都…ok好笑! o個日睇“今日vip”何韻詩訪問, 話之後會同杜文澤發展感情…噢! music+leven…又幾搞笑! 我初時以為佢可能配阿k添! 馬賽配唱k好似有少少怪…不過是但啦! 同埋我想話呂慧儀呢期做戲同電視劇都做得幾好…進步o左!

上個禮拜套新劇“搜下留情”…睇o左少少…略悶o個批! 反而我一d都唔buy的劇種“鐵馬尋橋”又ok喎…兄弟姊妹情o個part幾好! 同埋唔知點解除o左我有睇, 身邊好多朋友都有睇囉…奇怪~!

“搜下留情”又係馬德鐘拍陳慧珊…令人諗起6年多前“衝上雲霄”vincent同阿bel…但, 已經面目全非! 陳慧珊真係老o左好多…同埋感覺師奶o左好多, 好似未修到身咁! 可惜! 哎…都話男女係無平等! 男藝員去到40幾50歲仲可以拍後生女做男主角, 女演員去到某個年紀 (除o左得天獨厚的萬分之幾個外), 個個都勁跌watt! 如果我係佢…其實可能寧願唔好復出, 留番個美好印象俾大家 (咁當然, 生活逼人無得講啦~)!

做佢個妹o既黃志雯, 上次o係“巴不得爸爸”已經覺得佢做得幾好…今次都唔差喎! 佢o係“東張西望”做訪問都ok…呢個應該有前途!



又係惡搞“真的假不了”的延續篇…前個禮拜蘋果有篇報導講《Yes!!》一千期…《Yes!!》的確係我o地個年代的一大icon…九十年代成長的青少年有邊個無買過一本yes!呀…有段時間仲係期期買添啦! 初時好似唔係個個禮拜出, 唔知1號, 11號, 21號咁…好鬼難記…但反而咁樣又鍾意睇喎! 其實都唔知睇咩…可能d明星相影得靚…仲有d爆料區, 同埋寫d o野夠賤啩! 有一期有個咩 “少年古惑”專欄我都幾鍾意睇o架喎!

仲有城市驚喜, 校花校草選舉…當然唔少得yes card啦…全部都好經典囉! 又係我o地個年代成長的人o既集體回憶o既一個重要部份! 噢…仲有yes idol!!!!


我o地個年代又有邊個年青人無睇過"YES!"(記住唔好漏o左個感歎號!)呀~~~?!


YES! IDOL!!! 咁佢又的確係比其他雜誌/報刊精美o既…抵佢賣咁貴都有咁多人買!

《Yes!!》一千期 假的真得了…

一刀切的「 80後」，最心有不甘的一群定是梗頸的 70後。把這兩個十年從 X和 Y兩端拉回一點，不一定 No而是《 Yes!!》。他們的學生時代，不約而同，讀的是《 Yes!!》、玩的是 Yes Card、蒲的是 Yes Station……難怪有傳銷量曾 KO壹仔，學生市場戰勝大人市場。如你，是當年學生，今日也成大人，《 Yes!!》也邁向 1000期。這份「城市驚喜」，比 20年後再見「城市驚喜」模特兒更驚喜。

記者：蔡俊業
攝影：梁細權、王文忠、蔡俊業

唐寧×魯文傑　懵盛盛青春留影

年前因舞台劇結緣的唐寧及魯文傑，原來兩位咁啱「後生嗰陣」都有幫「城市驚喜」做 Model，咸豐年前，唐寧印象依稀，「有次上《 Yes!!》影樓，幫廣告公司影相做 Reference，唔知佢哋有人睇咗就聯絡我媽咪，話想搵我影『城市驚喜』。」就係咁，在家長陪同下，還用真名江麗娜的唐寧就去到跑馬地影樓，「當日情況真係唔太記得，只記得有化妝，事前工作人員又攞咗啲日本 Model嘅可愛相畀我參考。」雖則唐寧於 1989年以 8歲之齡便入行做童星，但回想中學時代現身「城市驚喜」還是有點緊張，「因為呢本雜誌太勁喇，我知道會喺學校俾人瘋狂傳閱。」

魯文傑對那輯 18年前的相，印象更模糊，僅記得時為 1992年夏天，地點是尖嘴噴泉，架金絲眼鏡藍風褸……形容似拍維他奶廣告多啲喎？「邵國華就係喺我拍完呢個廣告搵我影。」想當年，收到《 Yes!!》邀請，感覺有點抗拒，「影男仔好似好怪！」唐寧卻慶幸拍過這輯相，「會記得自己原來 14、 15歲時係咁樣，會擺埋呢啲甫士。」

