2006年11月13日星期一

11-13(mon) 2006萬千星輝頒獎典禮後記

話說我上個禮拜五晚出o左街, 所以錄起o左個頒獎典禮諗住禮拜六晚先睇…點知原來咁樣係唔得o既, 禮拜六未過到一半, 就已經不停有人o係我身邊講個賽果! 諗住盡量唔聽啦…點知連sms都出埋…真係避無可避! 唔知點解忽然間有咁多人睇o左台慶頒獎禮?! 我終於明白點解無線要將佢搬去禮拜五, 原來真係有佢o既原因!

以前我會特登為o左台慶推晒所有約會留o係屋企睇, 今年已經無o左呢個興趣, 更甚係因為我根本係到前幾日先知禮拜五無啦啦有個咁o既頒獎禮…所以完全無準備! 但係唔知點解今年反而有咁多人睇o左呢個節目囉…禮拜六食飯一圍[木台]八個人, 居然另外七個人都有睇到, 得我一個未睇…呢個情景實在太騎呢…真係我估你唔到! 亦都愧對o左“電視精”呢個朵!



講番個節目本身…講真, 真係超級悶!

完全唔知想點, 淨係一口氣頒晒d獎, 再加o左兩項騎呢到唔騎呢o既表演! 我到依家仍然唔明白點解要夾硬分開個頒獎禮o黎做…咁到真正台慶o個日咪仲悶?!

仲要阿do姐一日獨撐成個頒獎禮…真係戥佢辛苦! 上個禮拜先搞完翡翠歌星賀台慶, 今個禮拜又要搞頒獎禮, 下個禮拜又到真正台慶…咁多稿, 真係點背呀?! 想玩死佢咩!

o個兩個表演環節又係搞笑o既…首先係兩男兩女跳埋d怪舞…女o個兩個 (陳法拉+陸詩韻) 就跳得好好, 但係唔明點解要揀o個兩個男囉…佢兩個擺明係跳舞勁唔掂o架嘛…真係又係想玩死佢o地! 之前睇本雜誌仲o係度話黃德斌跳舞完全跟唔到beat, 幅相個caption仲話一對比起跳得“正中”o既馬國明, 佢o既遲鈍真係出晒o黎! 我睇完呢段真係忍唔住笑o左出o黎…大家仲記得兩年前睇“奧運六星”跳舞時我俾o左d咩comment嗎? 馬國明跳舞真係可謂咁多個之中最差o個個…“人舉手佢放低, 人放低佢又舉高…仲不停咁偷望隔離個人, 但係望完都仍然係跟唔到”…無線安排佢兩位跳舞…真係佢o地跳得辛苦, 我o地又睇得辛苦…佢兩個直頭係緊張到la晒口面…可能無線就係鍾意觀眾見到呢d搞笑情景o卦?

至於林峰同吳唱k part舞…又係慳水慳力之作…事關上個禮拜佢o地兩個出席“我們的世紀金曲”演出會先跳完…真係練o左唔好o徙! 我媽去睇完個演唱會, 話覺得林峰跳得好過舞蹈員出身o既吳唱k好多…我對此一d都唔感到出奇, 因為幾乎次次佢兩個一齊跳, 都係林峰跳得好好多!

不過又要講句公道話, 雖然我喜愛林峰…但係今次個頒獎禮又真係好次阿賣飛佛跳得好d喎…可能佢見o係個演唱會度俾林峰搶晒風頭, o係呢個禮拜內苦練都唔定?!

少少題外話…尋日睇太陽報一篇專欄…因為個標題係“林峰VS吳卓羲”所以吸引o左我睇…雖然內容其實唔係太關事…只係得呢段: “找個形象化的例子,姑且當他們是林峰和吳卓羲。如果講心不講金,選任何一人也好。如果需要安全感,選客觀條較佳的林峰亦無可厚非。無可否認,二男風度有別,那釋解不來的感覺,就是出身之別了。”

…真係好認同呢句: “無可否認,二男風度有別,那解釋不來的感覺,就是出身之別了。”

