12-12(mon) 歡樂滿東華2005之“全台藝員卡拉之星大唱遊”

都話呢個環節受歡迎o架啦…經我多年推介之後, 我身邊o既朋友好多個都有捕o係電視前等睇呢個環節! 而呢幾日, 我發覺有好多人都係search “東華卡拉之星”而入o左o黎, 仲有d係search“黃樂兒”添…可見呢個節目幾咁受歡迎!

為o左要趕得及睇呢個節目, 兩點已?o係電視前…點知搞o左好耐都仲係播粵劇, 要等到成3點先開始做呢個超級好睇o既環節! 好明顯今年個市好, d人又多錢捐, d環節又多o左好多!

不過唔緊要啦…呢個環節實在太好睇…等o下都值得o既! 我覺得一開始諗呢個環節出o黎o既人真係應記一功…咁頂癮o既環節都俾佢諗得出…提供o左無限娛樂俾全香港市民! 當然, 佢都要有一班咁瘋癲o既藝員幫佢做台咁o既馬騮戲出o黎先得o既!

嘩, 唔睇番資料都唔知呢個環節都已經有成6,7年歷史…我覺得佢應該改名叫“全台藝員騎呢之星大唱遊”! 原來連容祖兒都咁欣賞呢個環節…事關有次佢為“殘酷一叮”做嘉賓, d記者問佢如果有藝員版佢會唔會參加, 佢居然話叫王俊棠同魯振順參加…因為年年東華都好鍾意睇佢o地o既出位表演…真係唔好睇少呢個深宵環節o既感染力:

“有傳稍後該節目會有藝員版，祖兒就謂自己未必夠膽玩，她說：「其實我最想王俊棠及魯振順參加，年年東華之夜都等著看他們出場唱歌，因為二人非但造型出位，更有台風同節奏感。」”

我覺得呢個節目簡直係最適合全體家庭成員一齊欣賞o既節目…平時如果我睇睇o下電視劇有人答嗲, 我會想殺人…但係呢個節目, 我絕對會邀請我o既家人一齊睇! 多得呢個環節…拉近o左所有家庭成員o既距離!!

呢個節目真係…無停過笑呀! 完全係每年一度o既最佳娛樂…青山都搵唔到咁多癲人齊集! 連我d平時睇咩搞笑節目都唔多會笑得出o既人, 都無停過爆笑…仲笑到標眼水! 真係好耐無笑得咁開心, 笑得咁真! 大家無睇過…簡直走寶!

今年每個“騎呢之星”之係唱得半隻歌…真係太可惜喇! D咁精彩o既節目, 應該延長到3個鐘嘛! 最精彩當然首推王俊棠同魯振順啦…佢兩個真係騎呢之首! 第一, 佢o地癲; 第二, 佢o地放; 第三, 佢o地識搞氣氛; 第四, 佢o地識揀歌…o係d咁o既環節, 就算你係唱功再好, 都唔應該揀慢歌或者高難度歌諗住sell唱功…事關依家好明顯係sell騎呢! 所以大家首先要目標正確先得!

o個d咩葉瑋, 嘉駿…唔係呢個節目都唔知有咁o既人存在, even劇集茄喱啡都唔多見佢o地有份做…唯獨每年o既 “卡拉之星”就見佢o地出一出o黎…至少都見o左兩三年! 你無人識唔緊要, 最緊要識出位呀嘛…唱埋晒d慢歌…完全sai o左個咁好o既機會!

仲有個四葉女陳自瑤…都叫2線新人呀, 洗唔洗“淪落”到呢個地步? 你係就豁出去, 做得放d嘛! 唱埋d咩“氧氣”…簡直係將個環節推落一個大悶位…唔該晒! 你唔識搞氣氛唔該你唔好立亂學人參與呢個環節…破壞晒!

應該學o下個騎呢“少女”黃樂兒…上年已經講過佢, 嘩幾癲呀…係咁扭呀扭, 好似上o左身咁! 以前睇閃電傳真機 (即佢仲叫黃玉鳳o既年代)…佢好似好踏實咁款…原來佢暗啞底係瘋狂o既! 咁又係o既, 一年先得一次機會表演, 唔搏盡就要等下年! 但sorry, 黃樂兒小姐…“babe”絕對唔會係讀“barbie”o既, 唔該你再上過小一英文堂先出o黎唱歌!

要數功力深厚, 真係唔夠“騎呢孖寶” 腦震盪同王俊棠…佢兩個真係超頂癮! 邊唱邊跳, 仲要o係未開始唱時一輪咀係咁講o野, 又懶押韻咁, 跟住又多謝呢個o個個, 話有好多人支持佢o地…王俊棠又帶埋個仔o黎, 而腦震盪仲周圍同人握手, 真係以為自己演唱會! 一影過去d主持o個度, 梅小惠同曾志偉已經笑到碌地! 佢o地d嘴臉真係無得頂…好鍾意佢o地好鄙視o既樣…仲有王賢誌講o左句佳句, 佢話:“真係好似變o左魯振順concert咁!”跟住又話:“雖然依家已經好夜, 但肯定大家o係屋企笑得好開心!” vinci你都真係偶有佳作…好到肉, 中晒point!

仲有當然係王維德啦, 繼前年o既“強”同埋上年o既“無極”, 今年都唔例外, 又係用手語, 但就唱慢歌“如果有一天”…依然五音不全, 但唱慢歌就更明顯, 同埋無咁精彩囉! 前兩年唱快歌, 再做晒動作, 甩晒beat, 好似“標童”咁先精彩o架嘛! D人o係後面仲要扮佢做手語, 連家燕姐都做埋一份…真係笑死我! 笑到標晒眼淚…實在太難受喇! 王維德平時做d 5線角色都唔覺佢咁癲o架喎…但自從佢呢幾年好落力咁參與呢個環節, 唱到走晒音又做晒動作咁…我開始好欣賞佢! Oh…“喜劇之王”就是你們喇!

下午個pre-show都已經有呢jar人o係度唱“明天會更好”… 正常好多, 好聽好多, 但無o左娛樂性! 不過呢隻歌的確係幾好聽, 聽o左廿幾年都咁kum聽…下次去唱k又要去唱o下呢d老歌!

仲有家燕姐, 其實佢都有一定騎呢程度…至少佢同呢堆騎呢之星好可以mix埋一齊! 佢d“私家快歌”都幾有趣…前兩年o既“皆大歡喜”古裝+時裝版主題曲又或者“家燕媽媽”起碼都比較hit, 但今年首新歌甚麼“火辣辣的唇”(以國語o翕出o黎) d人都跳得好投入…除o左佢o個堆師奶fans深夜都o黎支持佢之外, 其他騎呢之星仲同佢一齊跳埋搏搶鏡…好好笑! 但家燕姐咪嘴實在太令人失望喇! 不過佢d fans真係好厲害, 年年都識跳晒, 仲排晒陣…好落力, 好好笑, 個個一把年紀都仲咁跳得! 抵家燕姐一個人籌到63萬…仲多過王賢誌+嘉穎!

呢個環節真係好好睇…就算本來心情不佳, 睇完都包你心情好番晒, 好睇過任何一套笑片…oh, I love it (or I’m loving it)!!!

同埋成個東華節目, 感覺都好眾志成城…呢幾年來都係家燕姐做壓縮跟住主席總理出晒o黎, 然後叫主席加碼, 再唱“東華心”, 年年個flow都係咁…隻“東華心”係呢五年先有, 但聽聽o下都幾好聽…連我都識唱喇! 但係今年唱“東華心”時無播番全晚精彩片段…可惜o左!