2006年11月7日星期二

11-7(tues) 肥田囍事

睇o左兩個禮拜, 終於都有機會講o下套台慶劇“肥田囍事”喇!

個感覺有d似舊年o個套台慶劇“阿旺新傳”…不過“阿旺"有意思d, 同埋warm d!“肥田囍事”基本上可以話係無咩劇情, 主要就係描述肥人有幾咁論盡, 生活有幾多不便, 點俾人歧視法…但最終經相處落d人又發覺佢o地幾咁心地善良, 帶出內在美係最緊要o既大前題囉!

不過…劇情最終咪應該係講肥田瘦番…咁, 即係點呀?

胡杏兒肥o左都幾可愛, 唔係話走樣走得好勁, 因為佢瘦時其實都唔算話叫好靚o個隻…係最buy佢o係“律政新人王”個短髮有型look! 依家九點幾就見佢咁肥, 深夜十二點幾“流金歲月”又見佢骨瘦如柴咁…好大contrast…都幾搞笑! 不過佢同胡諾言兩個“二胡”咁落力去又增又減, 真係應該加d分俾佢o地! 大家都應該知道減肥/增肥其實係有幾咁高難度o架啦! 好傷身o架嘛! 所以佢o地咁樣為o左部戲去增肥, 真係好大犧牲…拍出o黎都真實過“瘦身男女”好多…係抵讚o既!

佢o地又勁喎…咁快就減得番! 不過胡杏兒就人氣急升喇, 胡仔又唔見得有太大起色! 其實幾個月前深夜首播o個套陳年倉底劇“追魂交易”都係搵“二胡”做男女主角…幾年後胡杏兒已經可以問鼎最佳女主角獎, 胡仔仲徘徊o係二, 三線…真係可憐!



d人話胡杏兒做得麻麻, 表情動作太誇張…係就係誇d, 但我又唔覺得over左…我覺得都配合劇情需要呀! 至於話似欣宜…咁又真係幾似, 但唔係個樣, 而係d浮誇舉動…都係o個句, 欣宜其實唔係醜, 只係佢d舉動實在太過造作, 太過嚇人! 跟住又話胡杏兒個look似黃淑儀…咁又真係有d似喎…大家都肥肥o地! 佢o地話就算“流金”o既時候胡杏兒骨瘦如柴, d人都已經話佢o地似樣o架啦!

仲有, 我覺得今次gigi姐做得幾好喎…同平時d角色都幾唔同! 同埋有一播係影番佢以前張泳裝照…又真係幾靚囉!



除o左黃淑儀, 其實李詩韻同姚嘉妮都做得幾好! 李詩韻上年已經o係幾套台慶劇都有份做, 仲有o係“本草藥王”都做得唔錯…其實作為新人, 佢真係做得幾自然, 表現幾好…係無可能做胡杏兒表姐囉, 佢做表妹o岩d! 姚嘉妮又係做主角的情敵…不過佢都做得唔錯, 同埋其實佢個樣都幾靚呀!

哈哈, 胡杏兒o係劇中叫“何美田”…令人諗起十年前有個華南理工學員, 呢…做呂頌賢版“笑傲江湖”o既怡琳o個個女仔呢…佢好似係叫“何美鈿”囉…我覺得佢係咁多個華南理工裡面 (有一期咪有好多個華南理工落o左o黎做電視劇o既…張延, 黃小燕, 蔣文端o個d呢…) 最好樣o個個…唔知佢依家去o左邊呢?



至於o個位“重金禮聘”o既外援男主角許志安…平心而論…係做得唔差o既, 仲要係比想像中自然好多…只係佢近年形象跌入谷底o者!

其實以前真係好鍾意聽佢d歌, 亦都覺得佢真係幾型o架…唔排除當年係因為鍾意sammi所以愛屋及烏埋佢! 不過無可否認…佢以前d歌真係超好聽…無論係八十年代初出道o既“戀愛片段”, 之後o既“翻騰”,“不倦的蝴蝶”, 再到佢真正翻身之作“喜歡你是你”, “雨後陽光”,“心血”,“向全世界說愛你”…仲有最熱煲佢d歌o個期o既“男人最痛”, “男人的感慨”等…我當年考會考都真係一邊煲住佢o個隻抱住隻貓封面o既“男人最痛”大碟o黎溫書, 再加埋隻什麼“經典歌曲十七首”…真係陪伴我度過o左整個會考季節! 我反而覺得佢後來轉o左會去正東之後d歌已經無華星年代咁好聽! 其實好多歌手都係o係華星年代d歌最正…同埋華星其實捧新人真係有一手!

