2-25(sat) 芒姐再現

各位昔日芒姐日記o既讀者, 如果你咁好彩搵到o黎呢度, 證明你今年都有運行! 因為某d原因, 我要極速搬家, 來不及通知所有讀者! 不辭而別…希望大家原諒, 明白我有我o既苦衷! 所以如果大家有緣重新搵到呢度, 證明我o地仲有d緣份!

其實一路都有諗過搬家o架喇, 因為diaryland已經愈o黎愈唔好用, 幾年前初初寫網上日記時, 可供選擇o既site得幾個, 呢三年幾多o左一百倍囉, 仲要user-friendly好多…個layout靚唔靚我又無咩所謂, 事關我無咩藝術細胞, 同埋我諗o黎睇我d內容o既朋友唔會太注重呢樣o野o卦?! 不過個site容易整d, 方便d確係好o既…但係我個人太懶, 又的唔起心肝去搬…畢竟o係o個度都渡過o左三年半o既歲月, 一下子要搬晒d o野都唔係咁容易! 好彩d蘋果都可以一拼搬過o黎o者…我仲以為要同佢o地講拜拜, 好唔捨得佢o地!

D舊日記會陸續搬過o黎, 但搬屋需時, 暫時搬住近幾個月o個d先!

睇到某d link入我舊居的search result, 先知道原來承蒙各位厚愛, 根據amazon.com 的統計, 芒姐日記o既瀏覽率居然高據diaryland o既頭十位…真係受寵若驚! 但亦正如之前o係“xanga suicide “o個篇所講, 多人睇係開心, 但係愈多人睇就愈難控制…心情其實好矛盾!



有朋友話我知, 佢求其試o下去yahoo search“魯振順”, 芒姐日記居然排第三位…一個同我無咩啦間o既search item, 居然都可以排到咁前…咁如果一d有心去search同我有關o既o野, 真係好容易會search到!

我唔知d search engine點排search result o既次序, 唔知佢係咪計hit rate…咁依家我關閉o左個舊site, 應該唔會出到咁前喇o卦?!

其實搬新屋真係幾麻煩…同現實中搬屋唔差太遠…要覓新居, 買家俬, 通知朋友改地址, 執o野, 搬o野入新屋, 整理一下新居等等…好煩! 要特別鳴謝銀姐姐同金美姐姐o係我搬屋時提供o既幫助! 我依家仲explore緊d functions…我o地呢d“老人家”要適應新o野係特別難!

依家就好似d老土電視劇情節咁, 一個角色離開o左, 監製又安排個孖生姊妹”翻生”出現…呢個比喻, 大家喜歡嗎? 同“楓華再現”一樣, 依家係”芒姐再現”…(哈哈, 好高興有朋友讚我調轉個名o黎串o既諗頭…多謝讚賞! 我受晒!)