6-3(sat) 對不起我愛你

自從上次講番“今生無悔”之後, 令大家憶起無數“童年回憶”…我亦都因此睇番好多91年o既節目同埋雜誌!

1991年係我喜愛+懷念o既一年, d電視節目好睇, d歌好聽, 亦可能又因為適逢六年級…特別他條, 特別開心, 個暑假又特別長…一切都好美好!

早前重溫o左一個91年最最最經典o既節目, 亦都係我咁多年來都時不時都提起o既大show…1991年華東水災籌款show-演藝界總動員“忘我大匯演”…比起上年海嘯o個個 “愛心無國界演藝界大匯演”更盛大百倍!

愛(上)

愛(下)

如果大家由早幾年開始已經有睇芒姐日記, 都會記得呢個show對我o既“重要性”…當年因為錄影機壞o左而錄唔到呢個節目 (o個期仲要一連幾日都有好多超精彩節目, 包括我最鍾意睇o既“浪族闊少爺”大結局…個錄影機揀正呢個時候壞, 真係同我好過唔去…當時真係sad到?唔著覺添呀…係! 我認我係好瘋狂o架!), 更加miss o左最經典o既黎明走音版“對不起我愛你”片段, 十多年來引以為憾!

好彩十年後居然俾我搵到有大學同學有錄起仲有keep住呢個節目…真係踏破鐵鞋無覓處! 好感動, 好驚喜…抵我當時封呢位同學做“愛妃”…雖然後來佢“爛”o左! 哈! 不過十幾年後能夠搵番呢個搵o左好耐o既“失而復得的節目”, o個種感動真係無法形容, 所以特別珍而重之! 同埋愛妃爸爸真係錄得好好, 無線亞視兩邊錄, 一有廣告就轉台, 好pro囉!

呢個節直係咁多年來我最鍾意睇o既籌款show…至於喜愛呢個show o既原因, 我諗唔洗我多講大家都會知…又係因為“眾志成城”+“萬眾同心”o個d啦…大家有睇開呢度都會聽我講過, 所以唔再elaborate喇!



成個節目都好好睇, 首先由當年紅極一時o既草蜢做開場表演…呢件事又係曾經講過, 唔再repeat喇…總之就係“近”啦…十幾年後o既“愛心無國界演藝界大匯演”都係由佢o地打頭陣, 但情況係完全兩回事:

“最騎呢係見到4:00 o個part由草蜢打頭陣囉…仲要只係得蔡一傑同蘇志威! 事關當年“忘我”又係佢o地打頭陣, 但係當時佢o地係因為大紅大紫所以有得o係呢個有利時間表演, 今次就好明顯因為係禮拜5, o個個時間大部份人都未放工放學, 擺明係因為佢o地已經風光不再, 所以要放o係“新人/3線歌手”時段度! 關淑怡反而可以o係黃金時間演出…不過佢又真係唱得幾動聽o既!”

關淑怡當年又真係好吃得開, 有得擔好多part, 但係依家出返o黎反而撈得唔多掂!

仲有一眾當年o既新人 (包括我當時好喜歡o既sammmi) 唱o既medley...十五年人事幾翻新...你又認得佢o地之中幾多個呢?



經典場面就當然要數柯受良飛車過由十幾個藝人組成o既人牆…仲有劉華o既“心口碎大石”, 然後咬血漿扮嘔血…嚇到d妹妹仔fans半死! 佢又確係識得搞氣氛o既!

經典重現1-華仔“大石碎心口”片段:



跟住有一part係當時兩大紅人華仔+黎明 (直頭係全城最紅添啦…當時個個都將佢o地同八十年代o既譚詠麟+張國榮比較…因為張學友走實力派路線同佢o地完全唔同, 而城城o個期先o岩o岩o係台灣走紅, 仲未有“四大天王”呢個term!)…佢o地仲要唱晒當年最hit o既歌, 包括“對不起我愛你”, “愛不完”, “相逢在雨中”, “可不可以”, “如果這是情”, “再吻我吧”…嘩! 真係超經典呀…尤其係15年後o既今日再聽番…事關大家都知我個人幾咁懷舊o架啦!