同埋其實佢唱歌真係幾好聽, 亦都遇到勁多好歌囉…估唔到一個曾經係最受歡迎男歌手o既人, 依家居然淪落成咁, 個感覺[火羅]到爆, 仲要俾人話佢“癩蝦安想吃肥田肉”…

我相信呢段新聞就唔係真o既, 但係d人要作o野都係揀你o黎寫衰, 證明o左你人緣同人氣都唔多好啦…我記得胡杏兒選港姐時話佢偶像係許志安 (oh點解咁多人參選呢樣o個樣前, 個偶像都係許志安呢? Sammi參加新秀前, 又係話佢偶像係許志安…我仲睇過唔知邊d報導話佢係為o左可以認識安仔先參加新秀…哈哈!)…點知依家胡杏兒紅過佢咁多, 仲要俾人話佢“癩蝦安”…都真係唔好話唔慘!

其實我最反感佢都係成日拿d戀情o黎做宣傳…分手就分手啦, 人o地sammi都唔會拿出o黎講, 佢就每次出碟都拿出o黎講一餐!



不過咁, 佢[火羅]還[火羅], 又真係唔可以抺煞佢多年來o係樂壇o既貢獻! 前兩個禮拜勁歌金曲搞o左個“許志安真唱真音樂會”…又真係幾好睇o下! 聽番佢d舊歌, 又真係曾經好hit好hit過, 依家聽番都好經典! 仲有肥杏上o黎同佢合唱…作為fans o既佢唱安仔d舊歌都唱得唔錯呀!

佢首“豬先生”本來都唔覺得太好聽, 不過o係肥田裡面日播夜播胡杏兒唱o個個version (好似係叫“豬小姐”)…聽得多真係順耳o左, 變得幾好聽…呢d就係o係劇集打歌o既好處喇! 呢隻歌好似o係yahoo個搜尋人氣榜都榜上有名…呢期好hit咁!

許志安呢期就真係做盡所有o野搏反彈…佢話今次係佢繼92年“我愛牙擦蘇”之後o既另一套tvb劇集…我對佢o係呢套戲真係無咩印象…反而好記得佢o係差唔多廿年前, 李嘉欣o岩o岩選完港姐為佢度身訂造o個套“花月佳期”度好似出現過…不過個主角係另一個安仔郭晉安!

Objectively, 其實安仔今次表現係唔差o既…係個樣太太太瘦喇…唔知係咪要襯番肥田o既肥呢?!

24 Comments:

Anonymous Joyce said...

終於睇到你講肥田喇
因為開始時期望太大,除左頭個一兩集,之後真係愈睇愈失望
真係好唔鍾意一個咁反智ge女主角,單純同熱心助人都唔係問題,但佢係人地唔想佢幫但又堅持要幫,自己又要冇料跟住搞到人地lae咁hae,之後仲要一幅懶無辜+緊張ge樣話:哎呀!對唔住呀!我唔係有心嫁!
喂!人地一早叫你唔好幫,家下搞到人地一鑊泡,幾十歲人應該知自己d料去度邊,走開啦
睇到d咁蠢ge女主角,真係好難頂
另外個男主角真係唔係好得,唔係話佢唔好,只不過真係唔啱許志安做囉,佢講到個男主角係事業有成+相貌堂堂,事業有成佢做到,但平心而論,許生真係一d都稱唔得上做相貌堂堂囉,不嬲都有老鼠安你叫嫁啦,搵佢做男主角寅係好唔得,同埋佢同家有賤犬個種狗真係一個餅印
不過呢d都唔係演員ge問題,佢地兩個其實做得幾好,肥田仲肥得好可愛,其實係編劇同監製問題,抄橋又抄得唔好睇,雞肋!

何美鈿好似而家去左大陸發展,久唔久會見到佢d相

1:25 上午  
Anonymous 匿名 said...

何美鈿其實係幾靚架, 可惜紅唔起!

2:16 上午  
Anonymous davis said...

以我所知何美鈿而家o係大陸拍劇,
因為佢通常來回香港大陸都搵我家姐買機票。
哈。

反而我印象最深係佢西遊記扮哪吒。
不過佢真人都幾甜幾靚架=)

2:31 上午  
Anonymous 匿名 said...