無錯, 一個人o既背景, 真係對佢有重大o既影響…從佢一舉手一投足, 就可以知道一個人o既出身…


林峰VS吳卓羲
11/11/2006
文: 黃擎天

吃不到的葡萄是酸的,普通人對於出身好的人,口况說不值得羨慕,大聲疾呼出身好不等於心腸好、有教養、有學問、有本事……心况不得不承認,含銀匙出身的人,事事快人一步。

除了經濟實力,家境富裕的人,理應有不一樣的氣質,例如陳慧琳。往好的方面發展,他應該是一個大方有禮、學識高、肯承擔的人。即使有祖蔭,他也知道守業更難,甚至會把祖業發揚光大。出身貧困自小有出人頭地情意結的人,幾經努力,同樣可以創出一番事業。惟相比之下,他會稍欠從容,把金錢看得更緊。

富家子弟學不好,就會成為玩世不恭、面目可憎的二世祖。縱使如此,二世祖跟一般大食懶還是有分別的。至少,他懂得享受、有錢堆砌生活情趣,多見世面一點,賣相較討好。

假設有兩個男人同樣英俊、富幽默感、用情深。不同者,一個出身富裕之家,一個出身普通家庭。兩個男人二選一,女人會如何選擇?

找個形象化的例子,姑且當他們是林峰和吳卓羲。如果講心不講金,選任何一人也好。如果需要安全感,選客觀條較佳的林峰亦無可厚非。無可否認,二男風度有別,那釋解不來的感覺,就是出身之別了。

對於自己的出身,我們一方面應不亢不卑,另一方面,也不要流露憎人富貴厭人窮的小家子氣。

環境對人的影響不可低估。先天不足,後天多讀書是有作用的。茶花女只要花上多倍工夫將勤補拙,一樣能夠變身窈窕淑女。



(免得下年回顧時唔記得晒d賽果…都係keep起俾自已睇o下好)

好喇…真係講番個賽果喇! 講真, 我又唔係特別意外, 因為無線一向都喜歡製造驚喜…有時仲係over左添! 同埋因為我睇o既時候已經大概知道晒個賽果…咁就更加無驚喜啦!

一如我所想+料…鄭嘉穎真係得到“最佳男主角”…wely骨啦! 雖然有人覺得佢未夠班, o係“天幕下”o既演技又唔係特別出眾…which我都認同o既…不過從來攞獎都係要配合天時地利人和o架啦, 同埋都係o個句…只係“一場遊戲一場夢”o者! 見佢霉o左咁多年, 依家終於吐氣揚眉, 都戥佢高興呀!

係唔明馬浚偉有幾咁得人喜愛囉? 你要安個獎俾佢都安個合理d o架…佢仲好似話不滿賽果添! 不過有d o野又真係整定o既, 十三年前佢同鄭嘉穎一齊候選男新人, 又係個個頒獎禮都俾嘉穎仔壓住, 得個亞軍…點知到十幾年後大家“轉o左行”, 入到電視台都仍然係俾佢壓住得阿二…真係唔認命都唔得!

不過我真係唔明呢個“最佳”同“我最喜愛”係點定義呢? 同埋點解“最佳”係大獎, 而“我最喜愛”就只係豬肉獎呢?! 無線成日咁巧立名目, 真係好難明! 算啦, 佢今年鍾意玩呢樣, 可能下年又唔玩o架喇!



至於男女配角…都係我估你唔到o個隻! 黃德斌係就係憑“火舞”人氣急升, 不過佢呢十年八年都急升過好幾次…之後又係跌番落o黎! 但係見佢捱o左廿年終於都有番個獎, 都未嘗唔係一件好事!

而阿高智能楊思琦小姐…我真係點都頂佢唔順o架喇! tvb仲要頒完一次又一次俾佢…究竟想點呀?! 我真係一d都唔覺得佢有任何一套戲做得好…唯一係佢身材好囉, 同埋可能係聽教聽話, 俾人非禮都唔敢出聲, 咁樣tvb鍾意o卦?! 佢個感覺真係依舊好白癡, 唔知佢想講咩…哎…點解要係佢?! 不過佢明明係當家花旦, 依家俾人“鄧”o左落去做女配角…真係唔知應唔應該恭喜佢喇?

至於飛躍進步男女藝員…鍾嘉欣我都唔覺得特別好, 但又唔係特別差o既…tvb力捧緊佢, 咁無法啦! 一睇個五強名單, 都好明顯係佢啦…李詩韻同佢o既力捧程度, 都仲差一截o既!

飛躍男…我又真係有o野講喇! 雖然大家都知道我不嬲都好唔buy馬國明, 由佢做高威利已經好反感…可能真係因為“律政新人王”個變態佬太深入民心…佢係繼姚瑩瑩做弱智人士之後, 第二個做某個角色做得好到令我我一路覺得佢就係呢種人! 不過經過o係呢度某幾位讀者力讚佢為人, 再睇埋佢d報導之後, 我都覺得佢個人同埋佢o既品格都算唔錯, 不過佢做戲我依舊不甚欣賞!

