11-4(sat) 全台倒佘大行動
好搞笑…一到台慶, 就開始有騎呢新聞一籮籮! 2003年就有郭可盈話張可頤“贏o左獎輸o左品o既事件”, 舊年就有阿姐同郭可盈o既罵戰…今年o係距離台慶一個月前, 已經有呢d新聞上…普遍係講佘詩曼同胡杏兒o既惡鬥…同埋新近o既“全台倒佘大行動”! 嘩! 個名幾響呀, 直頭令人諗起八十年代尾/九十年代初o既“越南船民遣返大行動”…彷彿仲勁過台灣o個d什麼“遍地開花”/“天下圍攻”大行動…呢d名真係改得好呀…個勢已經殺晒! 最鍾意佢個相信係inspired by“天下為公”o既“天下圍攻”大行動…玩食字, 我鍾意!
到呢一刻我都唔敢講邊個機會大d喎…因為未到最後一刻, 都會有好多變數! 但係胡杏兒呢期有“肥田囍事”做勢…“鳳凰四重奏”播完o左一排係蝕底d! 不過再下個禮拜又會上阿姐+阿旺+阿佘套歌舞片, 可能一輪宣傳攻勢後又可以掂番d呢…真係唔知喇!
肥杏咁落力為套劇…個獎其實係抵俾佢o既! 聽聞今年好似又加多o左幾個獎, 女主角都有兩個…又係o個d“最佳”+“最受歡迎”o個隻o卦…多o左幾舊豬肉, 太公應該分得容易d呀! 最緊要大家食得開心o者!
上個禮拜有“長假期”, 終於都有機會睇番錄o左好耐都未有時間睇o既劇集! 居然一口氣煲o左廿集流金歲月…對我o黎講真係一個紀錄! 我係就係鍾意錄起晒d劇集一次過睇, 但都未試過o係兩晚內一睇睇晒廿集…比較之下, 我又發覺晚晚追劇集係有佢o既趣味o既…一次過睇晒又真係無o左呢種樂趣! 所以我諗錄埋五集五集睇就最perfect!
本來對呢d死人塌樓長劇無咩好感, 不過見佢作為02年台慶巨獻, 又有咁多個我喜歡o既演員…未睇過係有d可惜! 咁就即管錄o黎睇o下, 反正唔好睇可以勁fast forward嘛! 不過睇睇o下又ok喎…劇情都算幾吸引, 幾緊湊o個隻…但係頭十幾集好睇d, 後來又係多死人塌樓殺人戲…我唔係太喜歡呢d太heavy o既劇情!
個劇情基本上同“我本善良”好相似, 又係個主角本身係由黑幫中人養大, 後來認番親生父親/兄弟, 內心出現矛盾…徘徊o係正邪中間, 難為正邪定分界咁…! 個主角又係o個d做o左好多壞事, 但係其實本性善良o個隻…唔同在上次個主角係發瘟, 今次變o左撈家…反而發瘟就撈o左個忠角, 又係懶搞笑o個隻…其實, 最搞笑係佢pat花輪同學“蔭”囉…好核突!
宣萱同葉璇真係有d似樣, 唔怪得知葉璇一出道d人就話佢似宣萱! 平時講到佢o地好唔o岩咁,但係劇中o既姊妹情都做得幾逼真…可能佢o地d戲好啦!
阿向海d戲就真係不敢恭維喇…仲有成日都係話佢迷倒眾生…真係…哎! 睇過佢有次“娛樂直播”o既訪問, 發覺佢談吐真係幾得體o既, 但係個樣就…真係未免太似一個月亮!
其他人都做得幾好…不過我比較欣賞陳國邦囉! 佢做o個個低低o地角色, 其實好過胡杏兒好多添啦! 胡杏兒當時作為一個都幾新o既演員, 係做得唔差o既, 不過不失咁啦, 但係又未至於要頒個“飛躍進步獎”俾佢囉! 不過可能佢o個期食正台慶熱, 機會係大d…正如佢今次做“肥田”咁! 同埋做弱智角色係出d o架喇…但係如果你話做得逼真, 我覺得當年姚瑩瑩o係“壹號皇庭”做o個個弱智角色真係無得頂…佢不嬲都毫無演技可言o架嘛, 但係o個次做得好到我之後幾年都覺得佢真係弱智o架囉…oh! 可能因為佢不嬲講o野都好似低低o地咁…其實唔關演技事呢?! 哈哈…真係唔知!