好似話肥田個角色都最後都係唔會變瘦架喎...

3:51 上午  
Blogger V said...

唔係0咼,我見許志安同肥田結婚個時肥田係肥架,結婚應該係套戲ge結局掛?

何美鈿而家o係大陸拍劇,都算有知名度
而家又0岩0岩0係香港拍緊杜琪峰0既門徒,好似做袁詠儀個妹

4:19 上午  
Anonymous 匿名 said...

一套只講愛情的電視劇, impact大極有限!

[阿旺]有親情、友情、愛情, 總之就充滿溫情, 的確比[肥田]回響大!

10:18 上午  
Anonymous tfil said...

「許生真係一d都稱唔得上做相貌堂堂囉,不嬲都有老鼠安你叫嫁啦」exactly! 有幾幕近鏡影佢, 真係樣衰到想打佢! 不過佢唱歌真係好, 豬先生同何慧愛都幾好聽架! 其實好想知佢做左d咩d記者咁鍾意踩佢. "癩蝦安想吃肥田肉", 我見到個標題都有d唔忍心睇.

11:33 上午  
Anonymous  said...

我無眼肥田,所以無野講!
(註:我已經夠肥啦,正如我老公話佢屋企已經有個肥雲,有咩好睇,XDDDD)

我黎係想問下你有無睇過呢個網!
http://www.xanga.com/tvbqbobo

你之前話東東大師既白字,我都覺得時下既年青人唔識字,但係呢位老外既中文又好掂喎!

3:27 下午  
Anonymous Kitty said...

幾同意阿joyce 0既觀點,我都幾失望,個女主角0既性格令人覺得好煩,不過肥田又真係肥得黎可愛!
許志安個樣有煩躁feel,唔似係咁成功0既人。
仍然覺得李詩韻講對白時可以再改善0下。

講開華南理工,何美鈿都算幾成功啦,起碼佢有一定知名度,又有女主角做0下,而且佢baby face,"襟"睇d。(佢應該都過三十)。

黃小燕應該仲有拍大陸劇,不過唔算紅,近年睇到佢0既作品係同陳錦鴻做0既電影"愛情保險"(早排無線有播,唔係陳錦鴻套"愛情全保"),佢都算眼大大娘味算少,不過廣東話爭少少,"孝感動天"仲用翻佢原聲!

蔣文端原來係廣州粵曲花旦,有次無意中睇到佢0係珠江台做粵曲評判,d人端姐!端姐!咁叫佢,佢個樣變化唔大,對佢印象最深係"刑偵1"裡面梁榮忠鍾情0既女人,呢個角色佢做得幾好。

張延大家都知嫁咗俾張錦程。

仲有一個叫鄭南(唔知係唔係呢個南字),識佢0既人應該唔多,佢拍戲較少,但有一排主持過都市閑情,個時我覺得佢0個樣勁似孫耀威。

曹眾好似都係華南理工掛?

4:23 下午  
Anonymous 匿名 said...

yee??? 但係喬寶寶話佢其實係唔識中文架喎! 佢仲話有埋怨過父母當初唔俾佢學中文tim! 請槍乎?!

5:33 下午  
Anonymous tfil said...

今期壹仔有李泳豪訪問, 雖然冇踩佢食軟飯, 但係後記度話佢係癩蛤蟆, 都幾賤

10:32 下午  
Anonymous smallkim said...

一直都有睇開你既日記~

本身我係日劇+台劇迷~好耐冇睇TVB依家既劇集~不過見肥田好似好好睇就睇下啦

點之睇完...或者期望太大失望更大啦~!!
非常認同joyce既觀點~

一套抄王子變青蛙+我係金三珣既劇集
但又抄到好鬼爛~
肥田真係好白痴~呢幾集明明唔鍾意家輝~好喇~臨結婚先至講我唔願意~真係玩死人囉~
仲有呀~又成日講到佢幾咁熱心助人~我覺得佢好煩就真~!!

開頭都諗住佢個角色會好搞笑~點之反而覺得佢煩囉~仲有男主角許生真係...個樣好唔掂..!!!

其實佢地兩個演得ok~反之我覺得黃淑儀係演得最好~同埋姚嘉妮真係幾靚~

只係個編劇勁唔掂囉~!!!
抄到兩頭唔到岸咁~!!!