但我要講o既係, 睇完今次頒獎禮, 我對佢完全改觀, 係加晒分囉 (有幾個同樣唔係太喜歡馬國明o既朋友都咁樣同我講添…證明佢今次真係贏o左獎又贏埋分呀!)…佢係唯一一個攞獎時, 全場都o係度歡呼吶喊o既藝人…可見佢人緣真係幾唔錯! 一個人緣好o既人, 一定唔會差得去邊囉! 有好多人本身個人都唔差o架, 但係人緣未必太好, 因為要搞好人際關係係一門好高深o既學問, 要得人心, 係好難o架! 仲要係o係娛樂圈呢d競爭咁大o既地方, 有人肯為佢喝采, 證明佢真係吃得開!

o係任何一個圈子, 人際關係都係最緊要o既一環, 之後先到實力, 機緣etc., 所以佢呢樣咁難o既都搞得掂…我有d對佢另眼相看! 我終於明白點解佢咁o既條件tvb都肯力捧佢喇…我敢講句: 馬國明, 你有運行! 下次我o係太古見到你, 唔會再鄙視你喇! 相反, 我會欣賞你!

佢仲有一樣得, 就係個表情好真, 感覺好sincere, 同埋原來都有風趣o既一面…佢眼濕濕口震震咁講完一輪多謝之後, 仲加多句: “今晚我表弟結婚, 我去唔到, 祝佢白頭到老!” 之後全場爆笑! 有sense of humour, 你應該掂o既!

我都o係呢度代佢 (同埋代表芒姐本人) 祝佢個fan屎雪人新婚快樂呀…佢話知道馬國明得獎好開心喎!



仲有o個個最佳節目主持獎…無理由唔係鄭中基呀? 你要力撐森美都唔洗撐得咁離譜呀? 就算俾森美都唔緊要, 但係無理由無小儀份o卦?! 咁都好唔公平o者! 佢兩個一齊確係有火花o既, 但係將d功勞歸晒森美…好似唔係幾講得通喎!

最後當然要講埋爭得最勁o既女主角獎啦…事前話特登整多個什麼“我最喜愛”o黎皆大歡喜o下咪算囉…做咩要搞到咁尷尬呀?

雖然佘詩曼連奪兩獎都唔係話唔合理, 胡杏兒亦都真係未係太夠班去攞女主角, 不過無線咁搞法未免係令人太尷尬喇! 雖則我對於無線o既做法一d都唔感到驚訝…因為佢o地一向最擅於搞驚喜, 製造尷尬場面…等當時人尷尬, 睇o既觀眾一樣戥佢o地尷尬!



無線為o左製造話題, 係唔會理咁多o架喇…但係可以處理得好d, 唔好搞到咁樣啦…阿肥杏又係慘o既! 攞唔到獎都唔緊要喇, 但係佢係全晚都俾人玩囉! 當佘佘皮笑肉不笑地攞完個“我最喜愛”獎後, 無啦啦加o左段do姐訪問其他四強環節 (其實主要只係訪問杏兒)…佢又要忍唔住高興笑o左出o黎, 問埋答d勁難答又尷尬o既問題…真係唔好咁啦! 其實唔知咁樣係咪反映到胡杏兒人緣其實麻麻呢…如果唔係唔會咁玩佢o架嘛?!

到最後頒“最佳女主角”之前, do姐仲要加句什麼“依家先係最考演技o既時刻…如果宣布唔係你, 你仲要笑住咁恭喜對方, 話佢有幾咁實至名歸…!” 嘩! 真係好到肉囉…呢d先係最考演技呀, 平時做得幾好都無用, 真係奧斯卡影后都未必做到!

雖然tvb大部份節目或者頒獎都係事前知道賽果, 仲要"her"(rehearse)埋添…但我相信今次可能又真係未必知, 因為要逼出佢o地d真反應咁先好睇, 咁先會高收視o架嘛…無線就係咁殘忍o架啦! 可憐胡杏兒今年就俾人玩到謝喇!



tvb多年來精心炮製尷尬場面, 最經典都莫過於“1993十大勁歌金曲頒獎典禮”o既“開啤牌玩謝劉華”事件喇…真係再好演技, 都掩蓋唔到o個份失望同埋尷尬!