1.唐寧笑言這個 Baby Fat配 Sailor Moon麪包頭，可一不可再！重扮當年朦朧 Mood，「家嗰種攝影法真實啲！」



男城市驚喜　舊地重遊
當年唔少青春少艾現身「城市驚喜」，像 Isabella像徐子淇，都飛上枝頭變阿媽，可要找無名 Model難過爭普選，小記惟有漫無目的在網上瀏覽，竟然真係搵到 15年前影過「男城市驚喜」的彭紫霆。「我表姐之前影過，於是嗰年暑假就同 3位同學填 Form，結果得我入選。」於是阿彭也來到跑馬地影樓，再轉戰附近公園影相。「點知輯相出街撞正開學日，又咁啱當時轉新校，結果成班同學都識我，輯相又影得唔好，勁尷尬，唔明當年點解會影！」理由可能是天生吃這行飯，長大後曾任 Web J，現為電台多媒體工作。

千期八趣
1.創刊號

■創刊頭 6年幾乎清一色採手繪漫畫封面，周慧敏例外。 (芒按: 呢句精警!!!)
1990年 11月 20日創刊，創辦人倪震。初為雙周刊，後改十日刊，初售$10，至今仍只售$12，跑輸通脹。

2.城市驚喜
每周一靚女，其後更發展副線「男城市驚喜」

3. Yes Card
1991年推首輯 Yes Card，一張張約 2R相、背附歌詞的偶像紙卡，高峯期每月售 500萬張！周慧敏及楊采妮的夜光膠卡最搶。 1993年更於銅鑼灣電業城開 Yes Station，全盛期有 19間分店。

4.校花校草選舉

1997年首辦校花校草，設投票熱線一人一票，冠軍是港男袁偉豪（後右二）！ (芒按: 呢期我記得…呢本我仲有o係度!)

5.出賣朋友計劃
當年文宣寫明：只需寄一張相出賣朋友，就可得到另外一個被出賣者嘅地址，相左方有兩句打油詩簡介，如「傑文家住在沙田，玩起上嚟好鬼癲」。

6.千禧十周年
2000年，創刊十周年，由$13平賣$10，謝霆鋒當第 500期封面。

7.沙士後易手
受沙士影響，終在 2004年 4月正式易手。至 06年第 800期，一改沿用十多年的 Logo，感嘆號打孖嚟《 Yes!!》。

8.眾裏尋他

■集齊一定期數可睇到書脊全幅漫畫，還記得否？

互聯網未興前欄目《眾裏尋他》專識新友。熱門欄目還有《愛情急症室》解疑難、《 Miss Sex》教性知識、《 Yes！ Special》專題報道全港校服巡禮。

總經理：下滑正常

7個年頭、現《 Yes!!》總經理的 Rebecca感受甚深。「 Yes Card好成功，於是公司打算搞 Yes Station，主打文具精品，當時我負責搞呢條新 Line。」見證公司起跌，「創刊前坊間未有一本啱青少年睇嘅中性雜誌，有愛情信箱又有 Miss Sex講性教育，唔同家打開部電腦就有學生平台。」所以，她認為近年《 Yes!!》氣勢下滑是正常合理的事，「以前邊有咁多競爭！」而讀者也陪伴雜誌成長，「我收到唔少意見來信都係家長寫嘅。」 1000期將至，將有連串慶祝活動，「如構思推出復刻版《 Yes!!》，亦會揀過去最經典欄目。」
原來唔係一千期？

以為「真的假不了」定必千真萬確，今年《 Yes!!》 20周年， 5月 14日將出版第 1000期，可 Research期間，於維基發現雜誌曾於 1998年發生「跳期事件」：明明 11月 13日出版的是 315期，點知 11月 20日就大大隻字寫 400期，時空錯亂好詭異，發生咩事？ Rebecca透露：「當時公司內有傳聞，話啱啱上場嗰位新話事人好信命理，咁啱又有啲事發生咗，相士話『 3』字唔太利佢，於是就跳過晒所有 3字頭期數，之後就無再改過。」原來如此，所以嚴格嚟講， 1000期並不是真的第 1000期，呢件事，係真 o架！而真的事，落得有違陳總金句假得了，妙哉！善哉！