6-27(fri) 黃翊
上個月提到o係youtube搵唔到88年奧運tvb的主題曲“一呼百應”o既mv…原來終於有人upload o左…好多謝話俾我聽o既讀者朋友…oh, 真係幾好聽! 咁多隻之中我最鍾意呢隻! 雖然主唱o既兩位都係無咩知名度o既新人, 不過都算唱得唔錯!
(88'奧運主題曲 一呼百應 黃翊、李明珠 1988 MTV)
仲link o左去好多黃翊o既歌度…對黃翊最深o既印象, 當然係佢同"酒杯敲你個頭"o既黃寶欣o既一段情…到依家仲有好多人覺得佢o地係一對…係早前睇報導, 先知道黃翊做唱歌老師, 同atv前藝員陳存正結婚生仔，響大埔熟食大排檔有兩個鋪炒小菜…完全估佢唔到…明明以為佢同黃寶欣結o左婚, 點知原來係同完全唔覺得佢o地有“啦間”o既陳存正!
最高興係可以o係youtube搵番我最鍾意聽佢o個首“最愛的妳”…呢首真係搵o左好耐! 同埋其實o個時都幾hit o下…
(黃翊 最愛的妳 MV 1991)
依家依然熱追緊“變色龍”…搞到晚晚都勁唔夠瞓! 仲驚喜地發現好多朋友都有一齊追…大家真係有taste! 真係愈睇愈好睇, 愈睇愈有戲味! 雖然d劇情有時真係好老套…但七十年代o既社會係咁o架啦…可以睇番三十年前o既人和事, 仲有服飾, 打扮, 講o野口脗, 待人接物…仲有七十年代o既街道, 尤其係成日行經o既中環, 機場etc, 同埋好多唔同o既場景...真係目不暇給! 仲可以做三十年前後o既對比…會有好多開心大發現!
正如好多網友講…當年o既魏秋樺真係好靚, 但係我都係鍾意馬敏兒多d! 仲有蔡瓊輝我都好buy!
尋日o個集睇睇o下, 本來張之珏做o個個有錢仔角色, 去完外國返o黎忽然變o左第二個人做…嘩!“天蠶變”咩? 可惜諗極都唔到代替佢o個位仁兄叫咩名?
仲有另一位做劉志榮老婆個tb”情人”角色o既女子…個樣好熟面口, 諗o左好多先記得叫王天麗…但又諗唔起之前究竟o係咩節目見過佢? 好似係唱歌o既, 但詳情又真係唔記得!
原來79年幾乎原班人馬拍o左套“新變色龍”, 唔知係"變色龍"o既延續篇定係新故事呢? d演員係咪做番同樣角色? 呢套真係唔多覺有重播過..."97變色龍"反而好似有!
但今晚咁難得禮拜五, 居然停播"變色龍"...想點呀? 平日一至四第二日要返屋就要捱眼瞓, 反而今晚可以睇夜d又無得睇...激死!
試過幾次直落睇埋之後o個套“鱷魚淚”…嘩! d演員overlap到呢...睇到人直頭精神分裂! 不過如果要比較, 又真係"變色龍"好睇d! 呢套反而係想睇o下袁麗嫦, 因為好似除o左呢套都唔見佢有做過第二套劇...同埋無啦啦點解佢咁勁可以有得唱呢套重頭劇o既主題曲?!
今日o個集仲見到當时仲起緊o既灣仔運動場…又係勁!
posted by 芒姐 at 2:36 上午
10 Comments:
THANK YOU芒姐
當年真係好鍾意呢首奧運主題曲
20年後終於可以再聽,再睇番呢個MV
真係慨嘆時光飛逝呀
個MV裡有我好崇拜既體操運動員童非
真係值得一看再看
我都係街見過黃翊同黃寶欣拍拖,不經不覺都16-7年前咯,以前聽最愛的你覺得開頭"如果...同Leon既"如果這是情"好似..haha
另外佢有一首歌"黃昏戀人"都幾正
講開變色龍,年輕時既魏秋樺係靚既,眉宇間有一股獨特既女性嫵媚(呢種媚態到佢年紀大左例如做神鵰黃蓉時更加強烈),佢係變色龍既戲份應該差唔多完了,之後就輪到余安安上場,不過余既角色就唔太討好啦,頗乞人憎的
變色龍入面我最鍾意既始終係馬敏兒,記得細個果時佢係我最鍾意既麗的花旦,依家重看變色龍對佢感覺不變,依舊覺得佢好有型格好有氣質,至於蔡瓊輝論五官我覺得佢係比馬敏兒靚的,但唔知點解我對佢又好似無乜feel喎
另外佢當年既人氣同電視台地位似乎比魏馬兩位差左少少
mon姐你講得岩,睇變色龍就好似睇光影流情咁,70年代末既民生社會集體回憶
我都好鍾意懷舊,特別係街景建築既今昔對比
一些自己熟悉的地方再回想起幾＋年前既老模樣,感覺有趣又感慨
有關"新變色龍",係變色龍的延續篇,阿立阿妹阿昇等原班人馬再加叉燒林國雄,劉克宣,林嘉華和黃韻詩等新角色,好希望atv可以接住播新變色龍
下面discuss.hk有關重播變色龍的討論
[url]http://www6.discuss.com.hk/viewthread.php?tid=7207011[/url]
MONJEH,
o黎緊呢集o既肥媽(有線)會訪問黃翊，特此告知． ：）
而家ATV朝早5點幾好似播緊對對糊
Vince,
o係呀...我尋日都睇o左第二集! 同"甜甜廿四味", "驟雨中的陽光"等有d似, 麗的o既青春劇係有一手o既...
i-Joel,
多謝你話我知...可惜我已經無裝有線, 睇唔到添...:(
張c奶,
哈哈...你講開兩首歌o既開頭真係幾似!
嘩...估唔到呢套"變色龍"真係咁長...依家睇o左咁多集先去到中段!
我都係最鍾意馬敏兒, 佢呢種眉宇間帶點倔強o既style我一向都最buy! 我都好同意蔡瓊輝係比馬敏兒靚, 不過佢無咁有style囉...同埋d角色無咁有發揮, 連續呢兩套都係老公去滾帶點楚楚可憐的女人!
嘩...真係好"光影流情"o架...日日都有新驚喜! 好多地方都今非昔比...
winnie ,
近幾年的奧運主題曲真係無得比...今年首"we are ready"雖然都好有眾志成城o既感覺, 不過旋律就差好遠...
李明珠 Pearl Lee (1985 HKCEE) went to same school as you did.
匿名,
真係嗎? 咁真係要去睇O下舊YEARBOOK先...
發佈留言
<< Home