幾個月前重溫舊錄影帶時同大家講過一次…點知前幾日o係youtube又見到有人放埋上去添…一定要再同大家分享o下:


http://hejnom.blogspot.com/2006_03_26_archive.html
時光倒流12年...1993樂壇頒獎禮回顧:

男歌手o個part就得人驚喇...除o左有克勤每年御用同四大天王戥腳, 但個樣每次都好無耐+無癮之外 (不過有得戥總好過無得戥, 起碼都係第5位嘛...之後佢就真係想戥都無得戥...好彩十年後終於守得雲開!); 今年好明顯就係要玩死劉華! 初時玩個21點爆煲遊戲, 營造到好似又係佢拿咁 (賽前一路公佈o既結果都係佢領先), 佢都諗住坐定粒六...點知原來只係個反高潮, 大家諗住一定係華仔, 點知最終turn out係黎明…華仔個表情真係失望+尷尬到一個前所未有o既地步 (佢多年後接受訪問都有講番呢次超唔掂o既經驗), 好慘...嘩! 佢個"得而復失"o既失望樣, 真係幾好演技都呃唔到人!

呢d咁o既遊戲...玩o既難堪, 睇o既亦唔見得高興, 只係戥佢o地好難受...咁又何必呢?!

仲要之後宣佈"金曲金獎"又玩多次, 叫五強出o黎唱自己隻歌, 如果被sharp cut即係out左, 嘩! 華仔個樣又係緊張到呀...到佢俾人out時個尷尬笑容真係令人難受! 仲要剩番o既兩強居然有黎明份都無佢份...佢個死敵一晚贏佢兩次...睇得出佢超sad!


22 Comments:

Anonymous tfil said...

搞乜呀你咁耐先講!generally賽果都算ok既...最不滿都係馬仔, 佘佘就擺明係無線玩野噱頭, which is not so surprising. 最緊要馬德鐘冇獎就得架喇!

5:55 下午  
Anonymous 敏兒 said...

今年真係好surprise,阿佘拎兩個獎,就擺明無記玩反高潮啦。其實我鍾意蔡少芬,無計。阿佘拎第一個獎時,個樣燶到呢,我同個fd話佢一定爆粗,點之又係佢,真係無野好講。
至於鄭嘉穎(芒姐,以下既野,希望見諒),就真係意外中意外,估唔到無記咁大膽俾佢,我個fd果陣剛好仲係公司,佢話公司大部分做變樂既同事都係公司,當宣佈果一剎那,全公司慘叫,哈哈,何其震撼!到呢一刻,我都唔認同,好彩,佢拎左獎之後,都唔係巴巴閉閉,不可一世。
另外,我有個提議,不如無記下年增加一個「最具人緣大獎」,叫全台上下投票,咪知邊個最有人緣囉。

8:28 下午  
Anonymous 雪人 said...

阿佘拎最受歡迎時, 我都諗緊無線會唔會玩反高潮, 因為係旗下演員嘛, 怕咩得罪人... 點知...估唔到真係咁樣~

多謝你的祝福!!
同埋好開心, 你幫馬國明加分呀, 哈哈哈!!

11:04 下午  
Anonymous jade said...

我最欣賞馬明夠真......
你睇佢多謝到口震就知佢事前唔知自己有獎,冇諗過會擰獎啦~~
雖然佢開名特別多謝郭晉安幾好笑
當然最好笑就係祝佢表弟白頭到老啦~~

12:13 上午  
Anonymous June said...

我真係唔想咁話人,但係次次見到鍾嘉欣都覺得佢似鈍胎,見到楊思琦淨係識吱吱喳喳大大聲講就想熄電視。最慘佘思曼同胡杏兒都有咁毛病,仲經常over act,明真係做緊戲俾你睇。TVB仲成日輪流放佢出嘈喧巴閉,你話一日到黑幾咁吵耳?所以我已經轉去睇鬼佬台好耐喇,怕佢避得就避。點知間中拎反去人話台睇睇,都仲係見到佢車車咁轉,我以為邊齣劇咁鬼長氣,原來已經轉幾次,不過都係佢做,好似TVB無哂演員咁,死咪?