佢兩個o個期d歌真係好好聽…可能真係有競爭先有進步啦! 劉華o個d好聽, 但leon o個d係更好聽 (我指d歌曲本身…兩人o既唱功就…是但啦!)…唔知點解後期無晒呢d好歌?! 所以我唯一一隻買過o既黎明盒帶, 就係佢隻什麼“傾城之最”…因為精選晒佢90-92年o既好歌…隻隻都咁好聽! 不過我相信大家都估唔到…咁多隻之中我最鍾意o既係…“夜夜夢中見”! 當時真係覺得好好聽…chorus有句係“song for you, song for me…”, 唔知點解我咁多年都係聽到“some for you, some for me…”?! 當時我覺得, 好鬼死似小學教人分餅食咁…好趣緻!

(當然如果四大天王之中你真係要我揀一個, 我係會揀張愛友…因為由細到大都唔多buy偶像派…我係咁騎呢! 克勤唔知算唔算偶像派呢?! )

而講得“忘我大匯演”, 當然唔可以唔同大家分享埋當中最最最令人難以忘懷o既老黎走音版 “對不起我愛你”啦! 今次post呢段片出o黎, 唔係想恥笑佢, 反而係想o係十幾年後幫佢o黎個大平反…雖然我不嬲都不太buy黎明 (除o左“今生無悔”o既程朗)…一直都覺得佢做戲係好過唱歌好多! 佢唱歌, 只可以形容為“無咁大個頭戴咁大頂帽”…佢好彩在搵o岩形象, 遇到勁多好歌…但佢o既歌藝, 我真係不敢恭維!

不過話雖如此, 佢呢次走音, 又真係情有可原…做歌手走音係樣衰, 但試問有邊個未走過音呀? 就算係經驗老到o既歌手, 都有失手o既時候…何況佢o個時只係一個新人, 仲要係話明俾你聽唔sell歌藝o既新人! 再加上當時o既情況係佢已經表演完自己o個part走o左, 點知闊太(劉)寶詠琴捐五十萬叫佢獻唱o個期最hit o既“對不起我愛你”…50萬善款喎, 走o左都俾人call番佢返o黎啦! 咁佢趕頭趕命返到o黎, 又無準備又無rehearsal, 後面隊樂隊求其開個key俾佢, 點知唱到中途走走o左音…o係咁o既情況下, 我覺得情有可原囉! 同埋為o左做善事, 點知換o黎第二日報紙娛樂版頭條俾人狠批, 笑足幾十日…十幾年後, 大家提起“對不起我愛你”, 除o左記得呢首歌好經典, 亦會記起呢件經典事情…情況可以媲美蔡楓華o既“?那光輝”事件咁可歌可泣!

睇番片段, 見到佢當時真係好尷尬, 直頭要搵窿捐囉…其實咁多年, 佢都受夠啦! 同埋我好欣賞佢o係呢件事上懂得自嘲…我記得幾年後佢有個音樂特輯叫“情深說話盡情講”…走d齋talking路線…佢o係個特輯講番呢件瘀事, 仲話當年“走音事件”後有套演藝界總動員籌款電影“豪門夜宴”, 居然問佢介唔介意o係套戲入面重演番呢一幕? 於是佢就一邊炒[食送]一邊唱呢隻走音歌…我好欣賞佢呢份豁達…比起佢平時一貫o既“手掌係肉, 左手又係肉”說話方式, 討好好多!

經典重現2-黎明“走音版對不起我愛你”片段:



就讓我o地一邊睇片, 一邊一齊跟住唱呢首咁經典o既歌:

對不起、我愛你
作曲：盧東尼 作詞：向雪懷　編曲：盧東尼

多麼想用說話留住你　心中想說
一生之中　都只愛你　為何換了對不起

* 今天分手像我完全負你
這傷痛盼望輕微　望你漸忘記

我每日也想著你　靠在這街中等你
遙遠張望　隨你悲喜　視線人浪中找你

行近我又怕驚動你　我又怕心難死
立定決心以後分離
一生裡頭　誰是我的心中最美　往日的你 *

Repeat *