11:29 上午  
Blogger 芒姐 said...

smallkim,

多謝你一直睇睇我o既日記喎!

肥田又確係令人失望...所以呢個世界都係唔好俾太大期望人囉!

佢仲要走d懶係童話式o既路線, 好失實...睇到我好鬼悶呀!

黃淑儀真係做得surprisingly生鬼...姚嘉妮都幾ok呀!

6:38 下午  
Blogger 芒姐 said...

tfil,

其實我覺得佢作為一個男人, 又真係好難忍受日日咁俾人話食軟飯, 個女友紅過佢咁多o既...仲要佢細個曾經咁紅過!

好鬼可憐...如果佢兩個再keep住level差咁遠, 都好難有好結果囉!

6:40 下午  
Blogger 芒姐 said...

Anonymous,

我估係佢個friend幫佢寫o架嘛?! 可能佢口述啦...

6:41 下午  
Blogger 芒姐 said...

Kitty,

咁我都認同李詩韻d廣東話聽得人好辛苦!
肥田個樣其實肥得o黎都幾靚o下...不過阿袁彌明肥得仲靚...o係堆肥妹中真係特別sharp!

哈哈...我好同意許志安個樣有煩躁feel囉!

至於華南理工, 我又唔記得曹眾係唔係喎...佢又好似唔係呀...佢過o左合約期都唔洗遺返! 同埋佢個待遇好似特別好o既 (例如將佢捧成當時o既五美)!

咁多個之中我都覺得何美鈿最靚...個樣幾cute幾sweet, 同埋無咩鄉音!

黃小燕o個時仲有好多節目主持做, 但佢d廣東話都係麻麻!

蔣文端最深刻都真係"刑偵1"o個個為家姐殺人o既少女...仲要射箭...好鬼有型!

鄭南真係無印象...

仲有一個成日做d茄喱啡角色o既, 叫唐[藏] (應該無草花頭, 不過唔識打)娜...就係刑偵入面做車匙雜誌社同事o個個...
曹眾好似都係華南理工掛?

6:48 下午  
Blogger 芒姐 said...

雲,

唔係你講我都唔知有個咁o既網站...又幾搞笑喎...好多相睇添!

我都幾鍾意喬寶寶...佢幾cutie呀!

6:50 下午  
Blogger 芒姐 said...

tfil,

隻豬先生/小姐o係每集幾乎播兩次之下, 聽到我都覺得幾ok...

前幾日睇o左本雜誌, 佢話點解d人忽然咁唔鍾意佢, triggering event係佢o係台灣唔知宣傳新碟定宣傳咩時, 忽然自爆同sammi分手, 但係女方一句聲都無出過, 跟住又傳佢同高層行埋, sammi又開始傳好抑鬱o個d...咁大眾都當然鄙視佢...然後記者亦當然一沉百踩...

咁當然, 我諗都要係佢一向同記者關係不大好先會有起事o黎寫衰佢...又或者佢當紅時大囂張啦...我唔知呀!

7:10 下午  
Blogger 芒姐 said...

Anonymous,

其實佢都有掂到少少親情同友情o既...尋晚佢結婚前同肥老豆o係天台傾偈o個幕都感動o左兩下...不過始終王子公主愛情故事係主線!

7:12 下午  
Blogger 芒姐 said...

V&Anonymous,

係咩? 何美鈿仲有拍香港戲?

我都唔知結婚係咪ending...我見佢o個時話要唔知幾多日內瘦番拍埋最尾幾場戲...可能又係o個d幻想戲份啦...

7:14 下午  
Blogger 芒姐 said...

davis&Anonymous ,

係啦...其實無線o個時應該留位何美鈿o係香港呀...呀! 我仲記得佢好似有份做95年周慧敏o個套刀馬旦...

7:16 下午  
Blogger 芒姐 said...

Joyce,
係...佢又真係免太熱心...懶好到有d煩! 有時d太熱心o既人, 真係一d都唔討好!

聽日講個男主角本來係想搵方中信...唔知係咪真? 如果係就真係更似事業有成, 鑽石王老五...更加童話式...港版李察基爾喎!

7:19 下午  
Anonymous 雪人 said...

何美鈿係有份做刀馬旦ga, 我係因為呢套劇勁鍾意佢呀

肥田的確越睇越悶, 近排已經無睇喇

10:53 下午  
Anonymous 匿名 said...

有馬國明都唔睇?

11:58 上午  

發佈留言

<< Home