馬國明我一向覺得佢幾cute,傻傻,跨張得唔令人討厭種囉,但係印象中佢又無乜做過正經類角色。

鄭嘉穎獎好似早,不過佢唔囂張又有少少唔好意思咁,都算佢啦。馬俊偉....唉,佢從來只懂笑同縐眉頭兩大款表情,唔知講乜好。

呢個頒獎禮,原來玩驚嚇,問你服未?

4:05 上午  
Anonymous 匿名 said...

oh... 原來王貽興都有份表演(跳舞)... 但我又真係留意唔到喎! 佢係咪叫做正式投入幕前架喇?!

11:39 上午  
Anonymous shiruva said...

其實鄭嘉穎拎"最住男主角", 我自己就幾鍾意呢個賽果, 因為"天幕下的戀人"播緊既時候,我真係被沈朗呢個角色影響到,好想有個咁樣既人做自己男朋友.我唔理係因為個角色討好,定係佢既演技好,總之佢能夠影響到一個觀眾對佢既感覺,咁我覺得佢係成功囉.不過,我覺得佢如果係拎"我最喜愛的男主角"的話,應該冇咁多人投訴吧...
至於阿佘...預左佢有獎,但估唔到係一次過拎兩個.無線又學番早兩年總選既"最受歡迎男歌手"及"亞太區最受歡迎男歌手"一齊俾哂劉華呢一招.雖然我對胡杏兒印象麻麻,但係今次覺得佢幾慘囉,俾人擺上枱.最想鄧萃雯拎,但暫時都乜可能架喇.點解我話"暫時"?因為鄧萃雯令我諗番起以前四大天王爭"最受歡迎男歌手"既事,以前曾經傳過因為張學友曾經未經無線批准而亮相亞視節目,所以俾無線封殺,下令唔會俾"最受歡迎男歌手",所以以前學友明明最有機會得獎,都往往跟此獎無緣.直到97年,好像因為贊助商既關係,學友終於得到這個獎.呢件事令我覺得,鄧萃雯要拎最佳女主角並唔係冇可能,最緊要有人撐就得.
咁多個獎,我最開心係馬國明拎"飛躍進步男藝員"一獎.我知道芒姐對佢印象麻麻,但我想講,可能佢演技還有待改進,但係佢比其他男藝員更謙虛和踏實.某d藝員,未紅先驕,又多花邊新聞, 而佢就例外.呢樣野,我諗俾佢既演技更重要.你睇佢拎獎時個喜出望外感覺幾真, 而且在其他討論區中,好多人都覺得佢拎獎係實至名歸,所以希望芒姐唔好想佢個變態佬角色所影響,以後多d留意佢其他角色啦.

4:24 下午  
Anonymous 匿名 said...

Next week,
賭城風雲VS義無反顧,
兩部都打打殺殺,你會唔會睇?

9:48 上午  
Blogger 芒姐 said...

oh...緊係睇"賭城風雲"...有我好喜歡o既三哥, d cast都唔錯...講賭都ok呀, 令人諗起當年亞視o既"勝者為王"...拍得好好呀呢套!

"義無反顧"宣傳o左九千年, 終於都做啦咩?! 但係有我好厭惡o既劉綽琪...興趣不大!

12:10 下午  
Blogger 芒姐 said...

shiruva,

"天幕下"係好睇同埋真係幾成功囉...講真, 你話鄭嘉穎演得特別好, 其實又唔算係, 不過個角色係討好, 同埋佢真係因此而人氣急升o左好多囉...賽果呢d o野, 永遠都會有人滿意有人唔滿意o架喇...無咩所謂啦, 最緊要做馬都唔好做得太核突咪算囉!

阿佘得兩獎個twist, 無線都真係玩過幾次...不過橋唔怕舊, 最緊要受呀嘛! 大家仍然咁緊張驚喜, 不過今次胡杏兒就成為受害者, 仲要不停咁問佢感受, 真係睇到都戥佢難堪!

至於馬國明, 佢d戲真係依舊普通啦, 完全無主角格, 不過佢o既為人, 我係另眼相看o左o既...今次真係對佢有d改觀, 佢俾人o既感覺真係幾真誠囉, 同埋之後睇"東張西望"訪問佢同郭晋安, 安仔問佢點解要特別多謝佢, 佢個樣尷尷尬尬咁都幾好笑...

12:26 下午  
Blogger 芒姐 said...

匿名,

王貽興表演跳舞? o係邊度呀? 我無睇到添!
佢想進軍幕前...唔係咁核突呀嘛?

12:52 下午  
Blogger 芒姐 said...