同埋阿宣萱可唔可以唔好扎起d頭髮…最可怕仲係要疏個髻…搞到成個阿姑咁! 佢放d頭髮落o黎個樣係ok o架喎! 同埋佢對耳太兜風, 一扎起就好明顯喇!
仲有, 佢無啦啦可以一下子由bar轉做solic都算喇…但係間房可唔可以唔好大成咁? partner間房都無咁大啦, even阿丁善本間房都無咁大…寫實少少得唔得呀?
前幾日睇“娛樂直播”, 見到阿祥嫂話同佢班仔女冰釋前嫌…又話o係酒樓幫佢擺番幾圍賀壽…成件事真係…騎呢到呀! 雖則話父母同仔女點會有隔夜仇…但佢o地確係反晒目仲要閙到上法庭…搞到咁大仲邊度有得o岩! 前排大家仲好唔o岩, 依家又friend番…真係唔知佢o地想點?! 但我個人認為就好鬼假囉!
小艾同阿祥嫂仲要懶係o係鏡頭面前嘴o左幾次以示母女情深…真係核突到爆! 真係咁 “friend”就唔洗做俾人睇啦! 仲要明明o個時係話祥嫂由細到大都唔係咁鍾意阿小艾, 話佢黐老豆呀嘛…佢最錫o個個應該係阿兆尊! 不過阿兆尊個人就反而真d…佢去到同阿祥嫂都好疏離咁款, 仲要客客氣氣咁話: 你好!
其實阿兆尊一向都係有性格o個批…記得唯一一次覺得佢好型o既, 就係十年前鄧家爭產案序幕時, “城市追擊”咪咁o岩o係現場訪問緊祥哥一家, 所以影低晒d實況 (o個陣收視仲好過d連續劇!)…有一幕係兆尊唔知點怒斥佢阿媽定八舅父, 仲係冷言冷語, 句句到肉o個隻…嘩! o個期佢真係型到呀…日日返學大家都係去重覆番佢之前o個日o既金句! 即刻覺得佢好有大哥款…型過佢平時做戲好多呀!
最搞笑係我見到後來阿祥嫂仲同阿兆榮握手添…真係怪到爆! 邊忽似兩母子呀? 都係佢o地個細細妹個人最真…明明係唔o岩, 好心就唔好做場大龍鳳啦!
完全唔知佢o地想點? 係想庭外和解慳番d律師費, 但又唔知點落台, 所以要做場戲俾大家睇呀? 定係想博見報呢? 我諗都係後者機會大d, 事關你想和解咪和解囉…關人咩事? 唔洗特登向全世界解釋呀嘛?!
posted by 芒姐 at 11:41 下午
10 Comments:
當年我不是每集追的，比較愛看有宣萱夾羅家良及林峰夾楊怡的場口，最有印象是宣萱的連珠炮發，羅家良一副我本善良的無辜樣子（的確在劇裡，他叫做丁善本），而當年三朵無線力棒小花楊怡、葉璇、肥杏兒演得不俗（本人較偏愛楊怡，但又覺得葉璇做得唔錯！）
有一集，花倫同學令我笑爆咀，記唔記得佢係海馬公園向楊怡解釋pat蔭的用途呀?!好無鬼聊架！哈哈
暑假係香港時都有再追，不過睇唔駛就爛走左....
講開姚瑩瑩弱智，你令我嘈醒左隔離房...！完全中哂！
我提議無線整個“最佳弱智角色獎“，實際過家陣的咩野女主腳
Have you watched 詩遊記?
Here are two of the participants' diary.
http://hk.myblog.yahoo.com/jw!DnwXbU6eERr7GXc6CyKdQHd3qVGotA--/article?mid=29
http://hk.myblog.yahoo.com/jw!.sM3Uv6RGB7imiUgz02dOSOQZPsU7A8-/article?mid=121
哈哈...芒姐你形容為"遣返大行動"真係笑到我呢~
不過我反而支持阿佘呀,論年資都應該係佢既,諗返佢以前緝偵扮陳錦鴻女朋友個樣,真係baby好多,而家少女味變女人味,佢係付出左佢既青春既至少~~
喬小喬,
咁又係, 阿佘o既進步係好大o既...諗起佢當年O係"雪山飛狐"叫阿小胡斐O個把聲, 真係好想大巴大巴升落佢到...依家睇佢做戲都好O左好多...其實O係"十月初五的月光"已經有顯著O既進步!
