2012年2月15日星期三

2-15(wed) 陳松伶天涯歌女香港演唱會2012

都話呢個禮拜係演唱會週…我一連都唔知睇咗幾多個演唱會! 今次松松姐姐呢個廿七年來首次 (?!) 演唱會, 本來我都無為意, 係有個朋友見我連蔡楓華, 朱咪咪, 尹光都會去睇, "恥笑"我問我會唔會去支持吓松松姐姐, 因為佢話記得我曾經講過細個會o係電話同表姐對唱"天涯歌女"裡面d合唱歌…hoho (sorry, o個個年代好多細路都試過…信我, 我同好多朋友講起, 原來大家當年都有呢個經驗…你不能想像"天涯歌女"電視劇+大碟 (我是買錄音帶的) 當時有幾咁hit!!!)

當年作為一個新人的松松姐姐…"天涯歌女"一碟係賣四白金的(即約200,000隻), 之後隻"月兒彎彎照九州"好似仲賣六白金!!!!! 係三十萬隻!!!!!!!!!!!!!!!!! 依家d新人係賣…1000隻, 仲要係篤數篤番o黎!!!! 可見當年松松姐姐其實都幾紅! 同埋佢仲要因為形象(太)健康…係不停有得唱兒歌…成為咗第一代 (亦係最有代表性) o既兒歌天后!



尋晚第一次去睇松松姐姐演唱會...聽佢現場唱"天涯歌女"同"烏卒卒"等…又的確係令人滾動o既! 尤其係我哋個年代成長的小朋友…有邊個唔係聽松松姐姐的兒歌大?

幾年前有一次"兒歌金曲頒獎禮"請咗松松姐姐出山, 唱番佢d經典兒歌, 最重要當然係壓軸頒咗個"最經典至尊兒歌大獎"俾“烏卒卒”…都算十分實至名歸! 當時睇完呢次unexpectedly好睇+令人感動的"兒歌金曲頒獎禮", 有感而發寫咗幾篇關於我的兒童節目的entries…估唔到忍起好大迴響…令我發現原來兒童節目同兒歌真係會深深種o係小朋友的腦海, 隔咗n年都仍然唔會磨滅! 好似"天與地"話齋…愛音樂的小朋友唔會壞得去邊…hoho! 亦都有好多朋友話俾我聽, 佢就係因為search兒童節目related o既嘢, search咗入o黎我個blog, 變成長期讀者…原來兒歌+兒童節目真係好有market…我自己睇番一次, 都真係回憶返晒埋o黎…

2007兒歌金曲頒獎典禮
閃電傳真機…those were the days!!!
1992兒歌金曲頒獎典禮

最衰今次松松姐姐唱番d經典兒歌時, 走咗落台握手, 你知握手位比較hea唱, lur過就算…我最鍾意的“夏季sha la la”…就咁就唱完咗!!! 仲有"小白船"! 同埋點解無唱埋"叉燒包與漢堡包"&"跳跳紥紥遊香港"o架?! Oh! 好彩都有唱第二代"閃電傳真機”主題曲 (第一代應該係克勤o個首)同埋"相聚一刻"!

佢壓軸唱"烏卒卒"時…真係回憶返晒埋o黎…我哋仲o係度諗, 會唔會有譚玉瑛姐姐o既auntie烏卒卒同麥包哥哥o既矇查查做特別嘉賓呢?! hoho!



同埋松松姐姐依家都算keep得幾好, 06年o個期佢去番tvb拍“飛短留長父子兵”真係跌watt跌得好勁…反而依家過咗40歲仲得咗! 好多女人都係30幾歲跌watt, 但到30尾40頭時又會忽然間得番, 當然亦都應該有好大關係係佢有個後生靚仔老公滋潤吓…情況同千fa一樣! 直頭容光煥發晒! 掂呀! 似乎依家個trend真係興"姊弟戀"…仲要pair pair都幾work…反而"兄妹戀"(btw, 點解無呢個term?) 真係out咗! hoho!

松松姐姐依家呢個長髮look增添咗幾分女人味…同埋成熟咗! 以前個短髮look係爽朗, 但唔吸引! 我同一般男性一樣, 都係buy女性長髮多好多! 而佢依家增添咗幾分成熟韻味添…都話呢期睇親d四十過外的女人反而仲得過以前…好神奇!

更神奇係松松姐姐請咗同佢一樣係不老的傳說o既周慧敏做嘉賓…但佢兩個的感覺十分無啦間…不過ok, 幾驚喜! 幾估佢唔到!

歌藝方面, 正如我06年講過, 係差過"天涯歌女"年代好多, 高音好多上唔到, 中低音依然ok…但佢初出道真係唱家班o黎o架喎! 不過算啦, 疏於戰陣…不能要求太多! 佢出返o黎已經帶俾我哋好多回憶!

同埋我真係估唔到松松姐姐有咁多世界各地o既fans, 又內地各省市, 又星加坡, 又泰國…仲要特登飛o黎睇佢演唱會…同埋佢d fans都係幾die hard o個隻…d花多到呢! 連我隔離個阿姐原來都準備咗禮物衝上台送俾松松! 仲要上台唱歌/跳舞o個兩位fans都幾搞笑, 反而呢幾part氣氛唔錯! 平時fans上台玩遊戲絕對係廁所位o黎o架嘛! 其實今次呢個concert似係歌迷聚會多過演唱會! 不過阿高志森先生d製作依舊係好慳水慳力…個台, d衫etc都係hea爆!