June ,

鍾嘉欣點鈍胎都唔會夠楊思琦小姐...佢真係極品中o既極品...有無睇前幾日o既15/16...真係好想打巴佢! 咩都唔識答都唔緊要, 倒自己公司米話咩戲都未睇過都唔緊要...但係可唔可以唔好dead air十幾秒, 人o地叫佢都唔肯按掣, 簡直阻住個地球轉! 我真係唔知佢真係咁唔識趣, 定係扮o野懶cutie喇!

12:55 下午  
Blogger 芒姐 said...

jade,

係, 我都認同馬明夠真o既...佢多謝郭晉安同埋祝表弟白頭到老算係全晚最好笑o既位o架喇!

12:56 下午  
Blogger 芒姐 said...

雪人,

無錯, 加晒分! 見你結婚, 加d分俾佢囉!

無線真係完全漠視藝員感受囉

12:57 下午  
Blogger 芒姐 said...

敏兒.

阿佘拎第一個獎時個樣真係嬲到爆...佢都係要再練o下d演技至得...呢個頒獎禮根本先係最考演技o既節目囉!

絕對唔介意你講鄭嘉穎...每人有佢唔同o既喜好...呢度好在就係你鍾意講咩都得...我絕對尊重唔同人o既睇法!

至於「最具人緣大獎」唔需要刻意增加啦, 一個頒獎禮已經睇晒!

1:00 下午  
Blogger 芒姐 said...

tfil,

部電腦壞o左, 打唔到呀!

hoho, 馬德鐘個格又係不太討好o既!

1:01 下午  
Anonymous 匿名 said...

Re: 王貽興表演跳舞

我都唔知呀, 係佢自己話架乍, 佢話最初tvb搵佢表演時, 佢仲以為人地想搵香港先生黃長興! 佢話主要係同d香港先生一齊表演, 又話好開心有份參與台慶, 仲懶醒咁話見識到個2007節目巡禮(佢話個巡禮只係for廣告客戶, 唔會播出街, 言詞間隱隱流露出一份得戚... 唔知佢係咪睇得電視少呢? 一直以來, 節目巡禮都係會出街架, 今年都會o係台慶之後播)! 頒獎禮當晚好似係有d表演項目o既, 不過我唔係好專心, 真係無留意到喎... 或者佢講緊o既係台慶夜o既表演項目啦, 不過佢講到唔清唔楚咁, 我又搵唔番篇文, 無從查證添!

1:53 下午  
Anonymous tfil said...

有冇見過三哥個鱷魚裇廣告呀? 成日係銅鑼灣地鐵站見到覺得好型

2:06 下午  
Blogger 芒姐 said...

tfil,

有呀有呀, 真係型到爆...好期待賭場風雲, 因為有三哥!

2:54 下午  
Blogger 芒姐 said...

Re: 王貽興表演跳舞

我諗佢可能真係指台慶夜o既表演啦...好一個才子...走去同香港先生跳舞...哎!

佢自從走o左去做電視之後, 真係無晒d才氣(本來其實都唔知算唔算有)...佢同另外o個兩位"正字"主持本身咬字都唔見得特別準確...或者咁先有親切感o卦!

我都覺得佢依家d文章成日都流露一種好proud of自己有得做電視o既感覺...真係sorry晒!

2:58 下午  
Anonymous anb. said...

馬國明個人係唔錯的,我之前無記的“香港直播“有佢同葉璇的專訪,完全兩種人,葉璇好smart,好清楚自己想要咩!而馬國明個人好簡單,佢話只係想有個幸福家庭,講野都好冇機心o個種人!之後,我就對馬國明完全改觀!

講開王貽興,我以前幾喜愛佢的,佢寫的書真係唔錯,但當佢越接近幕前,佢就失去左以前舊香港仔的味道,變到懶有life style的中環人!
可能咁樣先叫成功............

7:12 下午  
Blogger 芒姐 said...

anb.,

咁葉璇同馬國明, 又真係應該係兩種好唔同o既人o黎o既...o係欣賞馬國明無咩機心o既同時, 其實我都好欣賞葉璇年紀輕輕就咁知道自己想要咩, 係一個好聰明o既人...雖然大部份香港人都唔buy佢!

王貽興...其實真係唔係好知佢係咩人, 除o左有時睇佢d專㯗都幾有共鳴咁囉...可能因為大家差唔多年紀, 都係生長於o個個年代!

7:55 下午  

發佈留言

<< Home