不過如果真係要計年資或論演技, 應該頒俾鄧萃雯啦...畢竟台慶頒獎只係一場遊戲, 一場交易, 要配合好多因素O既...睇O下無線今年開邊瓣囉!
tvfan,
我好少睇"詩遊記"...依家連佢幾點做都唔多清楚...相信係一個幾好睇O既節目O黎O既, 不過放O係亞視, 又的確無咩人會留意到!
anb.,
好高興搵到人認同我對姚瑩瑩vs弱智o既睇法...哈哈哈! 呢樣o野我想講o左十年! 實在太似喇...
我記得花倫同學o係海馬公園向楊怡解釋pat蔭o既用途呀...超無聊, 但又幾好笑!
OH...我前幾日唔覺意larp到少少(因為我想錄起幾集一氣過先睇), 原來宣萱係會同花輪同學一齊o架?! 我睇前廿集個勢, 以為佢係唔會接受花輪同學o既添...我唔鍾意咁呀! 我都係喜歡睇佢同羅家良一對...你講得好o岩..."宣萱連珠炮發，羅家良一副我本善良的無辜樣子"係好抵死啊!
林峰o係呢套劇個郭富城"有效日期"頭盔頭我唔係太buy...同埋佢個角色character都唔太討好, 奸都唔緊要, 但初段太無主見, 太成事不足敗事有餘令人反感囉! 否則佢同楊怡兩個我都幾buy, 佢o地的場口對我o黎講應該會更吸引!
係呀, 三小花都演得唔錯o架, 其實最有talent o個個係葉璇, 最醒, 最知道自己想要咩, 不過有時d行徑又係over左o既, 同埋香港人會覺得佢娘, 未必接受到!
係啦！我都好唔鍾意見到宣萱同花倫同學一齊！我就係因為咁而skip左幾集冇睇！
而漏左我最鍾意睇的場口，就係宣萱的一家，宣萱同葉璇真係做得到那種姊妹情（加上兩個又有Ｄ似樣），而佢地同阿爸阿媽的對話，又幾溫情同好笑！
相反，丁家的場口都係比較嚴肅，都幾強烈的對比！
林峰個角色又真係怪左Ｄ，太凝做佢一定會俾人影響的半忠奸角色（查實我覺得係蠢多Ｄ！）
就黎有“賭場風雲“睇！有宣萱有楊怡有歐陽震華！都幾期待呢套，不過我就擔心又係Ｄ史詩式長又沉，唯一寄望係bobby！希望佢同宣萱呢對組合有新火花！
如果真係要計年資或論演技, 應該頒俾鄧萃雯...
你講得好岩呀!!!不過好可惜係雯女年紀唔細,我估無記既心態係:就算我唔俾你,你都唔走得去邊啦~
真係...哎...
喬小喬,
不過tvb一定唔會俾鄧萃雯o架喇...兩年前如妃大家以為佢攞硬, 最終咪又撻q!
依家睇o黎佘佘機會好似大過肥杏, 因為大家一致認為無想像中煲得咁好睇...不過都要睇o下最後邊個同高層食飯食得掂d o既!
但係依家頒獎禮又提早, 仲要分"最佳女主角"同"最受歡迎女主角"...都好一片混亂, 唔知佢邊個獎打邊個獎囉!
anb.,
其實宣萱我又唔係特別buy, 只係某d戲佢個角色討好, 通常係d專業人士, 形象特別鮮明, 同埋幾適合佢做, 咁咪會好欣賞佢o係o個套劇o既演唱! 但係好似"尋秦記"o個d, 就真係唔多適合佢喇!
同埋佢同羅嘉良又真係幾有默契O既, 佢O地O既場口幾好睇! 仲有佢同葉璇段姐妹情都做得幾好, 估唔到講到佢O地咁不和, 但又做得出O個種感覺喎! 我都好認同佢O地一家人的場口幾溫情同好笑呀!
“賭場風雲"我就會比較期待苗僑偉囉!
發佈留言
<< Home