同埋我對於佢無搵番溫兆倫or黎明 (我知無可能…咁求其搵個人囉)同佢合唱番佢d經典合唱歌感到好失望! 都真係有唔少隻o架喎…"天涯歌女"入面o既“扁舟情侶”同埋“特別快車”啦, 同埋"蜀山奇俠之仙侶奇緣"o既主題曲"正義柔情永在"啦…都係好經典, 以前唱k成日唱! 同埋同佢拍檔過7次…係7次o既鄭伊健反正都去開wyman度, 其實可以o黎支持吓老拍檔呀!

"天涯歌女"大碟入面d歌, 就算side track一樣咁hit…應該唱晒佢…就算唔係都唱一半啦, 我相信o黎得o既朋友, 大部份都會聽到爛熟…好過唱別人的歌啦…hoho!

當年我曾經寫道:
"最經典當然係o個兩首合唱歌:“扁舟情侶”同埋“特別快車”啦! 當年劇裡面d歌真係好hit, 所以佢一出碟, 我就同其他普羅大眾一樣, 仆o左去買一隻! “天涯歌女”…亦都係我第一餅個人擁有o既盒帶!

我記得我當時仲興奮到即時o係一間快餐店拆開餅帶…點知我相信就係因為咁, 將歌詞遺留o左o係o個度! 返到屋企拿來聽時, 諗住一邊睇住歌詞一邊聽, 點知搵極都搵唔到…好唔開心! 好彩我表姐都有買o左一餅可以問佢借番o黎影印, 不過無o左原裝版歌詞都係一個遺憾!

當年我真係聽到餅帶爛咁滯, 仲成日同我表姐o係電話對唱o個兩首合唱歌…我後來同d朋友講番, 原來好多人都曾經做過呢件事! 所有同我o地差唔多年紀o既小朋友, 我相信你都一定有做過o既…唔好唔認呀…!

o個兩首歌仲要係有two parts o既添…好精彩囉! “扁舟情侶”就係typical旋律好聽o個隻情歌, 但係我最鍾意o個隻歌係“特別快車”…呢隻真係一隻好特別o既歌…一聽個intro已經令人好興奮, 仲要少有地由慢逐步轉快, 臨尾仲要有火車聲, 好得意! 我o地去k成日都會唱呢隻歌, 簡直係飲歌啦…可惜唔係好多人識唱!


我對於佢今次無唱我最最最like的"特別快車"…感到好失望…仲有無人記得呢首歌…?! Hehe!

8 Comments:

Anonymous 老孩子 said...

好羨慕呀, 我都想去聽...
請問係咪總共唱左五首兒歌?
“夏季sha la la"
"小白船"
"閃電傳真機”主題曲
"相聚一刻"!
"烏卒卒"

"义燒包"其實唔係陳松齡原唱, 係Jane 原唱, 所以唔唱係正常的.
相比之下"跳跳紮紮遊香港"就有意思得多, 若果可以好似當年MV最後咁跳返第一式疆屍操就正.
但我覺得佢更加應該唱埋"創美好明天"呢首插曲, 頭幾年睇閃電傳真機時, 係指定的片尾歌, 好經典咖.

1:39 上午  
Anonymous 匿名 said...

夏季sha la la is my favor!!!! 哇, 我的童年回忆极度之汹涌澎湃 LOL

4:53 上午  
Blogger 芒姐 said...

老孩子,

"相聚一刻"同"烏卒卒"唱晒成首...“夏季sha la la", "小白船", "閃電傳真機”主題曲...仲有唔記得有無多一兩首係medley!

係喎..."义燒包"唔係松松姐姐唱的!

12:27 上午  
Blogger 芒姐 said...

聽番d陪伴大家成長的兒歌的確令人感動~~~

12:28 上午  
Anonymous 匿名 said...

AUNTIE烏卒卒好好睇,係會期待佢播出個隻,雖然當時我已經唔係兒童!
天涯歌女劇同原聲大碟真係經典! 個年代廣告一定係話"唱片合帶現已上市"! 芒,係我地同年代嘅人先明白當年天涯歌女嘅魔力.大過我地幾年嘅可能唔明,細我地幾年嘅更加唔FEEL.世事就係咁奇妙.不過我成日都話,我地個年代係幸福,見證過好多EXCLUSIVELY屬於本土又風靡嘅流行文化同明星.可以咁多年後大家講番都會回味+會心微笑.真心覺得,而家呢新一代,十幾年後有咩值得回味呢? 可能有嘅,不過唔係我杯茶JEI.

溫哥華匿名人

11:24 上午  
Blogger 芒姐 said...

溫哥華匿名人,

哈哈, 我相信每個年代都一定有佢o地o既經典o既!

其實呢, 今次演唱會反而最多係d我阿爸阿媽年紀的朋友捧場...我諗當年佢哋係最buy天涯歌女的一群...至於我哋呢d小朋友都buy天涯歌女, 但同兒buy埋d兒歌!

um...我就覺得大個一個年代的人更"幸福", 因為佢哋真正見證咗香港樂壇最光輝的年代! 我彩我細個都係同我d表哥表姐玩, "maan"車邊都有跟佢哋追過吓校長vs哥哥的光輝年代!

5:26 下午  
Anonymous 老孩子 said...

http://www.youtube.com/watch?v=hGtRYtH5Ea4
陳松齡的廣告

叉燒包, 陳松齡翻唱收錄在碟,
好似當年華星出430兒歌集咁.

10:59 下午  
Blogger 芒姐 said...

哈哈...我記得呢個廣告呀!!! YAY!!!

2:15 上午  

發佈留言

Links to this post:

建立連結

<< Home